এক ভয়াৱহ ভৱিষ্যতৰ দিশে গতি কৰিছে যোশীমঠ চহৰ। অপৰিকল্পিত উন্নয়নৰ চমক তথা প্ৰাকৃতিক প্ৰলয়ৰ পৰিণতিত বিপৰ্যয়ৰ সন্মুখীন হোৱা যোশীমঠ যোৱা মাত্ৰ ১২ দিনতে ৫.৪ ছেণ্টিমিটাৰ তললৈ সোমাই পৰিছে। ভাৰতীয় মহাকাশ গৱেষণা সংস্থা, চমুকৈ ইছৰ’ৰ এক প্ৰতিবেদনত প্ৰকাশ পাইছে এই উদ্বেগজনক তথ্য।
ইছৰ’ৰ নেশ্যনেল ৰিম’ট চেন্সিং চেণ্টাৰে প্ৰকাশ কৰা উপগ্ৰহৰ ছবিত দেখা গৈছে যে ২৭ ডিচেম্বৰৰ পৰা ৮ জানুৱাৰীৰ ভিতৰত চহৰখন ৫.৪ ছেণ্টিমিটাৰ তললৈ সোমাই পৰিছে। এই পৰিস্থিতি অধিক ৰূপত দেখা দিছে মধ্য যোশীমঠত। এই অঞ্চলৰ আশে-পাশে সেনাবাহিনীৰ এক হেলিপেড আৰু এটা মন্দিৰৰ অৱস্থিতি আছে।
মহাকাশ সংস্থাটোৰ প্ৰতিবেদন অনুসৰি বিগত কেইটামান মাহত যোশীমঠত এনেদৰে মাটি তললৈ সোমাই যোৱাৰ হাৰ বহু কম বুলি ধৰা পেলাইছে। যোৱা বছৰৰ এপ্ৰিলৰ পৰা নৱেম্বৰৰ ভিতৰত ইয়াৰ পৰিমাণ আছিল ৯ ছেণ্টিমিটাৰ। কিন্তু যোৱা ১২ দিনত উদ্বেগজনক হাৰত বৃদ্ধি পাইছে এই পৰিঘটনা।
বদ্ৰীনাথৰ দৰে জনপ্ৰিয় তীৰ্থস্থানৰ প্ৰৱেশদ্বাৰ হিচাপে পৰিচিত এই চহৰখন সম্প্ৰতি চিৰাল ফাটৰ কবলত পৰি দুৰ্যোগৰ পথত। এই অভাৱনীয় বিপৰ্যয়ৰ ফলশ্ৰুতিত উপগ্ৰহৰ সমীক্ষাৰ অন্তত প্ৰায় ৪ হাজাৰ লোকক সাহায্য শিবিৰলৈ স্থানান্তৰ কৰা হৈছে। হোটেল আৰু ব্যৱসায়িক প্ৰতিষ্ঠানৰ উপৰিও ৬৭৮টা ঘৰ বিপদত পৰিছে বুলি উত্তৰাখণ্ড চৰকাৰে প্ৰকাশ কৰিছে।
চহৰখনৰ স্থানীয় বাসিন্দা আৰু বিশেষজ্ঞসকলে এই সংকটৰ বাবে অঞ্চলটোৰ অপৰিকল্পিত আৰু বিশৃংখল আন্তঃগাঁথনি প্ৰকল্পৰ বাবে স্পষ্টকৈ দোষাৰোপ কৰিছে। বৃহস্পতিবাৰে যোশীমঠ ভ্ৰমণ কৰি স্থানীয় লোক আৰু বিশেষজ্ঞৰ সৈতে বৈঠকত মিলিত হৈ উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে ক্ষতিগ্ৰস্ত পৰিয়ালসমূহক ক্ষতিপূৰণ দিয়া হ’ব বুলি ঘোষণা কৰিছে।
ইফালে যোশীমঠৰ পিছতে এনে অনুৰূপ পৰিস্থিতিয়ে দেখা দিছে উত্তৰাখণ্ডৰ আন এখন চহৰ তেহৰী গড়ৱালতো। ভূমিস্খলনৰ ভয়াৱহতাৰ আশংকাত চহৰখনৰ স্থানীয় লোকসকলে চৰকাৰক বিষয়টোৰ ওপৰত গুৰুত্ব প্ৰদান কৰি তৎকালীনভাৱে যাৱতীয় ব্যৱস্থা গ্ৰহণ কৰিবলৈ দাবী জনাইছে।
