আগন্তুক বিধানসভা নিৰ্বাচনৰ পূৰ্বে ভাৰতীয় জনতা পাৰ্টীৰ কেন্দ্ৰীয় নেতৃত্বই ৰাজ্যসভাৰ প্ৰাৰ্থী হিচাপে কেবিনেট মন্ত্ৰী যোগেন মহনৰ নাম ঘোষণা কৰাৰ পাছতেই চৰাইদেউ জিলাৰ মাহমৰা সমষ্টিত এক উত্তপ্ত পৰিস্থিতিৰ সৃষ্টি হৈছে। মঙলবাৰে নিশা মন্ত্ৰীগৰাকীৰ মৰাণস্থিত বাসগৃহৰ সন্মুখত সমবেত হৈ সহস্ৰাধিক দলীয় কৰ্মী আৰু সমৰ্থকে এই সিদ্ধান্তৰ বিৰুদ্ধে তীব্ৰ প্ৰতিবাদ সাৱ্যস্ত কৰে। সাংসদৰ পৰিৱৰ্তে যোগেন মহনক পুনৰ মাহমৰাৰ বিধায়ক হিচাপে বিচৰা এই ক্ষুব্ধ সমৰ্থকসকলে মুখ্যমন্ত্ৰী তথা বিজেপিৰ ৰাজ্যিক নেতৃত্বক ৰাজ্যসভাৰ প্ৰাৰ্থিত্বৰ সিদ্ধান্ত তৎকালীনভাৱে বাতিল কৰিবলৈ দাবী জনাইছে।
মঙলবাৰে কেন্দ্ৰীয় বিজেপিয়ে অসমৰ তিনিখন ৰাজ্যসভা আসনৰ ভিতৰত দুখনৰ বাবে দুলীয়াজানৰ বিধায়ক তেৰছ গোৱালা আৰু মাহমৰাৰ বিধায়ক তথা মন্ত্ৰী যোগেন মহনৰ নাম প্ৰাৰ্থী হিচাপে ঘোষণা কৰে। কিন্তু সমাগত বিধানসভা নিৰ্বাচনৰ প্ৰতি লক্ষ্য ৰাখি সমষ্টিটোত সাংগঠনিক কাম-কাজত ব্যস্ত থকা মন্ত্ৰীগৰাকীক তেওঁৰ ইচ্ছাপত্ৰৰ বিৰুদ্ধে ৰাজ্যসভাৰ টিকট প্ৰদান কৰাত দলীয় কৰ্মীসকল ক্ষোভিত হৈ পৰে।
প্ৰতিবাদকাৰী বিজেপি কৰ্মীসকলে স্পষ্ট কৰি দিয়ে যে তেওঁলোকে যোগেন মহনক কেৱল মাহমৰাৰ বিধায়ক হিচাপেহে বিচাৰে। ক্ষোভিত সমৰ্থকসকলে সংবাদ মাধ্যমৰ আগত কয়, “যোগেন মহন আমাৰ অভিভাৱক। মুখ্যমন্ত্ৰী হিমন্ত বিশ্ব শৰ্মাই নিজেই আহি ঘোষণা কৰিছিল যে যোগেন মহন মাহমৰা সমষ্টিৰ বিধায়ক হ’ব। কিন্তু এতিয়া কিয় এই সিদ্ধান্ত ল’লে? মুখ্যমন্ত্ৰীয়ে নিজেই মহিলাসকলৰ আগত কোৱা কথা ৰাখিব লাগে।” এই দাবীৰে মঙলবাৰে নিশা প্ৰতিবাদকাৰীসকলে মন্ত্ৰীগৰাকীৰ বাসগৃহৰ সন্মুখত অৱস্থান ধৰ্মঘট কাৰ্যসূচী ৰূপায়ণ কৰে।
মন কৰিবলগীয়া যে মঙলবাৰে পুৱাৰ ভাগত মন্ত্ৰী যোগেন মহনে নিজেই সংবাদ মাধ্যমৰ আগত ৰাজ্যসভাৰ প্ৰাৰ্থী হোৱাৰ ক্ষেত্ৰত নিজৰ অনিচ্ছা প্ৰকাশ কৰিছিল। তেওঁ কৈছিল, “সদ্যহতে মই ৰাজ্যসভাৰ বাবে আগ্ৰহী নহয়। সমষ্টিবাসী ৰাইজৰ লগতে থকাটোক মই বেছি গুৰুত্ব দিছোঁ। মই হাইকমাণ্ডকো জনাইছোঁ যে সমষ্টিত ৰাইজৰ বহু কাম কৰিবলৈ বাকী আছে। দলে য’ত বহুৱাই সেইটো দলৰ কথা, কিন্তু মই সমষ্টিত কাম কৰি ৰাইজক দিয়া প্ৰতিশ্ৰুতিসমূহ পূৰণ কৰিবলৈহে বিচাৰোঁ।” পিছে বিয়লি প্ৰাৰ্থিত্ব ঘোষণাৰ পাছৰে পৰা তেওঁ সংবাদ মাধ্যমৰ পৰা সম্পূৰ্ণৰূপে আঁতৰি আছে।
উল্লেখ্য যে, আহোম জনগোষ্ঠীৰ এক প্ৰভাৱশালী নেতা হিচাপে পৰিচিত যোগেন মহনে ২০১৬ আৰু ২০২১ চনৰ বিধানসভা নিৰ্বাচনত ধাৰাবাহিকভাৱে কংগ্ৰেছ প্ৰাৰ্থীক পৰাজিত কৰি মাহমৰাৰ পৰা বিধায়ক হিচাপে নিৰ্বাচিত হৈছিল। সৰ্বানন্দ সোণোৱাল চৰকাৰৰ দিনৰে পৰা বৰ্তমানৰ হিমন্ত বিশ্ব শৰ্মা নেতৃত্বাধীন চৰকাৰলৈকে তেওঁ কেইবাটাও গুৰুত্বপূৰ্ণ বিভাগৰ কেবিনেট মন্ত্ৰীৰ দায়িত্ব সফলতাৰে পালন কৰি আহিছে। এতিয়া ৰাজ্যসভাৰ প্ৰাৰ্থিত্বক লৈ সৃষ্টি হোৱা এই অসন্তুষ্টিয়ে আগন্তুক নিৰ্বাচনৰ পূৰ্বে শাসকীয় দলটোৰ ভিতৰচৰাত এক অস্বস্তিকৰ পৰিৱেশৰ সৃষ্টি কৰিছে।
