সদৌ অসম লেখিকা সমাৰোহ সমিতিৰ উদ্যোগত আৰু সমাৰোহ সমিতিৰ চাপৰ শাখাৰ সহযোগত বিংশতিতম্ জাতীয় চেতনা দিৱস আৰু শ্বহীদ কনকলতা বঁটা প্ৰদান অনুষ্ঠান চাপৰত দিনজোৰা কাৰ্যসূচীৰে পালন কৰা হয় ।
উল্লেখ্য যে লেখিকা সমাৰোহ সমিতিয়ে বীৰাংগনা কনকলতা বৰুৱাৰ মৃত্যু দিৱস টি ২০০২ চনৰ পৰাই চেতনা দিৱস হিচাপে পালন কৰি আহিছে।
এই অনুষ্ঠানৰ কাৰ্যসূচী পুৱা ৯ বজাত অসম লেখিকা সমাৰোহ সমিতিৰ সভানেত্ৰী ডঃ চাৰু চহৰীয়া নাথে পতাকা উত্তোলনেৰে শুভাৰম্ভনি কৰে।আৰু ইয়াৰ লগে লগে একাধিকক্ৰমে শ্ৰদ্ধাঞ্জলি , মাল্যাৰ্পণ ,বন্তি প্ৰজ্বলন আৰু স্মৃতি তৰ্পণ অনুষ্ঠান সম্পন্ন কৰা হয় ।
পৰৱৰ্তী কাৰ্যসূচী অনুসৰি অনুষ্ঠিত হোৱা মুকলি সভাত নিৰূপমা মিশ্ৰ, ৰাণু চক্ৰৱৰ্তী, ডঃ মৰমী বৰঠাকুৰ তালুকদাৰ কে ধৰি কেবা গৰাকী বিশিষ্ট লেখিকাই অংশগ্ৰহণ কৰে।
পাছত অনুষ্ঠিত ”অসমৰ সমাজ জীৱনত নব্য জাতীয় চেতনা প্রতিষ্ঠাত নাৰীৰ ভূমিকা” শীৰ্ষক এক আলোচনা চক্ৰত বিশিষ্ট সাহিত্যিক তথা অসম সাহিত্য সভাৰ পত্ৰিকা সম্পাদক ডঃ উপেন্দ্ৰজিৎ শৰ্মা আৰু ধুবুৰী জিলা সাহিত্য সভাৰ সভাপতি তৰণীকান্ত ৰায়ে অংশ লৈ মননশীল আলোচনা আগবঢ়াই উপস্থিত সকলোকে আপ্লুত কৰে ।
এই আলোচনা চক্ৰ অন্ত পৰাৰ পিছ মূহুৰ্তত বিশিষ্ট সমাজসেৱী সবিতা ৰাণী প্ৰধানী আৰু বিশিষ্ট মুক্তি যুঁজাৰু তথা ঢকুৱাখানা নিবাসী সোণপাহি দাসক ‘শ্বহীদ কনকলতা বঁটা’ প্ৰদান কৰা হয়।উল্লেখ্য যে আজিৰ এই অনুষ্ঠানতে শাখা সমিতিৰ স্মৃতিগ্ৰন্থ আৰু কবিতা সংকলনৰ লগতে কেবাগৰাকী লেখিকাৰ স্বৰচিত গ্ৰন্থ উন্মোচন কৰা হয়।
চাপৰ প্ৰগতি সংঘ ভৱন প্ৰাংগনত আয়োজিত লেখিকা সমাৰোহ সমিতিৰ এই অনুষ্ঠানত বহু সদস্যা আৰু স্থানীয় তথা কেবা গৰাকী আমন্ত্ৰিত অতিথিয়ে অংশগ্ৰহণ কৰি সৌষ্ঠৱ বৃদ্ধি কৰে।
