কলকাতা আৰক্ষীৰ স্পেচিয়েল টাস্ক ফ’ৰ্চে বাংলাদেশৰ নিষিদ্ধ সন্ত্ৰাসবাদী সংগঠন জামাতুল মুজাহিদনৰ সদস্য আব্দুল মতিনক ২০১৪ৰ বৰ্ধমানৰ বিস্ফোৰণৰ সৈতে জড়িত থকাৰ অভিযোগত গ্ৰেপ্তাৰ কৰিছে।
মুজাহিদিন সদস্য মতিনক বৃহস্পতিবাৰে কেৰালাত আটক কৰাৰ পাছত কলকাতালৈ লৈ অনা হয়। শনিবাৰে সন্ত্ৰাসবাদী সদস্যজনক কলকাতাৰ আদালতত হাজিৰ কৰোৱা হ’ব। হিন্দুস্তান টাইমছৰ এটা বাতৰিত এই কথা প্ৰকাশ পাইছে।
কলকাতা আৰক্ষীৰ সূত্ৰই জানিব দিয়া মতে মতিনৰ ঘৰ অসমৰ বৰপেটাত। মতিনে ২০১০ চনত এখন মাদ্ৰাছাত পঢ়ি থকা সময়তে সন্ত্ৰাসবাদী সংগঠন জামাতুল মুজাহিদনত যোগ দিছিল।
মতিনে আই ই ডি বনোৱা প্ৰশিক্ষণ গ্ৰহণ কৰি আই ই ডি বনোৱা কামত জড়িত হৈ পৰিছিল। পশ্চিমবংগৰ বৰ্ধমান জিলাৰ ছিমুলিয়া মাদ্ৰাছাত অস্ত্ৰৰ প্ৰশিক্ষণ গ্ৰহণ কৰা ১৫ জন ব্যক্তিৰ ভিতৰত আব্দুল মতিনো আছিল।
২০১৪ চনৰ ২ অক্টোবৰত বৰ্ধমানৰ খাগ্ৰাগড় অঞ্চলৰ এটা ভাড়াঘৰৰ প্ৰথম মহলাত দুৰ্ঘটনাক্ৰমে এটা আই ই ডি বিস্ফোৰিত হৈ দুজন জামাতুলৰ সদস্য নিহত হোৱা ঘটনাৰ পাছতে মতিনে কেৰালালৈ গুচি গৈছিল।
যোৱা ২৮ জানুৱাৰিত পশ্চিমবংগৰ হুগলী জিলাৰ আৰমবাঘ অঞ্চলৰ পৰা বৰ্ধমানৰ বিস্ফোৰণৰ সৈতে জড়িত কেডাৰ কাজি আৰু ছাজ্জাদ আলীক নেশ্যনেল ইনভেষ্টিগেশ্যন এজেন্সিয়ে (নিয়া) গ্ৰেপ্তাৰ কৰাৰ পাছতে মতিনক গ্ৰেপ্তাৰ হৈছে। ঘটনাটোৰ সৈতে জড়িত থকাৰ অভিযোগত গ্ৰেপ্তাৰ হোৱা মতিন হৈছে ৩৩ নম্বৰ সদস্য।
২০১৪ চনত ‘নিয়া’ই তদন্তৰ দায়িত্ব গ্ৰহণ কৰিছিল আৰু ২০১৫ চনৰ ৩০ মাৰ্চত বাংলাদেশৰ শ্বেইখ হাছিনা চৰকাৰক হিংসাত্মক সন্ত্ৰাসবাদী আক্ৰমণেৰে উৎখাত কৰি শ্বৰিয়া ভিত্তিক ইছলামিক শাসন প্ৰৱৰ্তনৰ ষড়যন্ত্ৰত জড়িত থকা চাৰিজন বাংলাদেশী নাগৰিকৰ লগতে ২১জন লোকৰ বিৰুদ্ধে এখন বিশেষ আদালতত অভিযোগনামা দাখিল কৰিছিল। ‘হিন্দুস্তান টাইমছ’ৰ বাতৰিটোত ঘটনাটোৰ সৱিশেষ প্ৰকাশ পাইছে।
দীৰ্ঘদিন ধৰি অসমৰ মাদ্ৰাছাসমূহ ইছলামিক সন্ত্ৰাসবাদীৰ ঘাটি বুলি অভিযোগ উত্থাপন হৈ থকাৰ মাজতে বৰপেটাৰ মাদ্ৰাছাত শিক্ষা গ্ৰহণ কৰি থকা আব্দুল মতিনৰ জামাতুল মুজাহিদিনত যোগদান তথা গ্ৰেপ্তাৰৰ বাতৰিয়ে স্বাভাৱিকতে চাঞ্চল্যৰ সৃষ্টি কৰিছে।
