জাপানৰ চৰকাৰ এতিয়া এক অস্বাভাৱিক সমস্যাৰ সন্মুখীন হৈছে৷ সমস্যা্যো হৈছে দেশ খনৰ যুৱক-যুৱতীসকলে পৰ্যাপ্ত সুৰাপান কৰা নাই। কোভিড মহামাৰী আৰম্ভ হোৱাৰ পৰা, দেশ খনৰ বাৰ আৰু সুৰা বিক্ৰী কৰা অন্যান্য বিপনীসমূহ যথেষ্ট ক্ষতিগ্ৰস্ত হৈছে৷
যাৰ ফলত বিশ্বৰ তৃতীয় সৰ্ববৃহৎ অৰ্থনীতিৰ দেশ খনত সুৰাৰ পৰা লাভ কৰা কৰ হ্ৰাস পাইছে। সেয়ে জাপানৰ চৰকাৰ যুৱক-যুৱতীসকলে অধিক সুৰা পান কৰাটো বিচাৰিছে৷ কিন্তু নানান কৌশল প্ৰয়োগ কৰিও এইক্ষেত্ৰত সফল হ’ব পৰা নাই চৰকাৰ৷ যুৱ সমাজক অধিক সুৰাপান কৰিবলৈ উৎসাহিত কৰাৰ বাবে নতুন উপায় বিচাৰি চৰকাৰে এটা প্ৰতিযোগিতা আৰম্ভ কৰিছে।
ৰাষ্ট্ৰীয় কৰ সংস্থাৰ তত্বাৱধান পৰিচালিত “চেক ভাইভা!” অভিযানৰ অধীনত অংশগ্ৰহণকাৰীসকলক নতুন সেৱা, প্ৰচাৰ পদ্ধতি, কৃত্ৰিম বুদ্ধিমত্তা বা মেটাভাৰ্চ ব্যৱহাৰ কৰি সুৰাৰ বিক্ৰী বৃদ্ধি কৰিব বিচৰা হৈছে৷ চৰকাৰী ৱেবছাইটত কোৱা হৈছে যে প্ৰতিযোগিতাৰ উদ্দেশ্য হৈছে “যুৱ প্ৰজন্মক সুৰাৰ প্ৰতি আকৰ্ষণ কৰা… আৰু সুৰা উদ্যোগটো পুনৰুজ্জীৱিত কৰা।” প্ৰতিযোগিতাখনত সকলো প্ৰকাৰৰ জাপানী সুৰাৰ বিষয়ে প্ৰশ্ন অন্তৰ্ভুক্ত কৰা হৈছে৷ প্ৰতিটোগিতা খনত অংশগ্ৰহণৰ বাবে নাম অন্তৰ্ভুক্ত কৰাৰ শেষ তাৰিখ ৯ 9 ছেপ্টেম্বৰ। নৱেম্বৰত টকিঅ’ত এক চূড়ান্ত প্ৰতিযোগিতাৰ আগতে অক্টোবৰত ফাইনেলিষ্টসকলক আমন্ত্ৰণ জনোৱা হ’ব। চৰকাৰৰ এনে সিদ্ধান্তৰ বিৰুদ্ধে বহুতে পৰিবাদো কৰিছে৷ এজন টুইটাৰ ব্যৱহাৰকাৰীয়ে লিখিছে” আপুনি মোৰ সৈতে ধেমালি কৰিছে নেকি?” । “সুৰাৰ পৰা আঁতৰি থকাটো এটা ভাল কথা!” আন কিছুমানে আঙুলিয়াই দিছে যে এটা চৰকাৰী সংস্থাৰ বাবে এনে কাম অনুপযুক্ত যেন লাগিছিল৷
যুৱ সকলক সুৰাপান কৰিবলৈ উৎসাহিত কৰা্ৰ কথা মানি ল’ব নোৱাৰি৷ জাপানৰ স্বাস্থ্য মন্ত্ৰালয়ে পূৰ্বে অত্যাধিক সুৰাপানৰ বিপদ সম্পৰ্কে সতৰ্ক কৰি দিছিল। যোৱা বছৰ স্বাস্থ্য মন্ত্ৰালয়ে নিজৰ ৱেবছাইটত এটা পোষ্টত, ই অত্যাধিক সুৰা পানক এক “মুখ্য সামাজিক সমস্যা” বুলি অভিহিত কৰিছিল আৰু অস্বাস্থ্যকৰ সুৰাপানৰ অভ্যাস থকা লোকসকলক সুৰাৰ সৈতে তেওঁলোকৰ সম্পৰ্ক “পুনৰ বিবেচনা” কৰিবলৈ আহ্বান জনাইছিল।
জাপানৰ চৰকাৰে প্ৰকাশ কৰা মতে দেশ খনত ৪০ ৰ পৰা ৬০ বছৰ বয়সৰ প্ৰায় ৩০ শতাংশ লোকে নিয়মীয়াকৈ সুৰাপান কৰে৷ ২০ বছৰৰ মাত্ৰ ৭.৮ শতাংশ লোকেহে সুৰাপান কৰে৷ এনেদৰে, বছৰে বছৰে সুৰাপানৰ অভ্যাস হ্ৰাস হোৱাৰ ফলত জাপানত সুৰাৰ ঘৰুৱা বজাৰ সংকুচিত হোৱাৰ লগতে অৰ্থনীতিতো প্ৰভাৱ পৰিছে৷
