দিল্লীৰ শেহতীয়া বিস্ফোৰণৰ ঘটনাই দেশজুৰি চাঞ্চল্যৰ সৃষ্টি কৰাৰ মাজতে সন্ত্ৰাসবাদী সংগঠন জইছ-ই-মহম্মদৰ (JeM) মহিলা ব্ৰিগেডৰ ভাৰতীয় মুৰব্বীক চিনাক্ত কৰিছে আৰক্ষীয়ে। বিশেষ সূত্ৰ অনুসৰি, এই মহিলা মুৰব্বীগৰাকী এগৰাকী চিকিৎসক, যাক ইতিমধ্যে জম্মু-কাশ্মীৰ আৰক্ষীয়ে গ্ৰেপ্তাৰ কৰিছিল যদিও তেওঁৰ পৰিচয় পোহৰলৈ আহিছে এতিয়াহে।
ঘটনাটোৰ সূত্ৰপাত হৈছিল ১৯ অক্টোবৰত। কাশ্মীৰত হিংসা বিয়পাবলৈ এক বিশেষ গোট সক্ৰিয় হৈ থকাৰ তথ্য লাভ কৰে জম্মু-কাশ্মীৰ আৰক্ষীয়ে। শ্ৰীনগৰৰ দেৱালত জইছ-ই-মহম্মদৰ সমৰ্থনত পোষ্টাৰ ওলমোৱাৰ অভিযোগত আৰক্ষীয়ে গ্ৰেপ্তাৰ কৰে চিকিৎসক আদিল আহমেদ ৰাডাৰক।
আদিলক জেৰা কৰাৰ পিছত আৰক্ষীয়ে আন এজন চিকিৎসকৰ সন্ধান পায় – তেওঁ হ’ল মুজাম্মিল আহমেদ। পুলৱামাৰ মুজাম্মিলে হাৰিয়ানাৰ ফৰিদাবাদৰ এখন চিকিৎসালয়ত কাম কৰি আছিল। অভিযোগ অনুসৰি, আদিলে তেওঁৰ সহায়ত কাশ্মীৰলৈ ৩৬০ কেজি বিস্ফোৰক আৰু অস্ত্ৰ-শস্ত্ৰ আনিছিল। সোমবাৰে ফৰিদাবাদত মুজাম্মিল থকা ঘৰটোৰ পৰাই এই বিপুল পৰিমাণৰ বিস্ফোৰক বা R D X উদ্ধাৰ কৰা হয়।
মুজাম্মিলৰ লগতে আৰক্ষীয়ে আন এগৰাকী মহিলা চিকিৎসককো গ্ৰেপ্তাৰ কৰে, যাৰ নাম শ্বাহীন শ্বাহিদ।
সূত্ৰ অনুসৰি, এই শ্বাহীন শ্বাহিদেই হৈছে জইছ-ই-মহম্মদৰ মহিলা ব্ৰিগেড ‘জামাত-উল-মমিনাত’ৰ ভাৰতীয় শাখাৰ মুৰব্বী। এই মহিলা ব্ৰিগেড গঠনৰ কথা জইছ-ই-মহম্মদে প্ৰায় এমাহ পূৰ্বে ঘোষণা কৰিছিল।
উল্লেখযোগ্য যে জইছ-ই-মহম্মদৰ মূল মহিলা ব্ৰিগেডৰ মুৰব্বী হৈছে সন্ত্ৰাসবাদী মাছুদ আজহাৰৰ ভগ্নী। সেয়েহে, আৰক্ষীয়ে শ্বাহীনৰ সৈতে আজহাৰৰ পৰিয়ালৰ সম্পৰ্ক নুই কৰিব পৰা নাই।
ফৰিদাবাদত গ্ৰেপ্তাৰ হোৱা চিকিৎসক মুজাম্মিল আহমেদৰ সৈতে পুলৱামাৰ আন এজন চিকিৎসক উমৰ নবীৰ সম্পৰ্ক আছে। আৰক্ষীৰ সূত্ৰ মতে, দিল্লীত ‘বিস্ফোৰণ হোৱা’ গাড়ীখনত উমৰ নবী আছিল আৰু তেওঁৰ ছবি চিচিটিভি ফুটেজতো বন্দী হৈছে।
সেয়েহে, আৰক্ষীয়ে এতিয়া এই বিষয়টো লৈ চিন্তিত হৈ পৰিছে যে মুজাম্মিলক গ্ৰেপ্তাৰ কৰাৰ পিছত উমৰ নবী আৰু তেওঁৰ সহযোগীসকলে আত্মঘাতী আক্ৰমণৰ পৰিকল্পনা কৰিছিল নেকি। এই ফৰিদাবাদৰ “লিংক” দিল্লী বিস্ফোৰণৰ আঁৰত থকাৰ সম্ভাৱনীয়তাই তদন্তৰ গতি সলনি কৰিছে।
