Israel’s parliament dissolves ইজৰাইলৰ সংসদ ভংগ কৰা হৈছে। অহা ১ নৱেম্বৰত অনুষ্ঠিত হ’ব নিৰ্বাচন। চাৰি বছৰৰ ভিতৰত পঞ্চমবাৰৰ বাবে ইহুদী ৰাষ্ট্ৰখনত নিৰ্বাচন হ’বলৈ গৈ আছে। ইজৰাইলৰ বৈদেশিক মন্ত্ৰী ইয়েৰ লেপিডে এই পৰিস্থিতিত তত্বাৱধায়ক চৰকাৰৰ দায়িত্ব গ্ৰহণ কৰিব। তেওঁৱেই তত্বাৱধায়ক চৰকাৰখনৰ প্ৰধানমন্ত্ৰী হ’বলৈ গৈ আছে।
লেপিডে আছিল ইজৰাইলৰ বৰ্তমানৰ মিত্ৰজোঁট চৰকাৰ গঠনৰ মূল উদ্যোক্তা। তেওঁৱেই চৰকাৰখনৰ প্ৰধান কাৰিকৰ। সেয়ে তেওঁৰ সহকৰ্মীসকলে লেপিডৰ ওপৰতে আস্থা ৰাখি ছে।
লেপিডক তত্ত্বাৱধায়ক চৰকাৰৰ প্ৰধানমন্ত্ৰী হিচাপে উন্নীত কৰাৰ সিদ্ধান্ত লোৱাৰ পূৰ্বে বৃহস্পতিবাৰে ইজৰাইলৰ সংসদ ভংগ কৰা হয়। কিয়নো, বৰ্তমানৰ ইজৰাইলৰ প্ৰধানমন্ত্ৰী নাফটালি বেনেটে অৱসৰ লোৱাৰ কথা ঘোষণা কৰিছিল।
বিৰোধীয়ে অৱশ্যে কঠিন পৰিস্থিতিটো মোকাবিলা কৰিবলৈ অক্ষম হৈয়েই বেনেট আঁতৰি যোৱা বুলি সমালোচনা কৰিছে। কিয়নো দেশৰ নিৰাপত্তাক লৈ তেওঁৰ ওপৰত নিৰন্তৰ চাপ বৃদ্ধি পাইছে।পেলেষ্টাইনৰ উগ্ৰপন্থীসকলে নিয়মীয়াকৈ ইজৰাইলীসকলৰ ওপৰত আক্ৰমণ কৰি আহিছে। প্ৰাৰ্থনাৰ সময়তো ইজৰাইলী নাগৰিকসকলৰ ওপৰত গুলীচালনা কৰা হৈছে। প্ৰাক্তন প্ৰধানমন্ত্ৰী বেঞ্জামিন নেতান্যাহু আৰু তেওঁৰ সমৰ্থকসকলে এনে পৰিস্থিতিৰ বাবে চৰকাৰক তীব্ৰ সমালোচনা কৰি আহিছে।
এনে পৰিস্থিতিত বেনেটৰ চৰকাৰৰ ওপৰত বৈদেশিক নীতিৰ ব্যাপক বিফলতাৰ অভিযোগ উত্থাপিত হৈছে। ৰাষ্ট্ৰসংঘই ইজৰাইলক আল-জাজিৰাৰ এজন সাংবাদিকৰ হত্যাৰ বাবে দোষী সাব্যস্ত কৰিছে। দীৰ্ঘদিনীয়া বন্ধু আমেৰিকাও ইহুদী ৰাষ্ট্ৰখনৰ কাষত থিয় হোৱা নাই। যদিও বেনেটৰ শাসনত ইজৰাইলে আমেৰিকাৰ বন্ধু আৰৱ দেশসমূহত ইয়াৰ প্ৰভাৱ বৃদ্ধি কৰিছিল ই কিন্তু ইৰাণক নিয়ন্ত্ৰণ কৰিব নোৱাৰিলে। ইয়াৰ বিপৰীতে ৰাছিয়া ইৰাণৰ কাষত থিয় হৈছে। ফলস্বৰূপে ৰাছিয়াৰ সৈতে ইজৰাইলৰ সম্পৰ্ক তিক্ত হৈ পৰিছে।
এই পৰিস্থিতিত ইয়েৰ লেপিডে ইজৰাইলৰ তত্ত্বাৱধায়ক চৰকাৰৰ দায়িত্ব ল’বলৈ গৈ আছে। বৈদেশিক নীতিত বিফল হোৱাৰ অভিযোগ উঠা লেপিডৰ ওপৰতে অৰ্প কৰিব বিচৰা হৈছে বৰ্তমান ইজৰাইলৰ দায়িত্ব। শুকুৰবাৰে কাৰ্যভাৰ গ্ৰহণ কৰাৰ সময়ত লেপিড ইজৰাইলৰ ১৪ তম প্ৰধানমন্ত্ৰী হ’ব। তেওঁৰ পূৰ্বসূৰী বেনেট আছিল ইজৰাইলৰ আটাইতকৈ কম সময়ৰ প্ৰধানমন্ত্ৰী।
বেঞ্জামিন নেতান্যাহুৱে ১২ বছৰ ধৰি ইজৰাইলৰ প্ৰধানমন্ত্ৰী হিচাপে কাৰ্যনিৰ্বাহ কৰিছিল। ইজৰাইলী সেনাৰ এজন প্ৰাক্তন কমাণ্ডো বেঞ্জামিন নেতান্যাহুৱে দীঘলীয়া ১২ বছৰ ধৰি শাসনত আছিল। যেতিয়া নেতান্যাহুক আঁতৰাই নতুন চৰকাৰ ক্ষমতালৈ আহিছিল, তেতিয়া নেতান্যাহুৰ সমৰ্থকসকলে কৈছিল যে বেনেটে বিভিন্ন মতাদৰ্শৰ দলসমূহৰ সৈতে মিত্ৰতা কৰি বেছি দিন শাসনত থাকিব নোৱাৰিব।
