জুবিন গাৰ্গৰ মৃত্যুৰ গোচৰৰ তদন্তই বৰ্তমান এক নতুন মোৰ লৈছে, য’ত জনপ্ৰিয় কণ্ঠশিল্পীজনৰ দুই দেহৰক্ষী নন্দেশ্বৰ বৰা আৰু পৰেশ বৈশ্যৰ বিৰুদ্ধে ভয়ংকৰ বিত্তীয় প্ৰৱঞ্চনাৰ অভিযোগ উত্থাপন হৈছে।
বিশেষ তদন্তকাৰী সংস্থা চমুকৈ SIT-এ আদালতত দাখিল কৰা তথ্য অনুসৰি, ২০১৮ চনৰ পৰা জুবিনৰ সৈতে থকা নন্দেশ্বৰ বৰাৰ বেংক একাউণ্টত ২০২৫ চনলৈকে তেওঁৰ চৰকাৰী দৰমহাতকৈ ২২০ শতাংশ অধিক ধন জমা হৈছিল। এই সময়ছোৱাত নন্দেশ্বৰৰ একাউণ্টত প্ৰায় ৪৫,৩০,১৩৩ টকা জমা হোৱা পৰিলক্ষিত হৈছে, যাৰ ভিতৰত কৃষাণু দাস, মৃদুপৱন পাঠক আৰু ৰীদিপ দাস নামৰ ব্যক্তিৰ পৰা লাভ কৰা বৃহৎ পৰিমাণৰ ধন অন্তৰ্ভুক্ত আছে।
বিশেষভাৱে লক্ষণীয় যে ধন জমা দিয়া এই ব্যক্তিসকল সিদ্ধাৰ্থৰ ঘনিষ্ঠ আছিল আৰু এই সকলো ধন আছিল প্ৰয়াত জুবিন গাৰ্গৰ, যিখিনি পৰৱৰ্তী সময়ত নন্দেশ্বৰে শিল্পীজনক ওভতাই দিয়া নাছিল।
একেদৰেই আন এজন দেহৰক্ষী পৰেশ বৈশ্যৰ একাউণ্টতো ২০২২ চনৰ পৰা ২০২৫ চনৰ ভিতৰত ৩৬,৯৩,৩৩৯ টকাৰ অস্বাভাৱিক লেনদেন ধৰা পৰিছে, য’ত ১৫ লাখ টকাৰ ঋণ আৰু ১৮ লাখ টকাৰ চুইপ ক্ৰেডিটৰ তথ্য পোহৰলৈ আহিছে।
এই সমগ্ৰ বিত্তীয় খেলিমেলাৰ প্ৰতিবেদন SIT-এ আদালতত জমা দিয়াৰ বিপৰীতে আজি জুবিন গাৰ্গৰ মৃত্যুৰ গোচৰৰ এক গুৰুত্বপূৰ্ণ শুনানিও সম্পন্ন হয়। উকীল সন্থাৰ সাধাৰণ সম্পাদক অপূৰ্ব শৰ্মাই সংবাদ মাধ্যমৰ আগত সদৰী কৰা মতে, শ্যামকানু মহন্ত আৰু সিদ্ধাৰ্থই দাখিল কৰা আবেদনসমূহৰ শুনানি ইতিমধ্যে সমাপ্ত হৈছে আৰু অহা ১৬ ফেব্ৰুৱাৰীত আদালতে এই সন্দৰ্ভত ৰায়দান কৰিব।
অৱশ্যে আইনী প্ৰক্ৰিয়াৰ লেহেমীয়া গতিৰ প্ৰতি উদ্বেগ প্ৰকাশ কৰি শৰ্মাই কয় যে নথি-পত্ৰ আদান-প্ৰদানৰ নামতেই অধিক সময় অতিবাহিত হৈছে, যাৰ ফলত ৰায়দানলৈ ২০ বছৰ পৰ্যন্ত পলম হোৱাৰ সম্ভাৱনা আছে। সেয়েহে গোচৰটোৰ দ্ৰুত নিষ্পত্তিৰ বাবে তেওঁলোকে আদালতত দৈনন্দিন ভিত্তিত শুনানি গ্ৰহণৰ বাবে বাৰে বাৰে আহ্বান জনাই আহিছে।
