সমাজৰ বিৰুদ্ধে এটা সাম্প্ৰদায়িক মন্তব্য কৰি অসমৰ ব্ৰাহ্মণ সমাজৰ ৰোষত পৰা জুবিন গাৰ্গ আৰু ব্ৰাহ্মণ সমাজে আজি এখন যুটীয়া সংবাদমেল সম্বোধন কৰে।
সংবাদমেলত ব্ৰাহ্মণ সমাজে জুবিনক অন্তৰৰ পৰা ক্ষমা কৰি দিয়া আৰু তেওঁৰ বিৰুদ্ধে অসমৰ প্ৰতিখন জিলাত ব্ৰাহ্মণ সমাজে দিয়া গোচৰবোৰ কেইবা দিনৰ পূৰ্বেই প্ৰত্যাহাৰ কৰাৰ কথা অৱগত কৰে।
ব্ৰাহ্মণ সমাজৰ বিষয়ববীয়াই সংবাদমেলত জনায়, জুবিন গাৰ্গে ইতিমধ্যে ক্ষমা বিচাৰিছে। জুবিনৰ প্ৰতি আন্তৰিকতা থকা বাবে জিলাই জিলাই থকা ব্ৰাহ্মণ সমাজলৈ কেছবিলাক উঠাই ল’বলৈ কেতিয়াবাই বাৰ্তা প্ৰেৰণ কৰিছিল ব্ৰাহ্মণ সমাজে।
“জুবিনৰ বক্তব্যই কেৱল অসমৰে নহয় গোটেই ভাৰতৰ ব্ৰাহ্মণ সমাজক আঘাত দিছিল”, ব্ৰাহ্মণ সমাজৰ বিষয়ববীয়াজনে সংবাদমেলত কয়।
আনহাতে শিল্পী জুবিন গাৰ্গে কয় যে ভুল ক্ৰমেহে তেওঁৰ মুখৰ পৰা বামুণ শব্দটো ওলাইছিল, আচলতে ক’ব খুজিছিল জাত-পাত নিঃশেষ কৰাৰ কথাহে।
“মই ক’ব বিচাৰিছিলো জাত-পাতৰ বিৰুদ্ধে, কিন্তু বামুণ শব্দটো ওলাই গ’ল। তাৰ কাৰণে আকৌ ছৰি কৈছো”, সংবাদমেলত জুবিনৰ মন্তব্য।
তেওঁ তাৰ উপৰি কয়, “যেতিয়া এটা সম্প্ৰদায়ে আঘাত পায়, সেইটো বেয়া কথা হয় আচলতে। যিটো বেয়া বেয়াই। কিবা এটা বেয়া কাম কৰিলে সেইটোৰ দোষ স্বীকাৰ কৰাটো দায়িত্ব।”
শিল্পীজনে এতিয়া ব্ৰাহ্মণ সমাজৰ সৈতে কোনো সংঘাত নাই আৰু এইটো লৈ আৰু বিতৰ্ক হ’ব নালাগে বুলি কয়।
উল্লেখযোগ্য যে যোৱা ২৬ জুলাইৰ নিশা মহানগৰৰ জি এম চি এইচ্ছৰ প্ৰেক্ষাগৃহত পূৰ্ণবিকাশ সংস্থাই আয়োজন কৰা পাঞ্জা প্ৰতিযোগিতাৰ এটা সাংস্কৃতিক অনুষ্ঠানত জনপ্ৰিয় শিল্পী জুবিন গাৰ্গে বামুণ-চামুণ চব মাৰিব লাগে বুলি মন্তব্য কৰিছিল, যাৰ বাবে গোটেই ৰাজ্যজুৰি বিতৰ্কৰ সৃষ্টি হৈছিল।
