ভাৰতৰ অধ্যক্ষতাত নতুন দিল্লীত আয়োজিত জি-২০ সন্মিলনত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হৈছে। ইয়াৰে এটা হ’ল ভাৰত-মধ্যপ্ৰাচ্য-ইউৰোপ অৰ্থনৈতিক কৰিডৰ। এই অৰ্থনৈতিক কৰিড’ৰত ভাৰত, সংযুক্ত আৰব আমিৰশ্বাহী, ইউৰোপীয় ইউনিয়নকে ধৰি ফ্ৰান্স, জাৰ্মানী, আমেৰিকা যুক্তৰাষ্ট্ৰৰ লগতে ইটালীও সংযুক্ত হ’ব।
ইপিনে, এই পৰিকল্পনা গ্ৰহণ কৰাৰ সময়তে ইটালীৰ প্ৰধানমন্ত্ৰী জৰ্জিয়া মেল’নীয়ে চীনৰ সৈতে ‘বেল্ট এণ্ড ৰোড’ (বি আৰ আই) প্ৰকল্পৰ পৰা আঁতৰি অহাৰ ইংগিত দিলে। ইটালীৰ প্ৰধানমন্ত্ৰীয়ে জি-২০ সন্মিলনৰ মাজতে চীনৰ প্ৰধানমন্ত্ৰী লি কুইয়াঙৰ সৈতে হোৱা বৈঠকত এই বাৰ্তা প্ৰদান কৰে। যিটো এই সন্মিলনত বিশেষ তাৎপৰ্যপূৰ্ণ বিবেচিত হৈছে। আনহাতে, ইটালীৰ এই পৰিকল্পনাই স্বাভাৱিকতে বেইজিঙৰ উদ্বেগ বৃদ্ধি কৰিছে।
জানিব পৰা মতে, জি-২০ সন্মিলনৰ মাজতে ইটালীৰ প্ৰধানমন্ত্ৰী জৰ্জিয়া মেল’নীয়ে চীনৰ প্ৰধানমন্ত্ৰী লি কুইয়াঙৰ সৈতে সুকীয়া দ্বিপাক্ষিক বৈঠকত মিলিত হৈছিল। সেই বৈঠকত ইটালীৰ প্ৰধানমন্ত্ৰীয়ে চীনৰ সৈতে বেল্ট এণ্ড ৰোড প্ৰকল্পৰ পৰা আঁতৰি অহাৰ পৰিকল্পনা ঘোষণা কৰে।
লগতে পঢ়ক: মৰ্মান্তিক! ডিব্ৰুগড়ত ইনোভা আৰু ট্ৰাকৰ সংঘৰ্ষত নিহত গুৱাহাটীৰ এটা পৰিয়ালৰে ৭ জন সদস্য
অৱশ্যে ইটালীয়ে বি আৰ আই প্ৰকল্পৰ পৰা ওলাই আহিলেও চীনৰ সৈতে বন্ধুত্বপূৰ্ণ সম্পৰ্ক বজাই ৰাখিবলৈ বাৰ্তা প্ৰদান কৰে মেল’নীয়ে। আনহাতে, চীনৰ প্ৰধানমন্ত্ৰীয়ে ইটালীৰ প্ৰধানমন্ত্ৰীলৈ স্বচ্ছ আৰু বৈষম্যহীন ব্যৱসায়িক পৰিৱেশ বজাই ৰাখিবলৈ বাৰ্তা প্ৰদান কৰি ইয়াৰ উত্তৰ দিয়ে।
কোৱা বাহুল্য যে ইটালীয়ে বি আৰ আই প্ৰকল্পৰ পৰা আঁতৰি অহাৰ পৰিকল্পনাক লৈ চীন কিছু অস্বস্তিত পৰিছে আৰু দুয়োখন দেশৰ বাণিজ্যিক সম্পৰ্কত ফাট মেলিছে।
অৱশ্যে ইতিমধ্যে ইটালী চৰকাৰে চীনৰ বিশেষ প্ৰকল্প বি আৰ আইৰ পৰা আঁতৰি অহাৰ পৰিকল্পনাৰ কথা ঘোষণা কৰিছিল। ৰোমে লক্ষ্য কৰিছে যে এই প্ৰকল্পৰ পৰা ইটালী বিশেষভাৱে লাভৱান নহ’ব। ইটালীৰ বৈদেশিক মন্ত্ৰী এণ্টনিঅ’ তাজানীয়ে শেহতীয়াকৈ বেইজিং ভ্ৰমণ কৰিছিল আৰু বি আৰ আই প্ৰকল্পক লৈ তেওঁ হতাশ হয়। এই প্ৰকল্পই আশানুৰূপ ফলাফল নিদিয়ে বুলিও তেওঁ কৈছিল।
ইয়াৰ উপৰিও ইটালীৰ আন আন ৰাজনৈতিক দলসমূহেও মেল’নী চৰকাৰে বি আৰ আই প্ৰকল্পত যোগদান কৰাত ক্ষোভ প্ৰকাশ কৰা বুলি সূত্ৰসমূহে প্ৰকাশ কৰিছে।
ইপিনে, ইটালীৰ বি আৰ আই প্ৰকল্পৰ পৰা আঁতৰি অহাৰ পৰিকল্পনাই বেইজিঙক অস্বস্তিত পেলাইছে। চীনৰ ৰাষ্ট্ৰপতি ছি জিনপিঙে অক্টোবৰ মাহত এই প্ৰকল্প সন্দৰ্ভত তৃতীয়খন সন্মিলন অনুষ্ঠিত কৰাৰ পৰিকল্পনা কৰিছে।
লগতে পঢ়ক: ৰাতিপুৱা শুই উঠিয়েই কৰক এইকেইটা কাম, সমস্যাৰ মুখ নেদেখে আপুনি
দৰাচলতে বি আৰ আই কি? দক্ষিণ এছিয়া, মধ্য এছিয়া, উপসাগৰীয় অঞ্চল, আফ্ৰিকা আৰু ইউৰোপক পথ আৰু সাগৰীয় মাধ্যমেৰে সংযোগ কৰিবলৈ চীনে ২০১৩ চনত বি আৰ আই প্ৰকল্প আৰম্ভ কৰিছিল। কিন্তু এই প্ৰকল্পক লৈ বেইজিঙে ভাৰত আৰু আমেৰিকাৰ তীব্ৰ সমালোচনাৰ সন্মুখীন হ’বলগীয়া হয়। ইয়াৰ উপৰিও শ্ৰীলংকা, মালয়েছিয়া, ফিলিপাইনছ আদিয়েও এই বি আৰ আই প্ৰকল্পক লৈ উদ্বেগ প্ৰকাশ কৰে।
