মুখ্যমন্ত্ৰীৰ পদ এৰি দিল্লীলৈ যাবলৈ ওলাইছে নীতিশ কুমাৰ। এই কথা সূত্ৰসমূহে প্ৰকাশ কৰিছে। সকলোৱে জানে যে দহবাৰৰ মুখ্যমন্ত্ৰীৰ আসনখন খালী হৈ পৰিলে সেই আসনত বিজেপিৰ কোনোবা এজনেই বহিব। এই পৰিস্থিতিত নীতিশৰ বাসভৱন ঘেৰাও কৰি আৰম্ভ হৈছে জে ডি ইউ কৰ্মীৰ প্ৰতিবাদী আন্দোলন।
জনতা দল (ইউনাইটেড)ৰ কৰ্মী আৰু সমৰ্থকৰ বৃহৎ সংখ্যক গোট খাই শ্লোগান দিছে, হাতত প্লেকাৰ্ড লৈ থিয় হৈ আছে আৰু একাংশই চকুলো টুকিছে। প্ৰতিবাদকাৰীসকলে নীতিশ কুমাৰক বিহাৰ এৰি নাযাবলৈ আহ্বান জনাইছে। বিহাৰৰ ৰাইজে বিচাৰে নীতিশ কুমাৰক।
ৰাজ্যসভাৰ নিৰ্বাচনত নীতিশ কুমাৰে প্ৰতিদ্বন্দ্বিতা কৰিব বুলি ৰাজনৈতিক মহলত চৰ্চা চলিছে। ফলত তেওঁ মুখ্যমন্ত্ৰীৰ পদ এৰিব পাৰে, আৰু বিজেপিৰ এজন নেতা নতুন মুখ্যমন্ত্ৰী হ’ব পাৰে। এই আশংকাত জেডিইউৰ তৃণমূল কৰ্মী আৰু মৌন হৈ থাকিব নোৱাৰিলে। বুধবাৰে নিশাৰ পৰা একাংশ যুৱ কৰ্মীৰ সমাগম হ’বলৈ ধৰে আৰু বৃহস্পতিবাৰৰ পুৱাৰে পৰা ভিৰ বাঢ়িবলৈ ধৰিলে।
শ শ দলীয় কৰ্মীয়ে বাসগৃহৰ সন্মুখত পথ অৱৰোধ কৰে। নীতিশৰ আৱাসিক এলেকাত নীতিশ কুমাৰ জিন্দাবাদ শ্ল’গানেৰে উত্তাল হৈ পৰে। জেডিইউ নেতা ৰাজীৱ ৰঞ্জন পেটেলে নেতৃত্ব দিছে প্ৰতিবাদৰ। সাংবাদিকৰ আগত তেওঁ কয়, “আমি নাকান্দি কি কৰিম? আমি ২০২৫ চনত দুৱাৰে দুৱাৰে গৈ নীতিশ কুমাৰৰ নামত ভোট বিচাৰিছো। ৰাইজে তেওঁৰ নামত ভোট দিছে। তেওঁ ৰাজ্যসভালৈ গ’লে বিহাৰৰ জনসাধাৰণ ক’লৈ যাব? যদি কোনোবাই মুখ্যমন্ত্রী সলনি কৰিব বিচাৰে, তেন্তে নির্বাচন অনুষ্ঠিত কৰিবলৈ দিয়ক, সংখ্যাগৰিষ্ঠতা আনিব দিয়ক৷ আমি ইয়াতে থাকিম, নীতিশজীক মনোনয়ন দাখিল কৰিবলৈ নিদিওঁ।”
এই ঘটনাই বিহাৰৰ ৰাজনীতিত এক নতুন মোৰ কঢ়িয়াই আনিছে। ২০২৫ চনৰ নিৰ্বাচনত নীতিশ কুমাৰৰ নামত এন ডি এ জয়ী হৈছিল। তেওঁৰ নেতৃত্বত জেডিইউ-বিজেপি মিত্ৰজোঁটে চৰকাৰ গঠন কৰিছে। এতিয়া হঠাতে ৰাজ্যসভাত প্ৰৱেশৰ খবৰে কৰ্মীসকলক আতংকিত কৰি তুলিছে৷ দলৰ ভৱিষ্যত কি? বিজেপিয়ে এইবাৰ সম্পূৰ্ণ নিয়ন্ত্ৰণ ল’ব নেকি? নে নীতিশজীৰ ল’ৰা বা আন কোনোবাই দায়িত্ব ল’ব? কিন্তু তৃণমূল পৰ্যায়ৰ কৰ্মীসকলে যে নীতিশৰ বাহিৰে আন কাকো মানি ল’বলৈ ইচ্ছুক নহয় সেয়া স্পষ্ট।
