‘’আলফা উগ্ৰবাদ, তাৰ পৰা আঁতৰি থকাটো উচিত’’-ৰহাৰ সীতা জখলাত বুধবাৰে নন্দুলাল ৰাজ্যিক কৃষি বঁটা প্ৰদান ২০১৮’ অনুষ্ঠান উপলক্ষে আয়োজন কৰা এক সংগীতানুষ্ঠানত অংশগ্ৰহণ কৰি অনুষ্ঠানৰ শেষত এই মন্তব্য কৰে জনপ্ৰিয় কন্ঠশিল্পী জুবিন গাৰ্গে।
প্ৰণিধানযোগ্য যে, আলফাৰ প্ৰতি অনুপ্ৰাণিত হৈ বহু যুৱক-যুৱতীয়ে ইতিমধ্যে আলফাত যোগদান কৰাৰ বাবে সংবাদ মাধ্যমৰ আগত উদ্বিগ্নতা প্ৰকাশ কৰে জনপ্ৰিয় শিল্পী জুবিন গাৰ্গে।
সংবাদ মাধ্যমৰ আগত তেওঁ কয়, ‘‘কাৰ পৰা প্ৰেৰণা লাভ কৰি আলফালৈ যুৱক-যুৱতী গৈছে মই নাজানো।‘’
আনহাতে, ‘’এসময়ত বহু যুৱক-যুৱতী আলফাৰ পৰা ঘুৰি আহিল’’ বুলিও মন্তব্য কৰে জুবিন গাৰ্গে।
তদুপৰি তেওঁ কয়, ‘’এজন শিল্পী হিচাপে আলফাৰ পৰা ঘুৰি অহাটোৱেই কামনা কৰো।‘’
আনহাতে, শান্তি আলোচনাৰ মাজেদিহে সমস্যাৰ সমাধান হ’ব বুলিও তেওঁ সংবাদ মাধ্যমৰ আগত মন্তব্য কৰে।
তেওঁ লগতে কয়, ‘’পৰেশ বৰুৱাৰ সৈতে মাজে সময়ে কথা-বতৰা হয়, মই তেওঁক সদায় উভতি আহিলে ভাল পাম বুলি কওঁ।‘’
অৱশ্যে পৰেশ বৰুৱাই মাজে-সময়ে জনপ্ৰিয় কন্ঠশিল্পীগৰাকীলৈ তথা তেওঁৰ পত্নীলৈ মাজে-সময়ে ফোনযোগে খবৰ-খাটি লয় বুলিও তেওঁ সংবাদমাধ্যমৰ আগত মন্তব্য কৰে।
উল্লেখযোগ্য যে, যোৱাবছৰ জুবিন গাৰ্গৰ হিন্দী গীতৰ বিতৰ্কৰ সময়ত সংবাদমাধ্যমলৈ টেলিফোনিক বাৰ্তাৰ জৰিয়তে ‘’জুবিন গাৰ্গ এতিয়াও শিল্পীৰ তালিকালৈ উত্তীৰ্ণ হোৱা নাই, তেওঁ গায়কেই হৈ আছে’’ বুলিও মন্তব্য কৰিছিল আলফাৰ সেনাপ্ৰধান পৰেশ বৰুৱাই। তেওঁ লগতে জুবিন গাৰ্গক অলপ সংশোধন হোৱাৰ বাবেও আহ্বান জনাইছিল। তাৰ বিপৰীতে জুবিন গাৰ্গে কাকো খাতিৰ নকৰো বুলি কৈছিল।
আনহাতে, চহিদ আৰক্ষী বিষয়া ভাস্কৰ কলিতাৰ মৃত্যুৰ পাছত ৰহাৰ এক সংগীতানুষ্ঠানত শোকস্তব্ধ জুবিন গাৰ্গে ‘’ভাতৃঘাতী সংঘৰ্ষ নিবিচাৰো, শান্তি লাগে’’ বুলি মন্তব্য কৰিছিল।
তাৰ বিপৰীতে পুনৰ পৰেশ বৰুৱাক সেই একে ৰহা অঞ্চলতে শান্তি আলোচনালৈ ঘুৰি আহিবলৈ জনোৱা আহ্বানে বিশেষ তাৎপৰ্য্য বহন কৰিছে।
