অসম বিধানসভা নিৰ্বাচন ২০২৬ চনত প্ৰথমবাৰৰ বাবে অকলে প্ৰতিদ্বন্দ্বিতা কৰি ঝাৰখণ্ড মুক্তি মৰ্চাই কোনো আসন লাভ কৰিবলৈ সক্ষম নহ‘লেও প্ৰায় ১.১৬ শতাংশ ভোট লাভ কৰি বিৰোধীৰ পৰম্পৰাগত ভোটবেংকত প্ৰবল জোকাৰণি তুলিছে। হিমন্ত বিশ্ব শৰ্মাৰ নেতৃত্বত বিজেপি মিত্ৰজোঁটে ক্ৰমাগতভাৱে তৃতীয়বাৰৰ বাবে বৃহৎ জয়লাভ কৰাৰ বিপৰীতে, জে এম এমে চাহ বাগিচা আৰু আদিবাসী অধ্যুষিত অঞ্চলসমূহত নিজৰ স্থিতি সবল কৰিছে। বিৰোধীৰ দুৰ্গ হিচাপে পৰিচিত বহু সমষ্টিত জে এম এমৰ প্ৰৱেশে নিৰ্বাচনী যুঁজখন আকৰ্ষণীয় কৰি তুলিছিল।
আয়োগৰ পৰিসংখ্যা অনুসৰি জে এম এমৰ মাজবাট সমষ্টিৰ প্ৰাৰ্থী প্ৰীতি ৰেখা বাৰ্লাই ২৯,১৭২ টা আৰু গোঁসাইগাঁও সমষ্টিত ফেড্ৰিকচন হাস্দাই ২১,৪১৭ টা ভোট লাভ কৰি দ্বিতীয় স্থান অধিকাৰ কৰিবলৈ সক্ষম হয়। আনহাতে, ভেৰগাঁৱৰ পৰা প্ৰভাত দাস পানিকাই ২১,৯৯৭ টা, ৰঙাপৰা সমষ্টিত মেথিউ তপ্ন’ৱে ২০,০৬৭ টা আৰু খুমটাইৰ পৰা অমিত নাগে ১৭,০৯০ টা, ডিগবৈত ভৰত নায়কে ১৯,৬৩৮ টা ভোট,ভোট লাভ কৰি ১৫ হাজাৰৰ ঘৰ অতিক্ৰম কৰাৰ লগতে তৃতীয় স্থানত ৰয়।
একেদৰে,টিংখাঙত মহাবীৰ বাস্কেই ১৪,২০৫ টা ভোট, চাবুৱা-লাহোৱাল সমষ্টিত ভূৱেন মুৰাৰীয়ে ১৩,২৬৫ টা ভোট , বিশ্বনাথৰ পৰা তেহাৰু গৌৰে ১২,৫০১ টা, সৰুপথাৰত সাহিল মুণ্ডাই ১১,৮৫২ টা, বৰচলাৰ পৰা আব্দুল মাজনে ৮,৫৫৮ টা আৰু নাহৰকটীয়াৰ পৰা সঞ্জয় বাঘে ৭,৫৬০ টা ভোট লাভ কৰে। আনহাতে, ৰঙানদীৰ পৰা পৱন সাঁওতালে ১১,৮৩২ টা ভোট লাভ কৰি নিজ নিজ সমষ্টিত তৃতীয় স্থান দখল কৰে। ইয়াৰ উপৰিও দুলিয়াজান সমষ্টিত পিটাৰ মিঞ্জে ৮,৩৮৯ টা ভোট লাভ কৰি শক্তিশালী প্ৰতিদ্বন্দ্বিতা আগবঢ়াবলৈ সক্ষম হয়।
নিৰ্বাচনী ফলাফলৰ বিশ্লেষণৰ পৰা স্পষ্ট হৈ পৰিছে যে ঝাৰখণ্ড মুক্তি মৰ্চাৰ এই আকস্মিক উত্থান কেৱল এটা ৰাজনৈতিক পৰিঘটনা নহয়, বৰঞ্চ ই অসমৰ আদিবাসী সমাজৰ দীৰ্ঘদিনীয়া বঞ্চনা আৰু পুঞ্জীভূত ক্ষোভৰ এক বহিঃপ্ৰকাশ। শতিকাজুৰি মৌলিক সমস্যাৰ সৈতে যুঁজি থকা এই শ্ৰমিক তথা আদিবাসী জনসাধাৰণে আজিও তেওঁলোকৰ প্ৰাপ্য অধিকাৰৰ পৰা বঞ্চিত হৈ আছে। ফলস্বৰূপ, নিৰ্বাচনৰ জৰিয়তে প্ৰকাশ পোৱা জে এম এমৰ এই শক্তিশালী প্ৰদৰ্শনক ইমান দিনে শোষিত হৈ থকা এটা জনসমষ্টিৰ মৌন প্ৰতিবাদ আৰু পৰিৱৰ্তনৰ তীব্ৰ আকাঙ্ক্ষা বুলিয়ে অভিহিত কৰিব পাৰি।
