অজিত কুমাৰ ভূঞাৰ পাছত ৰাজ্যসভাৰ বাবে মনোনয়ন পত্ৰ সংগ্ৰহ সাংবাদিক অতনু ভূঞাৰ
অসমত খালী হৈ থকা ৰাজ্যসভাৰ তিনিখন আসনৰ তৃতীয়খন আসনত প্ৰতিদ্বন্দ্বিতা আগবঢ়াব ৰাজ্যৰ জেষ্ঠ সাংবাদিক অতুন ভূঞাই।
অতনু ভূঞাৰ হৈ বৃহস্পতিবাৰে মনোনয়ন পত্ৰ সংগ্ৰহ কৰে ডিৱাই ৩৬৫ৰ সাংবাদিক মুন গোস্বামীয়ে।
বৰ্তমান ডিৱাই-৩৬৫ৰ কনছালটিং এডিটৰ হিচাপে কাৰ্য্যনিৰ্বাহ কৰি আছে অতনু ভূঞাই।
কাইলৈ অতনু ভূঞাই মনোনয়ন পত্ৰ সংগ্ৰহ কৰাৰ সম্ভাৱনা আছে।
আনহাতে, ৰাজ্যসভাৰ তৃতীয়খন আসনৰ বাবে কংগ্ৰেছ আৰু এআইয়ুডিএফৰ উমৈহতীয়া প্ৰাৰ্থী হিচাপে প্ৰতিদ্বন্দ্বিতা আগবঢ়াব ৰাজ্যৰ আন এগৰাকী জেষ্ঠ সাংবাদিক অজিত কুমাৰ ভূঞাই।
অতনু ভূঞাক বৰ্তমানলৈ কোন কোন ৰাজনৈতিক দলে সমৰ্থন আগবঢ়াব স্পষ্ট হোৱা নাই যদিও হিমন্ত বিশ্বৰ সম্পৰ্কীয় অতনু ভূঞাই যে প্ৰত্যাহ্বান সৃষ্টি কৰিব সেয়া নিশ্চিত।
ৰাজ্যসভাৰ তৃতীয় খন আসনৰ বাবে বিজেপিয়ে প্ৰাৰ্থী প্ৰক্ষেপ নকৰে বুলি বুধবাৰে বিজেপিৰ বিধায়ক প্ৰশান্ত ফুকনে উল্লেখ কৰাৰ পাছত অতনু ভূঞালৈ কোন দলে ৰাজনৈতিক সমৰ্থন আগবঢ়াব সেয়া সময়ত স্পষ্ট হ’ব।