অসমৰ গোৱালপাৰা জিলাৰ জলেশ্বৰত শেহতীয়াকৈ ব্ৰহ্মপুত্ৰ নদীত পানীৰ স্তৰ বৃদ্ধি পোৱাৰ লগে লগে গৰাখহনীয়াই এক ভয়াৱহ ৰূপ ধাৰণ কৰিছে। এই তীব্ৰ খহনীয়াই অঞ্চলটোৰ বিস্তীৰ্ণ কৃষিভূমিৰ লগতে স্থানীয় সম্প্ৰদায় আৰু আন্তঃগাঁথনিৰ প্ৰতি চৰম ভাবুকি কঢ়িয়াই আনিছে। জলেশ্বৰ ফেৰী ঘাট, সাতভেন্দী আৰু তেকীমাৰীকে ধৰি নদীপৰীয়া কেইবাটাও অঞ্চলত খহনীয়াই ভয়ংকৰ ৰূপ লৈছে আৰু প্ৰতিদিনে নদীৰ বুকুত জাহ গৈছে বৃহৎ পৰিমাণৰ কৃষিভূমি। এই পৰিস্থিতিয়ে জীৱিকাৰ বাবে কেৱল কৃষিৰ ওপৰত নিৰ্ভৰশীল বহু পৰিয়ালক গভীৰ অনিশ্চয়তা আৰু আৰ্থিক সংকটৰ মাজলৈ ঠেলি দিছে।
এই সমগ্ৰ পৰিস্থিতিৰ মাজত আটাইতকৈ উদ্বেগৰ বিষয় হৈ পৰিছে জলেশ্বৰৰ ঐতিহাসিক বজাৰখন। বিগত এক শতিকাতকৈয়ো অধিক কাল ধৰি সমগ্ৰ অঞ্চলটোৰ প্ৰধান বাণিজ্যিক কেন্দ্ৰ হিচাপে পৰিচিত এই বজাৰখন এতিয়া ব্ৰহ্মপুত্ৰৰ ক্ৰমাগত খহনীয়াৰ গ্ৰাসত পৰাৰ উপক্ৰম হৈছে। স্থানীয় ৰাইজে আশংকা প্ৰকাশ কৰিছে যে যদিহে অতি সোনকালে খহনীয়া প্ৰতিৰোধৰ বাবে ফলপ্ৰসূ ব্যৱস্থা গ্ৰহণ কৰা নহয়, তেন্তে অচিৰেই এই ঐতিহাসিক বজাৰখন নদীৰ বুকুত চিৰদিনৰ বাবে বিলীন হৈ যাব। ৰাইজে সতৰ্ক কৰি দিছে যে এই গৰাখহনীয়া অব্যাহত থাকিলে অঞ্চলটোত এক বৃহৎ অৰ্থনৈতিক আৰু সামাজিক বিপর্যয়ৰ সৃষ্টি হ’ব।
ইপিনে, খহনীয়া সমস্যাক লৈ প্ৰশাসনে কোনো কাৰ্যকৰী পদক্ষেপ গ্ৰহণ নকৰাৰ অভিযোগ তুলি স্থানীয় ৰাইজে তীব্ৰ ক্ষোভ উজাৰিছে। বিশেষকৈ স্থানীয় বিধায়ক আফতাব উদ্দিন মোল্লাৰ বিৰুদ্ধে ৰাইজে তীব্ৰ অসন্তুষ্টি প্ৰকাশ কৰিছে। ক্ষতিগ্ৰস্ত অঞ্চলসমূহ সুৰক্ষিত কৰাৰ ক্ষেত্ৰত বিধায়কগৰাকী সম্পূৰ্ণৰূপে ব্যৰ্থ হোৱা বুলি অভিযোগ উত্থাপন কৰি ক্ষুব্ধ ৰাইজে প্ৰতিবাদ সাব্যস্ত কৰিছে। উপায়ন্তৰ হৈ ক্ষতিগ্ৰস্ত পৰিয়ালসমূহে বিধায়কগৰাকীৰ লগতে সংশ্লিষ্ট চৰকাৰী বিভাগসমূহক ঐতিহাসিক বজাৰখন আৰু বিস্তীৰ্ণ কৃষিভূমিক সুৰক্ষা প্ৰদানৰ বাবে শীঘ্ৰে বিজ্ঞানসন্মত খহনীয়া প্ৰতিৰোধী ব্যৱস্থা গ্ৰহণ কৰিবলৈ আহ্বান জনাইছে।
আগন্তুক বাৰিষা কাল সমাগত হোৱাৰ লগতে ব্ৰহ্মপুত্ৰৰ জলপৃষ্ঠ ক্ৰমান্বয়ে বৃদ্ধি পাই থকাৰ পৰিপ্ৰেক্ষিতত অঞ্চলটোৰ পৰিস্থিতি অধিক শোচনীয় হৈ পৰাৰ আশংকা কৰা হৈছে। এই সম্ভাব্য ধ্বংসলীলা ৰোধ কৰাৰ বাবে চৰকাৰ আৰু প্ৰশাসনৰ সময়োচিত তথা কাৰ্যকৰী পদক্ষেপৰ ওপৰতেই এতিয়া জলেশ্বৰবাসীৰ ভৱিষ্যত আৰু সুৰক্ষা নিৰ্ভৰ কৰিছে। বৰ্তমান ৰাইজে চৰকাৰৰ তৎকালীন সঁহাৰিলৈ আশাৰে বাট চাইছে।
