শিলচৰত এখন দলীয় সভাত অংশগ্রহণ কৰি বিজেপি দলৰ ৰাষ্ট্রীয় সভাপতি জে পি নাড্ডা ডাঙৰীয়াই অসমৰ ৬ জনগোষ্ঠীৰ জনজাতিকৰণ কৰিলো বুলি কৰা মন্তব্যৰ পাছতে তেওঁক উভটি ধৰিছে প্ৰদেশ কংগ্ৰেছে।
নৰ্থ ইষ্ট নাওলৈ প্ৰেৰণ কৰা এক বিবৃত্তিত প্ৰদেশ কংগ্ৰেছৰ মুখপাত্ৰ ঋতুপৰ্ণ কোঁৱৰে কয় ‘এয়া যে নাড্ডাই চুড়ান্ত মিথ্যাচাৰৰ আশ্রয় ল’লে তাক প্ৰদেশ কংগ্ৰেছ কমিটিয়ে তীব্র ধিক্কাৰ জনাইছো আৰু ই গোটেই জনগোষ্ঠীকেইটাৰ লগতে সমগ্র অসমবাসীৰ প্ৰতি এক অপমান বুলি গণ্য কৰিছোঁ।‘
‘নাড্ডা ডাঙৰীয়া শাসকীয় দলটোৰ ৰাষ্ট্রীয় সভাপতি, তেখেত কোনো যদু-মধু নহয়। গতিকে তেনে এজন ব্যক্তিৰ মুখত এনে মিথ্যাচাৰৰ অৰ্থই হৈছে তেওঁলোক একো একোজন গোকাট মিছলীয়া আৰু প্ৰতাৰক।‘ কোঁৱৰে লগতে কয়।
আচলতে প্ৰধানমন্ত্ৰীকে ধৰি বিজেপি কেন্দ্রীয় নেতৃত্বৰ অসমলৈ আহি মিছা কোৱা আৰু ভুৱা প্ৰতিশ্ৰুতি দিয়াটো এক অভ্যাসত পৰিণত হৈছে বুলি দাবী কৰি কোঁৱৰে লগতে কয় ‘জে পি নাড্ডা মাথো এইবাৰ নতুনকৈ সংযোজন হৈছে। পূর্বে প্ৰধানমন্ত্ৰী মোডী ডাঙৰীয়াই কৈছিল যে ক্ষমতালৈ আহিলে ১৬ মে’ৰ পিছত সকলো বাংলাদেশীয়ে টালি-টোপোলা বান্ধিব লাগিব। গৃহমন্ত্রী অমিত শ্বাহে কৈছিল যে দাঢ়ি-কমা নকটাকৈ অসম চুক্তিৰ ছয় নং দফাৰ পৰামর্শদাতা কমিটিৰ পৰামর্শসমূহ এসপ্তাহৰ ভিতৰতেই ৰুপায়ণ কৰিব।‘
‘ঠিক তেনেদৰে কেন্দ্রীয় পথ-পৰিবহন মন্ত্রী নীতিন গাডকাৰীয়ে ২০১৬ চনত ব্ৰহ্মপুত্ৰ খনন কৰি ইয়াৰ দুয়োপাৰে express highway নিৰ্মাণ কৰিবলৈ ১ লাখ কোটি টকা বিনিয়োগ কৰিব। লগতে যোৰহাট-মাজুলী সংযোগী দলঙৰ কথা আছেই। কিন্তু, এতিয়ালৈকে সকলো ফুটুকাৰ ফেন। বাস্তৱত এইসমূহ প্ৰতিশ্ৰুতি বৰ্তমানলৈকে চুড়ান্ত মিথ্যাচাৰ আৰু প্ৰতাৰণাৰ বাদে যে অন্য একো নহয় সেইয়া ইতিমধ্যেই প্ৰমাণ হৈছে।‘ কোঁৱৰে লগতে কয়।
ইমানৰ পাচতো বিজেপি দলৰ ৰাষ্ট্রীয় নেতা-মন্ত্রীয়ে নিৰ্লজ্জৰ দৰে নিৰ্বাচন অহাৰ লগে লগে অসমবাসীৰ সন্মুখত পুনৰ চুড়ান্ত মিথ্যা ক’বলৈ এৰা নাই বুলি কোঁৱৰে বিজ্ঞপ্তিত উল্লেখ কৰে।
বিজেপি দলৰ ৰাষ্ট্রীয় নেতৃত্বক প্ৰদেশ কংগ্ৰেছ কমিটিয়ে সোঁৱৰাই দি কোঁৱৰে কয় ‘ৰাজ্যখনৰ কেইজনমান বিজেপি দলৰ নেতা-মন্ত্রীয়ে আপোনালোকৰ সকলো মিথ্যাচাৰ আৰু প্ৰতাৰণা পদলেহনকাৰীৰ দৰে মানি ল’লে বুলিয়েই সমগ্র অসমবাসী ৰাইজ পদলেহনকাৰী নহয়। অনাগত দিনবোৰত অসমবাসী ৰাইজৰ আৱেগ, অনুভূতি আৰু স্বাভিমানক লৈ এনেদৰে মিছা কথাৰে চুড়ান্ত ভেঙুচালি নকৰিবলৈ প্ৰদেশ কংগ্ৰেছে কঠোৰভাৱে বিজেপি নেতা-মন্ত্রীসকলক সকীয়নি প্ৰদান কৰিছো।‘
তেওঁ আৰু কয় ‘লগতে এই সকলো ভুৱা প্ৰতিশ্ৰুতি ৰূপায়ণ কৰিব নোৱাৰাৰ বাবে আৰু আজিৰ মিথ্যাচাৰৰ বাবে বিজেপি দলৰ ৰাষ্ট্রীয় সভাপতি গৰাকীক অসমবাসীৰ ওচৰত ক্ষমা প্ৰাৰ্থনা বিচাৰিবলৈ আহ্বান জনাইছো।‘
