ইজৰাইলৰ ৰাষ্ট্ৰপতি আইজাক হাৰ্জগে প্ৰধানমন্ত্ৰী বেঞ্জামিন নেতানিয়াহুৰ মূল প্ৰতিদ্বন্দ্বী তথা বিৰোধী নেতা গাডি আইজেনকটক ইজৰাইলত চৰকাৰ গঠনৰ বাবে আমন্ত্ৰণ জনাইছে।
তেওঁ সংখ্যাগৰিষ্ঠতা প্ৰমাণ কৰি চৰকাৰ গঠন কৰিবলৈ হাতত ২৮ দিনৰ সময় আছে। প্ৰয়োজন হ’লে তেওঁক আৰু ১৪ দিনৰ সময় দিয়া হ’ব পাৰে। এই সময়ছোৱাৰ ভিতৰত যদি তেওঁ সংখ্যাগৰিষ্ঠতা প্ৰমাণ কৰিব নোৱাৰে তেন্তে ৰাষ্ট্ৰপতিয়ে আন এজন প্ৰাৰ্থীক নিমন্ত্ৰণ কৰিব। ফলত সংসদীয় নিৰ্বাচনত ভোট গণনাৰ পিছত ইজৰাইলত সৃষ্টি হোৱা ৰাজনৈতিক অচলাৱস্থাৰ এতিয়াও অন্ত পৰা নাই।
ৰাষ্ট্ৰপতিৰ নিমন্ত্ৰণ লাভ কৰি আইজেনকটে ছ’চিয়েল মিডিয়াত মুখ খুলিছে। চৰকাৰ গঠনৰ ক্ষেত্ৰত তেওঁ আশাবাদী। তেওঁ লিখিছে, “এতিয়া এখন ৰাষ্ট্ৰীয় জৰুৰীকালীন চৰকাৰ গঠন কৰাৰ সময়। আমি ইয়াৰ যোগ্য হ’ম আৰু সেইটো নিশ্চিত কৰিবলৈ মই মোৰ সামৰ্থ্য অনুসৰি সকলো কৰিম।”
ইজৰাইলৰ বিধায়িনী দল নেচেটৰ মুঠ আসনৰ সংখ্যা ১২০খন।চৰকাৰ গঠনৰ বাবে প্ৰয়োজনীয় ৬১খন আসন, যিটো কোনো এটা দলেই এককভাৱে লাভ কৰা নাই। নেতানিয়াহুৰ লিকুড পাৰ্টিৰ নেতৃত্বত শাসকীয় মিত্ৰজোঁটে ৫৩খন আসন আৰু প্ৰাক্তন সেনা প্ৰধান আইজেনকোটৰ নেতৃত্বত গঠিত মিত্ৰজোঁটে ৪৮খন আসন লাভ কৰে। আৰব দলসমূহে ১৯খন আসনত জয়লাভ কৰে।
পৰিস্থিতি এনেকুৱা যে আৰব দলৰ সমৰ্থন অবিহনে চৰকাৰ গঠন কৰাটো সম্ভৱ নহয়। কিন্তু আইজেনকটে ইতিমধ্যে ঘোষণা কৰিছে যে তেওঁ আৰব দলৰ সৈতে হাত নিমিলায়। ফলত জটিলতা বাঢ়িছে।
অৱশ্যে আৰব নেতাসকলে কৈছে যে তেওঁলোকে প্ৰথমে আইজেনকটক চৰকাৰ গঠনৰ সুযোগ দিব। সেয়ে তেওঁৰ নেতৃত্বত গঠিত মিত্ৰজোঁটক সমৰ্থন কৰিছে। নেতানিয়াহু আৰু তেওঁৰ নেতৃত্বত থকা কঠোৰ সোঁপন্থী দলসমূহৰ ওপৰত আৰব নেতাসকল ক্ষুব্ধ হৈ পৰিছে। আৰব দলৰ সমৰ্থনৰ বাবেই ৰাষ্ট্ৰপতিগৰাকীয়ে আইজেনকটক চৰকাৰ গঠনৰ বাবে আমন্ত্ৰণ জনাইছে।
ৰাষ্ট্ৰপতিৰ আমন্ত্ৰণৰ পিছত বিশেষজ্ঞসকলৰ মতে এতিয়া আইজেনকটৰ হাতত তিনিটা বিকল্প আছে। এটা, আৰব দলৰ সৈতে হাত মিলাই সংখ্যালঘু চৰকাৰ গঠন কৰা, য’ত গুৰুত্বপূৰ্ণ বিষয়ত আৰব দলৰ ভোট নিৰ্ণায়ক হ’ব। দুই, অতি ৰক্ষণশীল দলৰ সৈতে হাত মিলাই মিত্ৰজোঁটৰ চৰকাৰ গঠন কৰা। এই ক্ষেত্ৰত আইজেনকটে পূৰ্বতে এৰাই চলা কিছুমান দলৰ আশ্ৰয় ল’ব লাগিব। তিনি, আইজেনকোটে নিজৰ মূল প্ৰতিদ্বন্দ্বী নেতানিয়াহুৰ সৈতে হাত মিলাই চৰকাৰ গঠন কৰিব পাৰে।
এই তিনিটা সম্ভাৱনাক মনত ৰাখি অহা ২৮ দিনলৈ ইজৰাইলৰ ৰাজনীতিত দৰদাম অব্যাহত থাকিব। প্ৰয়োজন হ’লে ৰাষ্ট্ৰপতিয়ে আইজেনকটক আৰু ১৪ দিনৰ সময় দিব। সেই সময়ৰ ভিতৰত যদি তেওঁ সংখ্যাগৰিষ্ঠতা প্ৰমাণ কৰিব নোৱাৰে তেন্তে আন এজন প্ৰাৰ্থীক আমন্ত্ৰণ কৰা হ’ব। যদি তেওঁও ব্যৰ্থ হয় তেন্তে চৰকাৰ গঠনৰ বাবে তৃতীয় ব্যক্তিক মাতিব। এই প্ৰক্ৰিয়া ১০০ দিনলৈকে চলিব পাৰে। সেই সময়ৰ ভিতৰত যদি কোনো সমাধান নাথাকে তেন্তে নতুন নিৰ্বাচন হ’ব।
