বিহাৰত পুনৰ শাসনলৈ আহিল এনডিএ। আনহাতে, ধৰাশায়ী হ’ল আৰজেডি-কংগ্ৰেছৰ মহাজোঁট। কিন্তু যদি আমি ভোটৰ হাৰলৈ লক্ষ্য কৰোঁ, তেন্তে দেখা যায় যে এইবাৰৰ নিৰ্বাচনত বিজেপি আৰু জেডি (ইউ) – এই দুয়োটা দলতকৈ তেজস্বী যাদৱৰ আৰজেডি য়ে অধিক ভোট লাভ কৰিছে। তথাপি থমকি ৰব লগা হ’ল আৰজেডি।
নিৰ্বাচন আয়োগে প্ৰকাশ কৰা তথ্য অনুসিৰ, আৰজেডিৰ ভোটৰ হাৰ ২২.৯৮ শতাংশ, বিজেপিৰ ২০.০৭ শতাংশ, আৰু জেডি(ইউ)ৰ ১৯.২৭ শতাংশ। অৰ্থাৎ, এনডিএ মিত্ৰজোঁটৰ দুটা প্ৰধান দলতকৈ আৰজেডিৰ ভোটৰ হাৰ অধিক।
কোৱা হয় যে ভোটদানে গণতন্ত্ৰক শক্তিশালী কৰে। কিন্তু ভোটৰ এই পেঁচেই ৰাজনীতিৰ সমীকৰণ সলনি কৰি দিয়ে। এইবাৰৰ বিহাৰ নিৰ্বাচনে পুনৰ সেই কথাই প্ৰমাণ কৰিলে।
বিহাৰৰ ফলাফলে কৈছে যে নীতীশ কুমাৰৰ নেতৃত্বাধীন এনডিএ দুশৰো অধিক আসনত আগবাঢ়ি আছে। ইফালে, তেজস্বীৰ নেতৃত্বাধীন মহাগঠবন্ধনে ৪০ৰ সীমাও অতিক্ৰম কৰিব পৰা নাই। আৰজেডি, বামপন্থী আৰু কংগ্ৰেছ – সকলোৰে একেই দশা। বিশেষকৈ কংগ্ৰেছৰ দুৰৱস্থা অতি বেছি।
বিহাৰত এনডিএৰ জয়ৰ ফলাফল স্পষ্ট হোৱাৰ লগে লগে পৰৱৰ্তী বিহাৰ চৰকাৰৰ মুৰব্বী কোন হ’ব, তাক লৈ জল্পনা-কল্পনা আৰম্ভ হৈছিল। অৱশ্যে এনডিএ মিত্ৰজোঁটে নীতীশ কুমাৰক আগত ৰাখিয়েই যুঁজ দিছিল, কিন্তু সুকীয়াকৈ কাৰো নাম মুখ্যমন্ত্ৰী হিচাপে ঘোষণা কৰা হোৱা নাছিল। অৱশ্যে, ফলাফলৰ পিছত প্ৰধানমন্ত্ৰী নৰেন্দ্ৰ মোদী আৰু অমিত শ্বাহৰ বক্তব্যত বাৰে বাৰে নীতীশ কুমাৰৰ নাম উত্থাপন হৈ আহিছে।
উল্লেখ্য যে বিজেপি আৰু জেডিইউৰ লগতে এনডিএ মিত্ৰজোঁটত থকা এলজেপি আৰু হাম দলেও এইবাৰৰ নিৰ্বাচনত যথেষ্ট ভাল ফল দেখুৱাইছে। সেয়েহে অনুমান কৰা হৈছে যে মুখ্যমন্ত্ৰী নিৰ্বাচনত এই দুয়োটা দলেও ডাঙৰ ভূমিকা ল’ব পাৰে।
