দেশৰ ২৩ খন আইআইটিত নাম ভৰ্তি কৰাৰ বাবে ৰাষ্ট্ৰীয় পৰ্যায়ত সম্পন্ন কৰি অহা JEE Advanced পৰীক্ষা চলিত বৰ্ষৰ ৩ জুলাইত অনুষ্ঠিত হ’ব।
আজি কেন্দ্ৰীয় শিক্ষামন্ত্ৰী ৰমেশ পখ্ৰিয়াল নিশাংকে এই ঘোষণা কৰে।
মন্ত্ৰী গৰাকীয়ে কয় যে দেশত এতিয়াও কোভিড পৰিস্থিতিৰ উন্নতি ঘটা নাই।
তথাপি তাৰ মাজতে শিক্ষাৰ্থীসকলৰ কথা চিন্তা কৰি JEE Advanced পৰীক্ষা পৰ্যাপ্ত সতৰ্কতাৰ মাজেৰে অনুষ্ঠিত কৰাৰ সিদ্ধান্ত লোৱা হৈছে।
৩ জুলাইত অনুষ্ঠিত হ’বলগীয়া JEE Advanced পৰীক্ষাৰ বাবে ছাত্ৰ-ছাত্ৰীসকলে প্ৰস্তুতিৰ পৰ্যাপ্ত সময় পাব বুলিও মন্ত্ৰীগৰাকীয়ে কয়। ইপিনে কোভিড পৰিস্থিতিৰ বাবেই এইবাৰৰ JEE Advanced পৰীক্ষাত অৱতীৰ্ণ হ’ব বিচৰা ছাত্ৰ-ছাত্ৰীসকলৰ বাবে চৰকাৰে এক বিশেষ ৰেহাইৰ ব্যৱস্থা কৰা বুলিও কেন্দ্ৰীয় শিক্ষামন্ত্ৰী গৰাকীয়ে প্ৰকাশ কৰে।
তেওঁ কয় যে পূৰ্বে JEE Advanced পৰীক্ষাত অৱতীৰ্ণ হ’বলৈ ছাত্ৰ-ছাত্ৰীসকলে দ্বাদশ শ্ৰেণীত কমেও ৭৫ শতাংশ নম্বৰ পোৱাটো বাধ্যতামূলক আছিল।কিন্তু এইবাৰ কোভিড পৰিস্থিতিৰ বাবেই JEE Advanced পৰীক্ষাত বহিবলৈ ছাত্ৰ-ছাত্ৰীয়ে দ্বাদশ শ্ৰেণীৰ পৰীক্ষাত কমেও ৭৫ শতাংশ নম্বৰ পোৱাটো বাধ্যতামূলক নহয় বুলি মন্ত্ৰী নিশাংকে জানিবলৈ দিয়ে।
চৰকাৰৰ এনে পদক্ষেপৰ ফলত এইবাৰ JEE Advanced পৰীক্ষাত দ্বাদশ শ্ৰেণীত কমেও ৭৫ শতাংশ নম্বৰ নোপোৱাসকলেও অৱতীৰ্ণ হোৱাৰ সুবিধা পাব।
তেওঁ লগতে কয় যে JEE Main 2020 ত যিসকলে যোগত্যা অৰ্জন কৰিছিল কিন্তু কোভিড পৰিস্থিতিৰ বাবে উক্ত পৰীক্ষাৰ দ্বিতীয় পৰ্যায়ত অৱতীৰ্ণ হ’ব পৰা নাছিল তেওঁলোকেও JEE Advanced পৰীক্ষাত বহিব পাৰিব।
বিগত বৰ্ষত ক’ৰ’ণাতংকৰ মাজতে ২৭ ছেপ্তেম্বৰৰ দিনা JEE Advanced পৰীক্ষা অনুষ্ঠিত কৰা হৈছিল।
এতিয়াৰে পৰা JEE(Mains) পৰীক্ষা অসমীয়াকে ধৰি ১৩ টা আঞ্চলিক ভাষাত অনুষ্ঠিত কৰা হ’ব বুলি কেন্দ্ৰীয় শিক্ষামন্ত্ৰী গৰাকীয়ে প্ৰকাশ কৰে।