নাগৰিকত্ব সংশোধনী বিধেয়ক বাতিলৰ সন্দৰ্ভত আজি শিৱসাগৰত অনুষ্ঠিত এখন সভাত অংশ লৈ আলোচনাপন্থী আলফা নেতা জীতেন দত্তই কয় আন্দোলন এনে হ’ব লাগে যাতে দিল্লী কঁপি যায়।
আলফা নেতাগৰাকীয়ে কয়ে যে অসমৰ তেল আৰু কয়লা যদি অসমৰ বাহিৰলৈ যাবলৈ দিয়া নহয় দুদিনত তেতিয়া ভাৰতৰ বহু উদ্যোগ বন্ধ হৈ যাব। লগতে তেওঁ সমগ্ৰ অসমত ৰেল পথ অৱৰোধ কৰি প্ৰতিবাদ কৰিবলৈ আহ্বান জনায়।
“কেব গৃহীত হ’লেও আমি উচ্চতম ন্যায়ালয়ত আবেদন কৰিম।” বুলি উল্লেখ কৰি জীতেন দত্তই ইয়াৰ সমান্তৰালকৈ আন্দোলনৰ কাৰ্যসূচীও চলাই যাব লাগিব বুলি কয়।
আনহাতে আন্দোলন কৰা দল-সংগঠন বিলাকে কিয় এটা উমৈহতীয়া কাৰ্যসূচী কৰিব নোৱাৰে বুলিও তেওঁ প্ৰশ্ন কৰে। তেওঁ কয়, “সুবিধাবাদী চৰিত্ৰ থকাৰ বাবে এই কাৰ্য কৰিব নোৱাৰে। বিধান সভাৰ নিৰ্বাচন আহি আছে। টিকেটৰ বাবে বিক্ৰী যোৱা মানসিকতা আমাৰ এচাম নেতাৰ আছে।”
নিজকে কিমান ডাঙৰ নেতা তাক ৰাইজৰ আগত প্ৰতিষ্ঠা কৰিবৰ বাবে ঐক্যবদ্ধ ভাৱে আন্দোলন নকৰে বুলি তীব্ৰ সমালোচলা কৰে জিতেন দত্তই। বৰ্তমান জাতিৰ স্বাৰ্থত আলফা নেতাগৰাকীয়ে সকলোকে ঐক্যবদ্ধ হৈ আন্দোলন কৰিবলৈ আহ্বান জনায়।
তাৰোপৰি অসম সাহিত্য সভা আৰু শংকৰ সংঘকো তীব্ৰ সমালোচনা কৰে তেওঁ সাহিত্য সভা বিক্ৰী গ’ল আৰু সাহিত্য সভাৰ লগত জড়িত ভণ্ড নেতাক সকীয়াই দিয়াৰ পৰিবেশ আহিছে বুলি কয়। ইফালে লাখ লাখ কৰ্মী থকা শংকৰ সংঘ আজি কেবৰ বিৰুদ্ধে নিমাত বুলিও মন্তব্য কৰে, জিতেন দত্তই।
শেষত জাতিৰ দুৰ্যোগৰ সময়ত বিজেপি, কংগ্ৰেছ, এজিপি আদি দলৰ তৃৰ্ণমূল কৰ্মীসকলক জাতিৰ পক্ষত থিয় দিবলৈ আহ্বান জনায় দত্তই।
