সন্ত্ৰাস জৰ্জৰিত কাশ্মীৰত দেশ তথা জনসাধাৰণৰ সেৱাত নিয়োজিত কাশ্মীৰ আৰক্ষীৰ এগৰাকী পৰাক্ৰমী জোৱান বিন্দাছ। নিজৰ জীৱনকো তুচ্ছজ্ঞান কৰি দেশৰ সেৱাত শ্বহীদ হোৱা এই ‘বিন্দাছ’ নামেৰে জনপ্ৰিয় আৰক্ষী জোৱানগৰাকীৰ প্ৰকৃত নাম আছিল তেওঁ মুদাছিৰ আহমেদ শ্বেখ।
গণৰাজ্য দিৱসৰ প্ৰাকক্ষণত সেই শ্বহীদ জোৱান গৰাকীক মৰণোত্তৰভাৱে শৌৰ্য চক্ৰৰে সন্মানিত কৰা হয়। যোৱা বৰ্ষৰ ২৫ মে’ত উত্তৰ কাশ্মীৰ জিলাৰ ক্ৰেৰীত এক সন্ত্ৰাসবাদ বিৰোধী অভিযানৰ সময়তে শ্বহীদ হৈছিল মুদাছিৰ আহমেদ শ্বেখ।
সেনাৰ সৈতে যৌথ অভিযানত নিজৰ প্ৰাণ আহুতি দিয়াৰ পূৰ্বে মুদাছিৰ ওৰফে বিন্দাছে হত্যা কৰিছিল জইছ-ঈ-মহম্মদৰ তিনিগৰাকী সন্ত্ৰাসবাদীক। এই অতুলনীয় সাহসৰ বাবে দেশৰ তৃতীয় সৰ্বোচ্চ বীৰত্ব বঁটা শৌৰ্য্য চক্ৰৰে সন্মানিত কৰা হৈছে জোৱানগৰাকীক।
শ্বেখৰ এই বীৰত্বৰ বিষয়ে দেশজুৰি চৰ্চিত হৈছিল। ৫ অক্টোবৰত ৩৭০ অনুচ্ছেদ বাতিল হোৱাৰ পিছত জম্মু-কাশ্মীৰ ভ্ৰমণৰ সময়ৰ প্ৰথমবাৰৰ বাবে শ্বেখৰ পৰিয়ালৰ লোকক সাক্ষাৎ কৰিছিল কেন্দ্ৰীয় গৃহমন্ত্ৰী অমিত শ্বাহে। শ্বাহে লগতে শ্বেখৰ কবৰস্থানলৈ গৈ শ্ৰদ্ধাঞ্জলি জ্ঞাপন কৰিছিল।
