ভাৰতীয় ন্যায়পালিকাৰ স্বতন্ত্ৰতা ৰক্ষাৰ ক্ষেত্ৰত এক বলিষ্ঠ স্থিতি গ্ৰহণ কৰি উচ্চতম ন্যায়ালয়ৰ ন্যায়াধীশ উজ্জ্বল ভূঞাই শেহতীয়াকৈ কাৰ্যপালিকাৰ হস্তক্ষেপক লৈ গভীৰ উদ্বেগ প্ৰকাশ কৰিছে। কেন্দ্ৰীয় চৰকাৰৰ অনুৰোধত উচ্চ ন্যায়ালয়ৰ এজন ন্যায়াধীশৰ বদলিৰ প্ৰস্তাৱ সলনি কৰাৰ কলেজিয়ামৰ শেহতীয়া সিদ্ধান্তক সমালোচনা কৰি তেওঁ কয় যে ন্যায়িক নিযুক্তি আৰু বদলিৰ প্ৰক্ৰিয়াটো সম্পূৰ্ণৰূপে ৰাজনৈতিক তথা চৰকাৰী প্ৰভাৱৰ পৰা মুক্ত হোৱা উচিত।
পুনেৰ আই.এল.এছ. ল কলেজত (ILS Law College) ‘সাংবিধানিক নৈতিকতা আৰু গণতান্ত্ৰিক শাসন’ শীৰ্ষক এক স্মাৰক বক্তৃতাত ন্যায়াধীশ ভূঞাই কয় যে, যদি চৰকাৰৰ বিৰুদ্ধে কোনো অস্বস্তিকৰ ৰায়দান কৰাৰ বাবেই ন্যায়াধীশসকলক বদলি কৰা হয়, তেন্তে ই গণতন্ত্ৰৰ এক মূল স্তম্ভ অৰ্থাৎ ন্যায়পালিকাৰ স্বতন্ত্ৰতাৰ প্ৰতি চৰম ভাবুকি কঢ়িয়াই আনিব।
ভাষণ প্ৰসংগত তেওঁ উল্লেখ কৰে যে কলেজিয়ামে যেতিয়া চৰকাৰৰ অনুৰোধত কোনো বদলিৰ প্ৰস্তাৱ সলনি কৰে, তেতিয়া ই এক স্বতন্ত্ৰ প্ৰক্ৰিয়াত কাৰ্যপালিকাৰ হস্তক্ষেপৰ স্পষ্ট ইংগিত দিয়ে। তেওঁ প্ৰশ্ন কৰে যে “চৰকাৰৰ বিৰুদ্ধে কোনো অস্বস্তিকৰ ৰায়দান কৰাৰ বাবেই এজন ন্যায়াধীশক কিয় বদলি কৰা হ’ব লাগে? ই জানো ন্যায়পালিকাৰ স্বতন্ত্ৰতাক আঘাত নকৰে?”
উল্লেখ্য যে, অলপতে উচ্চতম ন্যায়ালয়ৰ কলেজিয়ামে মধ্যপ্ৰদেশ উচ্চ ন্যায়ালয়ৰ ন্যায়াধীশ অতুল শ্ৰীধৰণক ছত্তীশগড়ৰ পৰিৱৰ্তে এলাহাবাদ উচ্চ ন্যায়ালয়লৈ বদলি কৰাৰ পৰামৰ্শ দিছিল। কলেজিয়ামৰ প্ৰস্তাৱত স্পষ্টকৈ উল্লেখ আছিল যে এই পৰিৱৰ্তন ‘চৰকাৰৰ অনুৰোধত’ কৰা হৈছে। এই সন্দৰ্ভতে ন্যায়াধীশ ভূঞাই প্ৰতিক্ৰিয়া ব্যক্ত কৰি কয় যে বদলি কেৱল ‘ন্যায় প্ৰদানৰ স্বাৰ্থত’হে হ’ব লাগে; ইয়াক ন্যায়াধীশসকলক শাস্তি দিয়াৰ মাধ্যম হিচাপে কেতিয়াও ব্যৱহাৰ কৰিব নালাগে।
তেওঁ আৰু কয় যে কলেজিয়াম ব্যৱস্থাটো গঠন কৰাই হৈছিল যাতে ন্যায়িক নিযুক্তিত চৰকাৰী হস্তক্ষেপ ৰোধ কৰিব পৰা যায়। যদি এতিয়া সেই ব্যৱস্থাই চৰকাৰৰ নিৰ্দেশত চলে, তেন্তে ইয়াৰ গৰিমা লাঘৱ হ’ব। লগতে তেওঁ সকীয়াই দিয়ে যে ন্যায়ালয়ৰ স্বতন্ত্ৰতাৰ প্ৰতি ভাবুকি কেতিয়াবা ‘ভিতৰৰ পৰাও’ আহিব পাৰে। গতিকে ন্যায়াধীশসকল সদায় ৰাজনৈতিক বা মতাদৰ্শগত পক্ষপাতিত্বৰ পৰা মুক্ত থকাটো একান্তই জৰুৰী।
ন্যায়াধীশগৰাকীয়ে আক্ষেপেৰে কয় যে “গণতন্ত্ৰৰ বাবে ই এক অতি দুখজনক দিন হ’ব যদিহে কোনো এটা গোচৰৰ ফলাফল কেৱল শুনানি গ্ৰহণ কৰা বিচাৰপীঠখনৰ মুখ চাই আগতীয়াকৈ অনুমান কৰিব পৰা যায়।” তেওঁ পুনৰ জোৰ দি কয় যে ন্যায়পালিকাৰ অখণ্ডতা যিকোনো মূল্যৰ বিনিময়ত ৰক্ষা কৰিবই লাগিব, কাৰণ এক স্বতন্ত্ৰ ন্যায়পালিকা গণতন্ত্ৰৰ বাবে অপৰিহাৰ্য।
