উত্তৰ-পূৰ্বাঞ্চলৰ যোগাযোগ ব্যৱস্থা ত্বৰান্বিত কৰাৰ বাবে ইছৰ’ই অহা ১৪ নৱেম্বৰত মহাকাশলৈ প্ৰেৰণ কৰিব এটা কৃত্ৰিম উপগ্ৰহ। GSAT-29 নামৰ উক্ত কৃত্ৰিম উপগ্ৰহটো উত্তৰ-পূৰ্বাঞ্চল আৰু জম্মু-কাশ্মীৰৰ যোগাযোগ খণ্ডক ত্বৰান্বিত কৰাৰ বাবে ভাৰতীয় মহাকাশ সংস্থাটোই অন্ধ্ৰ প্ৰদেশৰ শ্ৰীহৰিকোটা উৎক্ষেপণ কেন্দ্ৰৰ পৰা প্ৰেৰণ কৰিব।
প্ৰধান মন্ত্ৰী নৰেন্দ্ৰ মোডীৰ ‘ডিজিটেল ইণ্ডিয়া অভিযান’ৰ এটা অংশ হিচাপে উৎক্ষেপণ কৰা এই কৃত্ৰিম উপগ্ৰহটোৱে উত্তৰ-পূব আৰু জম্মু-কাশ্মীৰৰ দ্ৰুততৰ যোগাযোগ সেৱা সম্ভৱপৰ কৰিব।
টাইমছ অব ইণ্ডিয়াৰ এটা প্ৰতিৱেদনত প্ৰকাশ যে এই উপগ্ৰহটোত দুটা কু আৰু কা (Ku and Ka ) কাৰ্যকৰী পে’লোড থাকিবআৰু ইয়ে দ্ৰুত যোগাযোগ সম্ভৱ কৰাত সহায় কৰিব। উক্ত পে’লোডৰ উপৰিও এই উপগ্ৰহটোৱে কিউ আৰু ভি বেণ্ডৰ ত্ৰিমাত্ৰিক প্ৰযুক্তি, অপ্টিকেল কমিউনিকেশ্যন, উচ্চ ৰিজল্যুশ্যনসম্পন্ন ডিজিটেল কেমেৰা বহন কৰিব লৈ যাব।
এই উপগ্ৰহটোক নতুন বৈজ্ঞানিক প্ৰযুক্তি পৰীক্ষা কৰাৰ মঞ্চ হিচাপে ব্যৱহাৰো কৰিব পৰা যাব। ইছৰ’ৰ অধ্যক্ষ কৈলাশাভাডিভু শিৱনে কৈছে যে এই উপগ্ৰহটো ইছৰ’ইদ্বাৰা নিৰ্মিত দ্বিতীয় গধূৰতম উৎক্ষেপণযান—of GSLV MK-IIIৰ দ্বাৰা মহাকাশলৈ প্ৰেৰণ কৰা হ’ব।
উল্লেখ্য যে ভাৰতৰ গধূৰতম কৃত্ৰিম উপগ্ৰহ ৫.৭ টন ওজনৰ GSAT-11ক চলিত বৰ্ষৰ ৪ ডিচেম্বৰত মহাকাশলৈ উৎক্ষেপণ কৰা হ’ব। এই উপগ্ৰহটো হৈছে ভাৰতত দ্ৰুত ইণ্টাৰনেট যোগান ধৰিব পৰা অত্যাধুনিক প্ৰযুক্তিসম্পন্ন উপগ্ৰহ। অহা বছৰৰ জানুৱাৰিৰ ৩ তাৰিখে ইছৰ’ই চন্দ্ৰায়ন-২ক চন্দ্ৰ অভিমুখে প্ৰেৰণ কৰিব।
শিৱমে কৈছে যে চন্দ্ৰায়ন-২ অভিযানক সফল কৰাৰ বাবে প্ৰয়োজনীয় পৰীক্ষা সম্পন্ন কৰি থকা হৈছে।
তেওঁ আৰু কৈছে যে চন্দ্ৰ অভিযানৰ বাবে অৰ্বিটাৰ (প্ৰদক্ষিণ কৰি থকা অংশ), লেণ্ডাৰ (অৱতৰণ কৰা অংশ) আৰু ৰোভাৰৰ (মন্থৰভাৱে চালিত যান) পৰীক্ষা কৰি থকা হৈছে আৰু আৱশ্যকীয়া ত্ৰুটি সংশোধন কৰা হৈছে। তামিলনাডুৰ মহেন্দ্ৰগিৰিত অভিযানৰ সৈতে সম্পৰ্কিত সকলো যন্ত্ৰাংশৰ পৰীক্ষা কৃতকাৰ্যতাৰে সম্পন্ন কৰা হৈছে। পৰিকল্পনা অনুসৰি, আগন্তুক বৰ্ষৰ ৩ জানুৱাৰিত ভাৰতীয় মহাকাশ সংস্থাটোৰ GSLV MK-III উৎক্ষেপণ যানেৰে চন্দ্ৰায়ন-২ক উৎক্ষেপণ কৰা হ’ব।