দেশৰ ৩০ গৰাকী মুখ্যমন্ত্ৰীৰ ভিতৰত ২৯ গৰাকী মুখ্যমন্ত্ৰী হৈছে কোটিপতি। এছ’ছিয়েচন ফ’ৰ ডেক্ৰেটিক ৰিফ’ৰ্মছ(চমুকৈ ADR)ৰ এক সমীক্ষা প্ৰকাশ পাইছে এই তথ্য। ADRৰে প্ৰকাশ কৰা মতে দেশৰ আটাইতকৈ ধনী মুখ্যমন্ত্ৰীগৰাকী হৈছে অন্ধ্ৰ প্ৰদেশৰ মুখ্যমন্ত্ৰী জগনমোহন ৰেড্ডী। ৰেড্ডীৰ সম্পত্তিৰ পৰিমাণ হৈছে ৫১০.৩৩ কোটি টকা।
ইফালে দেশৰ দৰিদ্ৰতম মুখ্যমন্ত্ৰীগৰাকী হৈছে পশ্চিমবংগৰ মুখ্যমন্ত্ৰী মমতা বেনাৰ্জী। মমতা বেনাৰ্জীৰ সম্পত্তিৰ পৰিমাণ হৈছে মাত্ৰ ১৫ লাখ টকা।
আনহাতে, ৰেড্ডীৰ পিছতে দেশৰ দ্বিতীয় ধনী মুখ্যমন্ত্ৰীগৰাকী হৈছে অৰুণাচল প্ৰদেশৰ মুখ্যমন্ত্ৰী প্ৰেমা খাণ্ডু। পাহাৰীয়া ৰাজ্যখনৰ মুখ্যমন্ত্ৰী খাণ্ডুৰ সম্পত্তিৰ পৰিমাণ হৈছে ১৬৩.৫০ কোটি টকা। ইয়াৰ পাছতে ৬৩.৮৭ কোটি টকাৰে ওড়িষাৰ মুখ্যমন্ত্ৰী নবীন পাটনায়ক তৃতীয় স্থানত আছে। চতুৰ্থ আৰু পঞ্চম স্থানত আছে ক্ৰমে নাগালেণ্ডৰ মুখ্যমন্ত্ৰী নেইফিঅ’ ৰিয়’ আৰু পডুচেৰীৰ মুখ্যমন্ত্ৰী এন ৰঙ্গাস্বামী। তেওঁলোকৰ সম্পত্তিৰ পৰিমাণ হৈছে ক্ৰমে ৪৬.৯৫ কোটি আৰু ৩৮.৩৯ কোটি টকা।
ধনী মুখ্যমন্ত্ৰী তালিকাত অসমৰ মুখ্যমন্ত্ৰী ডঃ হিমন্ত বিশ্ব শৰ্মাৰ স্থান হৈছে অষ্টম। ডঃ শৰ্মাৰ সম্পত্তিৰ পৰিমাণ ১৭.২৭ কোটি টকা। মুখ্যমন্ত্ৰী ডঃ শৰ্মাৰ আগত ষষ্ঠ আৰু সপ্তম স্থানত আছে ২৩.৫৫ কোটি টকাৰে তেলেংগানাৰ মুখ্যমন্ত্ৰী কে চন্দ্ৰশেখৰ ৰাও আৰু ২৩.০৫ কোটি টকাৰে ছট্টিশগড়ৰ মুখ্যমন্ত্ৰী ভূপেশ বাঘেল।
ADRৰ তথ্যৰ মতে দেশৰ মাত্ৰ এগৰাকী মুখ্যমন্ত্ৰীহে লাখপতি। মুখ্যমন্ত্ৰীসকলৰ গড় সম্পত্তিৰ পৰিমাণ হৈছে ৩৩.৯৬ কোটি টকা।
ইফালে দেশৰ ১৩ গৰাকী মুখ্যমন্ত্ৰীৰ বিৰুদ্ধে গুৰুতৰ অপৰাধমূলক গোচৰ আছে। অৰ্থাৎ এডিআৰৰ প্ৰতিবেদন অনুসৰি ১৩ গৰাকী মুখ্যমন্ত্ৰীয়ে শপতনামাত গুৰুতৰ অপৰাধমূলক গোচৰ থকাৰ তথ্য সন্নিৱিষ্ট কৰিছে। এই গোচৰসমূহ হৈছে ক্ৰমে হত্যা, হত্যাৰ চেষ্টা, অপহৰণ আদি গুৰুতৰ অপৰাধমূলক গোচৰ।
