কেইবাজনো অভিজ্ঞ খেলুৱৈৰ অনুপস্থিতিত খেলপথাৰত নমা ভাৰতীয় ক্ৰিকেট দলে আজি প্ৰাথমিক বিপৰ্যয় অতিক্ৰম কৰি নিউজিলেণ্ডৰ বিৰুদ্ধে প্ৰথম টেষ্টৰ প্ৰথম দিনা সবল স্থিতি লাভ কৰিছে।
কানপুৰৰ বেটিং সহায়ক উইকেটত টছত জয়ী হৈ প্ৰথমে বেটিং কৰাৰ সিদ্ধান্ত লয় ভাৰতীয় অধিনায়ক আজিংক্যা ৰাহানেই। ৰাহানেই এই সিদ্ধান্তক সঠিক বুলি প্ৰমাণ কৰি ভাৰতে প্ৰথম দিনাই চালকৰ আসনত উপৱিষ্ট হৈছে।
অৱশ্যে দলৰ আৰম্ভণি সফল নাছিল। নিয়মীয়া অপেনাৰদ্বয় ৰোহিত-ৰাহুলৰ অনুপস্থিতিত ইনিংছ আৰম্ভ কৰা মায়াংক আগৰৱাল আৰু শুভমন গিলে প্ৰথম উইকেটত ২১ ৰান যোগ দিওঁতেই ব্যক্তিগত ১৩ ৰানত কাইল জেমিচনৰ চিকাৰ হয় আগৰৱাল।
তাৰ পাছত সহ অধিনায়ক পূজাৰাই আনজন অপেনাৰ গিলৰ সৈতে ইনিংছ ৮২ ৰানলৈ আগবঢ়াই নিয়ে। টেষ্টত নিজৰ সুন্দৰ প্ৰদৰ্শনৰ ধাৰাবাহিকতা অক্ষুন্ন ৰাখি গিলে আজি আন এটা অৰ্ধশতকীয় ইনিংছ দলক উপহাৰ দিয়ে। ৫২ ৰানৰ এটা দৰ্শনীয় ইনিংছ খেলি গিল জেমিচনৰ চিকাৰ হয়।
দলীয় স্ক’ৰ ১০৬ ত ছাউদীৰ বলত পূজাৰাই বিদায় লোৱাৰ পিছত আজি টেষ্ট অভিষেক ঘটোৱা শ্ৰেয়স আয়াৰ আৰু অধিনায়ক ৰাহানেই চতুৰ্থ উইকেটত ৩৯ ৰান যোগ দিয়ে। ৰাহানেৰ বেটৰ পৰা ৩৫ ৰান।
অৱশ্যে তাৰ পাছত দলীয় ইনিংছত আৰু কোনো আঘাত হানিবলৈ নিদিলে আয়াৰ আৰু জাদেজাই। দুয়ো পঞ্চম উইকেটত অপৰাজিত ১১৩ ৰান যোগ দিছে। প্ৰথম দিনৰ খেল সমাপ্তিৰ সময়ত আয়াৰে ৭৫ ৰান আৰু জাদেজাই ৫০ ৰান সংগ্ৰহ কৰি বেটিং কৰি আছে।
এতিয়াও ছয়টা উইকেট হাতত থকা অৱস্থাত ভাৰতে এক শক্তিশালী ইনিংছ থিয় কৰোৱাৰ সম্ভাৱনা আছে।
নিউজিলেণ্ডৰ হৈ জেমিচনে ৩ টা আৰু ছাউদীয়ে এটা উইকেট লাভ কৰিছে।
উল্লেখ্য যে ভাৰতীয় দলৰ ৩০৩ তম টেষ্ট খেলুৱৈ হিচাপে অভিষেক ঘটাইছে শ্ৰেয়স আয়াৰে। খেল আৰম্ভ হোৱাৰ পূৰ্বে কিংবদন্তী ক্ৰিকেটাৰ সুনীল গাভাস্কাৰৰ হাতৰ পৰা টেষ্ট কেপ লাভ কৰে আয়াৰে।
