টকিঅ’ৰ হানেডা বিমানবন্দৰত সংঘটিত ভয়াৱহ বিমান দুৰ্ঘটনাত পাঁচজন লোকৰ মৃত্যু হোৱা বুলি নিশ্চিত কৰিছে কৰ্তৃপক্ষই।
উল্লেখ্য যে, আজি জাপান এয়াৰলাইনছৰ এখন যাত্ৰীবাহী বিমানে অৱতৰণৰ সময়তে জাপানৰ উপকূলৰক্ষী বাহিনীৰ এখন বিমানত খুন্দা মাৰিছিল।
এই সংঘৰ্ষত উপকূলৰক্ষী বাহিনীৰ বিমানখনত থকা পাঁচজন লোকৰ মৃত্যু হয়। জাপানৰ পৰিবহণ মন্ত্ৰী টেটচুও চাইটোৱে সদৰী কৰিছে এই তথ্য।
তেওঁ উল্লেখ কৰা মতে, দুৰ্ঘটনাৰ পিছতে যাত্ৰীবাহী বিমানখনত থকা ৩৭৯ জন যাত্ৰী আৰু কৰ্মচাৰীক সুৰক্ষিতভাৱে উলিয়াই অনা হৈছিল।
কিন্তু উপকূলৰক্ষী বাহিনীৰ বিমানখনৰ ছয়জন ক্ৰু সদস্যৰ ভিতৰত পাঁচজনৰ এই দুৰ্ঘটনাত মৃত্যু হয়। আনহাতে বিমানখনৰ কেপ্টেইনজনে কোনোমতে নিজৰ প্ৰাণৰক্ষা কৰে।
প্ৰকাশিত খবৰ অনুসৰি, জাপান এয়াৰলাইন্সৰ জেএএল ৫১৬ বিমানখন বিমানবন্দৰত অৱতৰণ কৰাৰ সময়তে উপকূলৰক্ষী বাহিনীৰ বিমানখনৰ সৈতে সংঘৰ্ষ হৈছিল।
এই সংঘৰ্ষত দাউদাউকৈ জ্বলি উঠিছিল জেএএল ৫১৬ বিমানখন। জুইৰ লেলিহান শিখাই বিমানখন আৱৰি ধৰাৰ লগে লগে এক আতংকময় পৰিস্থিতিৰ সৃষ্টি হৈছিল।
জাপানৰ স্থানীয় সংবাদ মাধ্যমত সম্প্ৰচাৰ হৈছে এই ভয়ানক ঘটনাৰ দৃশ্য। প্ৰকাশিত খবৰ অনুসৰি, কৰ্তৃপক্ষই ইতিমধ্যে এই ঘটনাৰ তদন্ত আৰম্ভ কৰিছে।
স্থানীয় সংবাদ মাধ্যমৰ মতে, দুৰ্ঘটনাগ্ৰস্ত বিমানখন হোকাইডোৰ পৰা উৰা মাৰিছিল আৰু হানেডা বিমানবন্দৰত অৱতৰণ কৰিছিল।
