২ ছেপ্টেম্বৰত ইছৰোৱে উৎক্ষেপন কৰিব আদিত্য-এল ১ | চন্দ্ৰযান ৩ ৰ অভূতপূৰ্ব সফলতাৰ পিছত শেহতীয়াকৈ ভাৰতীয় মহাকাশ গৱেষণা সংস্থাই (ISRO) সূৰ্য্যৰ বিষয়ে অধ্যয়ন কৰা প্ৰথমটো মহাকাশভিত্তিক ভাৰতীয় মানৱ নিৰীক্ষণ কেন্দ্ৰ আদিত্য-এল১ উৎক্ষেপণৰ কথা ঘোষণা কৰিছে।
অহা ২ ছেপ্টেম্বৰত পুৱা ১১.৫০ বজাত শ্ৰীহৰিকোটাৰ পৰা ইছৰোৰ পিএছএলভি এক্সএল ৰকেটেৰে আদিত্য-এল১ অভিযান উৎক্ষেপণ কৰা হ’ব।
প্ৰথম অৱস্থাত মহাকাশযানখনক পৃথিৱীৰ নিম্ন কক্ষপথত স্থাপন কৰা হ’ব। ইয়াৰ পিছত কক্ষপথক অধিক উপবৃত্তাকাৰ কৰি তোলা হ’ব আৰু পিছলৈ অনব’ৰ্ড প্ৰপালচন ব্যৱহাৰ কৰি মহাকাশযানখন লেগ্ৰেঞ্জ পইণ্ট (L1)ৰ ফালে নিক্ষেপ কৰা হ’ব।
মহাকাশযানখনে লেগ্ৰেঞ্জ পইণ্ট -১ ৰ ফালে গতি কৰাৰ লগে লগে ই পৃথিৱীৰ মহাকৰ্ষণীয় প্ৰভাৱৰ পৰা ওলাই যাব। ওলাই অহাৰ পিছত ক্ৰুজ পৰ্যায় আৰম্ভ হ’ব আৰু তাৰ পিছত মহাকাশযানখনক লেগ্ৰেঞ্জ পইণ্টৰ চাৰিওফালে থকা বৃহৎ হেলো কক্ষপথত স্থাপন কৰা হ’ব। উৎক্ষেপনৰ পৰা এল ১ লৈ যাবলৈ প্ৰায় চাৰি মাহ সময় লাগিব আদিত্য এল-১ যানখনক।
আদিত্য এল ১ হ’ব সূৰ্য্যৰ বিষয়ে অধ্যয়ন কৰা প্ৰথমটো মহাকাশ ভিত্তিক ভাৰতীয় অভিযান। মহাকাশযানখনক পৃথিৱীৰ পৰা প্ৰায় ১৫ লাখ কিলোমিটাৰ দূৰত্বত থকা সূৰ্য্য-পৃথিৱী ব্যৱস্থাৰ লেগ্ৰেঞ্জ বিন্দু ১ ৰ চাৰিওফালে এটা কক্ষপথত স্থাপন কৰিব লাগিব।
এল-১ বিন্দুৰ চাৰিওফালে হেলো কক্ষপথত স্থাপন কৰা যানখনৰ প্ৰধান সুবিধাটো হ’ল যে ই কোনো ধৰণৰ সূৰ্যগ্ৰহণ নোহোৱাকৈ সূৰ্য্যক অবিৰতভাৱে পৰ্যবেক্ষণ কৰিব পাৰিব। ইয়াৰ দ্বাৰা সৌৰ কাৰ্যকলাপ আৰু মহাকাশৰ বতৰৰ ওপৰত ইয়াৰ প্ৰভাৱ বাস্তৱ সময়ত পৰ্যবেক্ষণ কৰিবলৈ সুবিধা হ’ব।
