সন্ত্ৰাসবাদীৰ বিৰুদ্ধে চলি থকা নিৰন্তৰ অভিযানৰ মাজতে আজি জম্মু-কাশ্মীৰৰ কুলগামত নিৰাপত্তা বাহিনীয়ে উৎখাত কৰিছে সন্ত্ৰাসবাদী সংগঠন জইছ-ই-মহম্মদৰ এটা ঘাটি। এই অভিযানত নিৰাপত্তা বাহিনীয়ে সংগঠনটোৰ ৬ গৰাকী সদস্যক গ্ৰেপ্তাৰ কৰে। লগতে অভিযানকাৰী দলটোৱে অস্ত্ৰ-শস্ত্ৰ আৰু গোলাবাৰুদৰ বিশাল ভাণ্ডাৰো উদ্ধাৰ কৰিছে।
কুলগামৰ মিৰহামা আৰু ডি এইচ পোৰাত কুলগাম আৰক্ষী আৰু ৰাষ্ট্ৰীয় ৰাইফলছৰ এটা দলে এই যুটীয়া অভিযান চলাইছিল। দলটোৱে ঘাটিটোৰ পৰা ৮ টা মেগজিন আৰু ৪৪৬ জাঁই এম-৪ ৰাইফলৰ গুলী, এটা পিষ্টল মেগজিন আৰু ১৮ টা পিষ্টল গুলী উদ্ধাৰ কৰে।
তদুপৰি উদ্ধাৰ হোৱা বিস্ফোৰক সামগ্ৰীৰ ভিতৰত চাৰিটা ইউ বি জি এল শ্বেল, ৩০টা এ কে ৰাউণ্ড, ইনছাছ আৰু এ কে ৰাইফলৰ এটাকৈ মেগজিনৰ লগতে চাৰিটা ৱাকি-টকি চেট আৰু এটা বেতাঁৰ চেট আছে বুলি নিৰাপত্তা বাহিনীয়ে সদৰী কৰিছে।
Kulgam, J&K | Security forces bust a Jaish-e-Mohammad module with the arrest of six persons and recovery of a huge cache of arms and ammunition pic.twitter.com/pAWGpDQTLl
— ANI (@ANI) February 3, 2023
জম্মু-কাশ্মীৰ আৰক্ষীৰ এগৰাকী মুখপাত্ৰই সংবাদ মাধ্যমৰ আগত উল্লেখ কৰা মতে, প্ৰাথমিক তদন্তত ধৃত ছয় ব্যক্তি বিভিন্ন ছ’চিয়েল মিডিয়া প্লেটফৰ্মৰ জৰিয়তে সীমান্তৰ সিপাৰে সন্ত্ৰাসবাদী সংগঠনটোৰ হেণ্ডলাৰৰ সৈতে যোগাযোগত আছিল বুলি জানিব পৰা গৈছে।
ধৃত ছয় সদস্য পঞ্চায়তী ৰাজ প্ৰতিষ্ঠানৰ সদস্য আৰু সংখ্যালঘু জনগোষ্ঠীৰ ওপৰত বোমা আক্ৰমণ, সাধাৰণ নাগৰিকক ভয় দেখুৱাই গুলীচালনা কৰা আদি কূটাঘাতমূলক কাৰ্যত জড়িত থকাৰ অভিযোগ উত্থাপন হৈছে।
