বিহাৰ বিধানসভা নিৰ্বাচনত গেৰুৱা ধুমুহাই উৰুৱাই নিলে বিৰোধীক। প্ৰাক্তন নিৰ্বাচন ৰণ কুশলী প্ৰশান্ত কিশোৰৰ দলটোৱে একাউণ্টো খুলিব নোৱাৰিলে। নিৰ্বাচনত শোচনীয় পৰাজয়ৰ পিছত জন সুৰজে নীতিশ-বিজেপি জোঁটৰ বিৰুদ্ধে বিস্ফোৰক অভিযোগ উত্থাপন কৰিছে।
শনিবাৰে সংবাদ মাধ্যমৰ সৈতে হোৱা এক সাক্ষাৎকাৰত জন সুৰজ দলৰ ৰাষ্ট্ৰীয় সভাপতি উদয় সিঙে দাবী কৰে যে, “বিহাৰ নিৰ্বাচনত বিশ্ব বেংকৰ ১৪ হাজাৰ কোটি টকা ব্যৱহাৰ কৰা হৈছিল”!
প্ৰশান্ত কিশোৰৰ দলটোৱে অভিযোগ কৰে যে শাসকীয় মিত্ৰজোঁটে সেই ধন দান-বৰঙণিত খৰচ কৰিছিল। উদয় সিঙে লগতে কয়, “জুনৰ পৰা নিৰ্বাচন ঘোষণা পৰ্যন্ত নীতিশ কুমাৰ চৰকাৰে ৰাইজৰ ধনেৰে ৰাইজৰ ভোট “ক্ৰয়” কৰিবলৈ ৪০ হাজাৰ কোটি টকা খৰচ কৰিছে।”
উল্লেখযোগ্য যে ২০২৫ চনৰ বিধানসভা নিৰ্বাচনৰ ঠিক আগতে প্ৰায় ১.৫ কোটি মহিলাৰ একাউণ্টত ১০ হাজাৰ টকাকৈ দি নীতিশ কুমাৰে ‘খেল’ ঘুৰাইছে। তেজস্বীৰ মৌখিক প্ৰতিশ্ৰুতিৰ সলনি বিহাৰৰ মহিলা আৰু ৰাইজে হাতত ‘খমখমীয়া’ টকা বাছি লৈছিল।
মুখ্যমন্ত্ৰীৰ মহিলা ৰোজগাৰ যোজনাৰ অধীনত নীতিশৰ এই ‘দান’ বাস্তৱিকতে বিহাৰ নিৰ্বাচনত ‘ওস্তাদৰ মাৰ শেষ ৰাতি’ বুলি প্ৰমাণিত হৈছে। এই কথাটোক উদাহৰণ হিচাপে লৈ জন সুৰজে কয়, “নিৰ্বাচনৰ এদিন আগতেও আৰ্হি আচৰণ বিধি উলংঘা কৰি মানুহক ধন দিয়া হৈছে! এইটো সম্ভৱতঃ প্ৰথমবাৰৰ বাবে।”
বিহাৰৰ ৰাইজৰ এই ৰায়দানৰ কাৰণ হৈছে ‘জংগলৰাজ’ ঘূৰি অহাৰ আশংকা।
জন সুৰজ দলৰ ৰাষ্ট্ৰীয় সভাপতি উদয় সিঙেও দাবী কৰে যে, “জংগল ৰাজ ঘূৰি অহাৰ ভয়ত জন সুৰজৰ ভোটাৰে এন ডি এক ভোট দিছিল”।
উদয় সিঙৰ সহযোগী পৱন ভাৰ্মাইও একে অভিযোগ উত্থাপন কৰি কয় যে বিশ্ব বেংকৰ ২১ হাজাৰ কোটি টকাৰ পুঁজিৰ পৰা ধন ডাইভাৰ্ট কৰি বিহাৰ নিৰ্বাচনত ব্যৱহাৰ কৰা হৈছিল।
সংবাদ সংস্থাৰ আগত তেওঁ কয়, “বৰ্তমান বিহাৰত চৰকাৰী ঋণ ৪,০৬,০০০ কোটি টকা। সুত প্ৰতিদিনে ৬৩ কোটি টকা। কোষাগাৰ খালী। আমাৰ হাতত তথ্য আছে, যিটো ভুলো হ’ব পাৰে, যে ৰাজ্যৰ মহিলাক দিয়া ১০ হাজাৰ টকা বিশ্ব বেংকৰ পৰা আন কোনো প্ৰকল্পৰ বাবে অহা ২১,০০০ কোটি টকাৰ পৰা দিয়া হৈছিল। নিৰ্বাচনৰ বাবে আচৰণ বিধি জাৰি কৰাৰ এঘণ্টা আগতে ১৪ হাজাৰ কোটি টকা উলিয়াই ৰাজ্যখনৰ ১.২৫ কোটি মহিলাৰ মাজত বিতৰণ কৰা হৈছিল।”
