দদৰা এছ বি আইৰ বেংক বিষয়া জুনু শৰ্মাৰ হত্যাকাণ্ড সন্দৰ্ভত তদন্ত চলাই থকা মহানগৰ আৰক্ষীয়ে শাখাটোত সংঘটিত বিত্তীয় কেলেংকাৰীৰ ফাইল বিচাৰি দদৰা এছ বি আই শাখাৰ মেনেজাৰক জেৰা কৰিছে।
আজি আৰক্ষী প্ৰয়াত জুনু শৰ্মাই কাম কৰা এছ বি আইৰ উক্ত শাখাটোত উপস্থিত হৈ বহু প্ৰশ্নৰ উত্তৰ বিচাৰি অভিযান চলায়। উক্ত অভিযানত তেওঁলোকে বেংকটোৰ মেনেজাৰ পূৰ্ণ সিংহাক বিত্তীয় কেলেংকাৰীৰ ফাইল বিচাৰি জেৰা কৰাৰ লগতে জুনু শৰ্মা কি কি দায়িত্বত আছিল উক্ত দিনা তেওঁ কিমান সময়ত বেংকলৈ আহিছিল বেংকৰ পৰা কিমান সময়ত ওলাই গৈছিল আদি বিষয়ে সোধপোচ কৰে।
উল্লেখযোগ্য যে ৯ অক্তোবৰত সংঘটিত চাঞ্চল্যকৰ জুনু শৰ্মাৰ হত্যাকাণ্ড সন্দৰ্ভত অসম আৰক্ষীয়ে তদন্ত চলাই আছে যদিও এতিয়ালৈকে হত্যাকাৰীৰ কোনো শুংসূত্ৰ উলিয়াবলৈ সক্ষম হোৱা নাই।
এক বিশেষ সূত্ৰত প্ৰকাশ পোৱা মতে তেওঁ কাম কৰা বেংকটোত সংঘটিত বৃহৎ বিত্তীয় কেলেংকাৰীৰ সৈতে জড়িত এক দালাল চক্ৰই জুনু শৰ্মাক হত্যা কৰিছে। সূত্ৰটোৰ মতে ভাৰতীয় ষ্টেট বেংকৰ দদৰা শাখাত দীৰ্ঘদিনৰ পৰা সক্ৰিয় হৈ থকা এটা বৃহৎ দালাল চক্ৰটোৱে তেওঁক গুলীয়াই হত্যা কৰে।