জামিন আবেদন খাৰিজ কৰা হৈছে চাৰ্জিল ইমামৰ। দিল্লীৰ এখন আদালতে আজি এই সিদ্ধান্ত লয়।
জামিন আবেদনৰ শুনানিত ন্যায়াধীশ অনুজ আগৰৱালাই কয় যে চাৰ্জিল ইমামে কৰা এটা বিশেষ বক্তব্য সম্পূৰ্ণ সাম্প্ৰদায়িক আৰু সমাজৰ বাবে ক্ষতিকাৰক। সেয়ে তেওঁক জামিন প্ৰদান কৰাটো অনুচিত।
আদালতে কয় যে যদিও সংবিধানে চিন্তা আৰু কথা কোৱাৰ স্বাধিনতা প্ৰদান কৰিছে, তৎসত্বেও চাৰ্জিলৰ বক্তব্য গ্ৰহণ কৰিব নোৱাৰি। অৱশ্যে চাৰ্জিলৰ বিশেষ বক্তব্যটো ভাৰতীয় দণ্ডবিধি আইনৰ ১২৪এ ধাৰা তথা দেশদ্ৰোহীতাৰ গোচৰত পৰিবনে নপৰে, সেই বিষয়ে বিশ্লেষণ কৰাৰ প্ৰয়োজন বুলিও আদালতে মতপোষণ কৰে।
তদুপৰি, উক্ত বক্তব্যৰ পৰৱৰ্তী সময়ত হোৱা হিংসাত্মক ঘটনাৰ স’তে চাৰ্জিলক জড়িত কৰা সম্পৰ্কতো আদালতে কয় যে ইয়াৰ কোনো সাক্ষ্য প্ৰমাণ নাই।
উল্লেখযোগ্য যে কা আৰু এনআৰচিবিৰোধী আন্দোলনৰ সময়ছোৱাত জেএনইউৰ ছাত্ৰ চাৰ্জিলে উত্তেজনা আৰু প্ৰৰোচনামূলক ভাষণ দিয়া বুলি অভিযোগ উঠিছিল।
তেওঁ কৈছিল যে কা আৰু এনআৰচিৰ প্ৰতিবাদত ভাৰতৰ মূল ভূখণ্ডৰ পৰা অসম তথা উত্তৰপূবক বিচ্ছিন্ন কৰিব লাগে। আৰু এইক্ষেত্ৰত মুছলমানসকলে আগভাগ ল’ব লাগে। ভাষণটো তেওঁ প্ৰদান কৰিছিল ২০১৯ চনৰ ১২ ডিচেম্বৰত নতুন দিল্লীৰ জামিয়া মিলিয়া ইছলামিয়া বিশ্ববিদ্যালয় সমীপত।
চাৰ্জিলৰ ভাষণৰ পাছতে ১৫ ডিচেম্বৰত দিল্লীৰ জামিয়া নগৰ উত্তপ্ত হৈ পৰিছিল। উক্ত দিনা ৩ হেজাৰৰো অধিক লোকে আৰক্ষীৰ ওপৰত জপিয়াই পৰে। কা-এনআৰচি বিৰোধী আন্দোলনৰ অংশ এই হিংসাত্মক ঘটনাৰ উদগনি চাৰ্জিল ইমামৰ ভাষণটোৱেই দিছিল বুলি অভিযোগ উঠিছিল।
তেওঁৰ ওপৰত ৰাষ্ট্ৰদ্ৰোহৰ গোচৰ তৰা হৈছিল। দিল্লী আৰক্ষীয়ে কৈছিল যে উক্ত বক্তব্যটোৱে এটা বিশেষ সম্প্ৰদায়ক উচটনি আৰু কা-এনআৰচিৰ নামত ভীতিপ্ৰদৰ্শন কৰা হৈছে।
তাৰপাছতে ২০২০ চনৰ ২৮ জানুৱাৰীত চাৰ্জিলক বিহাৰৰ পৰা গ্ৰেপ্তাৰ কৰা হৈছিল। ৰাষ্ট্ৰদ্ৰোহৰ উপৰিও বৰ্তমানলৈকে চাৰ্জিলৰ ওপৰত অসম, উত্তৰপ্ৰদেশ, দিল্লীকে ধৰি কেইবাখনো ৰাজ্যত বহুকেইটা গোচৰ ৰুজু হৈ আছে।
বৰ্তমান গুৱাহাটীৰ কেন্দ্ৰীয় কাৰাগাৰত কাৰাবাস খাটি আছে চাৰ্জিল ইমামে।
