হাস্পাতলত জীৱনৰে যুঁজি অৱশেষত মৃত্যুৰ ওচৰত হাৰ মানিলে ৰাজস্থানৰ যুৱ চিত্ৰ সাংবাদিক অভিষেক ছোনীয়ে।
প্ৰায় দুসপ্তাহ পূৰ্বে তেওঁৰ মহিলা সহকৰ্মীৰ শ্লীলতা হানি ৰোধ কৰিবলৈ গৈ দুষ্কৃতিকাৰীৰ হাতত বেয়াকৈ প্ৰহৃত হৈছিল সাংবাদিকগৰাকী।
বিগত কেইদিন ধৰি হাস্পাতলত চিকিৎসাধীন হৈ থকাৰ পাছত অৱশেষত সাংবাদিকগৰাকীয়ে মৃত্যুক আকোৱালি ল’বলগীয়া হয়।
ঘটনা অনুসৰি, ঘটনাৰ দিনা নিশা চাৰে এঘাৰটা বজাত জয়পুৰৰ এখন ধাবাত নৈশভোজ গ্ৰহণ কৰি সাংবাদিক দুগৰাকী উভতিছিল। তেনেতেই বাইকত অহা তিনিজন দুষ্কৃতিকাৰীয়ে পথ আগুচি ধৰে আৰু অভিষেকৰ মহিলা সহকৰ্মীগৰাকীক উদ্দেশ্যি বেয়া মন্তব্য কৰে।
অভিষেকে এই ঘটনাৰ প্ৰতিবাদ কৰাত দুই পক্ষৰ মাজত উত্তপ্ত বাক-বিতণ্ডা ঘটে। ইয়াৰ মাজতে দুষ্কৃতিকাৰীসকলে মহিলা সাংবাদিকগৰাকীৰ শ্লীলতাহানিৰ চেষ্টা কৰাত অভিষেকে বাধা দিয়াৰ চেষ্টা কৰে।
দুষ্কৃতিকাৰীৰ আক্ৰমণত ২৭বছৰীয়া যুৱ সাংবাদিক অভিষেক ছোনী গুৰুতৰভাৱে আহত হয়। যন্ত্ৰণাত কাতৰ হৈ পথৰ কাষত পৰি ৰয়। পাছত তেওঁক এখন স্থানীয় হাস্পাতলত ভৰ্তি কৰা হয়। কিন্তু অৱশেষত বুধবাৰে হাস্পাতলত তেওঁৰ মৃত্যু হয়।
জয়পুৰ আৰক্ষীয়ে ঘটনাৰ তদন্ত চলাই আছে যদিও কোনো দুষ্কৃতিকাৰীক গ্ৰেপ্তাৰ কৰিবলৈ সক্ষম হোৱা নাই।