দুবছৰতকৈ অধিক সময় কাৰাগাৰত আৱদ্ধ থকাৰ পাছত উচ্চ ন্যায়ালয়ৰ দ্বাৰা জামিন লাভ কৰিও কাৰামুক্ত হোৱা নাই কেৰালাৰ সাংবাদিক ছিদ্দিক কাপ্পান। যোৱা বৰ্ষৰ ডিচেম্বৰ মাহত এলাহাবাদ উচ্চ ন্যায়ালয়ে কাপ্পানক জামিন প্ৰদান কৰাৰ এমাহ পাছতো কাৰাবন্দী হৈ থাকিবলগীয়া হৈছে সাংবাদিকগৰাকী। আমোলাতন্ত্ৰিক ভুলৰ বাবে জামিন পোৱাৰ এমাহৰ পাছতো কাপ্পানক মুকলি কৰা নাই বুলি জানিব পৰা গৈছে।
কালি সন্ধিয়া কাপ্পানৰ জামিনদাৰ পৰীক্ষা হোৱাৰ পিছত কাৰামুক্ত হোৱাৰ সম্ভাৱনা আছিল। কিন্তু প্ৰকাশিত খবৰ অনুসৰি, ধন সৰবৰাহ প্ৰতিৰোধৰ বিশেষ আদালতৰ জিলা ন্যায়াধীশ বাৰ কাউন্সিলৰ নিৰ্বাচনত ব্যস্ত থকাৰ বাবে মঙলবাৰে কাপ্পানক কাৰাগাৰৰ পৰা মুকলি কৰাৰ পৰা বিৰত থাকে।
উল্লেখ্য যে ২০২০ চনৰ ১৪ ছেপ্টেম্বৰত হাথৰাছৰ এখন গাঁৱত সংঘটিত হৈছিল এক নৃশংস দলবদ্ধ ধৰ্ষণকাণ্ড। চাৰিজন ব্যক্তিয়ে এগৰাকী যুৱতীক দলবদ্ধ ধৰ্ষণ কৰাৰ কিছুদিন পিছতে দিল্লীৰ এখন চিকিৎসালয়ত মৃত্যুবৰণ কৰিছিল।
এই ঘটনাৰ বিষয়ে প্ৰতিবেদন প্ৰস্তুতৰ বাবে যোৱাৰ সময়তে মালায়ালম নিউজ পৰ্টেল আজিমুখামৰ প্ৰতিবেদক তথা কেৰালা ইউনিয়ন অৱ ৱৰ্কিং জাৰ্নালিষ্টৰ (KUWJ) দিল্লী গোটৰ সম্পাদক কাপ্পানক আন তিনিজন সতীৰ্থৰ সৈতে গ্ৰেপ্তাৰ কৰা হৈছিল।
আৰক্ষীয়ে অভিযুক্ত আটাইকেইগৰাকী ব্যক্তি নিষিদ্ধ সংগঠন পপুলাৰ ফ্ৰন্ট অৱ ইণ্ডিয়া আৰু ইয়াৰ ছাত্ৰ শাখা কেম্পাছ ফ্ৰন্ট অৱ ইণ্ডিয়া (চিএফআই)ৰ সদস্য বুৰি দাবী কৰিছিল। সাম্প্ৰদায়িক বিভেদ বিয়পোৱাৰ উদ্দেশ্যে পি এফ আইৰ নিৰ্দেশত কাপ্পান হাথৰাছলৈ গৈছিল বুলি অভিযোগ তুলিছিল আৰক্ষীয়ে।
আনহাতে ছিদ্দিক কাপ্পান আৰু তেওঁৰ অধিবক্তাই বাৰে বাৰে সন্ত্ৰাসবাদী কাৰ্য বা বিত্তীয় সাহায্যৰ সৈতে জড়িত সকলো অভিযোগ অস্বীকাৰ কৰিছিল আৰু কেৱল সংবাদ সংগ্ৰহৰ বাবে হাথৰাছলৈ গৈছিল বুলি স্পষ্ট কৰি দিছিল।
আৰক্ষীয়ে আটাইকেইগৰাকীৰ বিৰুদ্ধে বেআইনী কাৰ্যকলাপ (প্ৰতিৰোধ) আইনৰ ধাৰা ১৭ আৰু ১৮, ভাৰতীয় দণ্ডবিধিৰ ধাৰা ১২৪ এ, ১৫৩এ আৰু ২৯৫ এ- ৰ লগতে তথ্য প্ৰযুক্তি আইনৰ ধাৰা ৬৫, ৭২ আৰু ৭৫ ৰ অধীনত গোচৰ ৰুজু কৰিছিল।
ইয়াৰ পাছতো ২০২১ চনৰ ফেব্ৰুৱাৰী মাহত এনফৰ্চমেণ্ট ডাইৰেক্টৰেটে কাপ্পানৰ বিৰুদ্ধে শেহতীয়াকৈ নিষিদ্ধ ঘোষিত হোৱা ইছলামিক সংগঠন পপুলাৰ ফ্ৰণ্ট অৱ ইণ্ডিয়াৰ পৰা ধন লাভ কৰা বুলি অভিযোগ উত্থাপন কৰি ধন সৰবৰাহৰ গোচৰ ৰুজু কৰিছিল।
যোৱা বৰ্ষৰ ছেপ্টেম্বৰ মাহত উচ্চতম ন্যায়ালয়ে কাপ্পানক বেআইনী কাৰ্যকলাপ প্ৰতিৰোধ আইন (UAPA) আৰু অন্যান্য আনুষংগিক আইন অনুসৰি দাখিল কৰা সন্ত্ৰাসবাদৰ সৈতে থকা সম্বন্ধৰ গোচৰত জামিন প্ৰদান কৰে। আনহাতে ডিচেম্বৰ মাহত এলাহাবাদ উচ্চ ন্যায়ালয়ৰ পৰা ধন সৰবৰাহৰ গোচৰত জামিন লাভ কৰিছিল কাপ্পানে।
উল্লেখ্য যে কাপ্পানৰ দীঘলীয়া কাৰাবাস আৰু এই সময়ছোৱাত তেওঁৰ পৰিয়ালে সন্মুখীন হোৱা অপ্ৰীতিকৰ পৰিস্থিতিৰ বাবে বিশ্বব্যাপী প্ৰতিক্ৰিয়াৰ সৃষ্টি হৈছে। কাপ্পানৰ এই কাৰাবাসক ভাৰতৰ ক্ৰমাৎ সংবাদ মাধ্যমৰ স্বাধীনতা হ্ৰাস হোৱাৰ এক এক স্পষ্ট উদাহৰণ বুলিও অভিযোগ উঠিছিল।
কাপ্পানে জামিন আবেদনত স্বতন্ত্ৰতাৰ অধিকাৰ লগতে স্বতন্ত্ৰ মাধ্যমত মত প্ৰকাশ আৰু বাক স্বাধীনতা সম্পৰ্কীয় প্ৰাথমিক সাংবিধানিক অধিকাৰৰ প্ৰশ্ন উত্থাপন কৰিছিল। তেওঁক গ্ৰেপ্তাৰৰ পাছতে উত্তৰ প্ৰদেশৰ শাসকীয় বিজেপি চৰকাৰে মুছলমান হোৱাৰ বাবেই কাপ্পানক লক্ষ্য কৰি লৈছিল বুলি অভিযোগ উঠিছিল।
