বিহাৰৰ বৈশালী জিলা আদালতে এক ঐতিহাসিক ৰায়দান প্ৰদান কৰিছে । ১৯৯২ চনত ৰুজু হোৱা এটা প্ৰাণঘাতী আক্ৰমণৰ গোচৰত সুদীৰ্ঘ ৩৪ বছৰৰ পাছত ২০২৬ চনত আদালতে নিজৰ চূড়ান্ত ৰায়দান দিছে। সোমবাৰে আদালতে গোচৰটোৰ শুনানি গ্ৰহণ কৰি অভিযুক্ত দীপ ৰায় ওৰফে জিচা ৰায়ক দোষী সাব্যস্ত কৰে আৰু ৰায় সংৰক্ষিত ৰাখে। মঙলবাৰে চূড়ান্ত শুনানিৰ অন্তত আদালতে এই গোচৰত ৮৫ বছৰীয়া বৃদ্ধ অভিযুক্তজনক ৩ বছৰৰ সশ্ৰম কাৰাদণ্ডৰ শাস্তি প্ৰদান কৰে।
এই সমগ্ৰ ঘটনাটো বৈশালী জিলাৰ জুৰাৱনপুৰ থানা এলেকাৰ। প্ৰায় চাৰে তিনি দশক পূৰ্বে, অৰ্থাৎ ১৯৯২ চনৰ ১০ মে’ তাৰিখে মাটিৰ বিবাদ আৰু পাৰস্পৰিক শত্ৰুতাৰ বাবে এই ভয়ংকৰ ঘটনাটো সংঘটিত হৈছিল। সেই সময়ত অভিযুক্ত দীপ ৰায়কে ধৰি মুঠ ৫ জন লোকে ভুক্তভোগী পৰিয়ালটোৰ ওপৰত গুলীচালনা কৰি প্ৰাণঘাতী আক্ৰমণ চলাইছিল। এই ঘটনাত ভুক্তভোগী লোকসকল বেয়াকৈ আহত হৈছিল। আৰক্ষীৰ তদন্তৰ পাছত ১৯৯৩ চনত আদালতত চাৰ্জশ্বীট দাখিল কৰা হৈছিল য’ত ৫ জন লোকক অভিযুক্ত কৰা হৈছিল। কিন্তু তিনি দশক ধৰি চলা এই দীঘলীয়া বিচাৰ প্ৰক্ৰিয়াত বাকী চাৰ্জন অভিযুক্তৰ মৃত্যু হয়।
আৰক্ষীয়ে অভিযুক্তৰ বিৰুদ্ধে প্ৰাণঘাতী আক্ৰমণ অৰ্থাৎ হাফ মাৰ্ডাৰ আৰু অস্ত্ৰ আইনৰ অধীনত গুৰুতৰ গোচৰ ৰুজু কৰিছিল। যেতিয়া এই অপৰাধ সংঘটিত হৈছিল, তেতিয়া অভিযুক্তজন এজন যুৱক আছিল। কিন্তু যেতিয়া তেওঁক শাস্তি প্ৰদান কৰা হ’ল, তেতিয়া তেওঁৰ বয়স ৮৫ বছৰ হৈ গৈছে আৰু তেওঁ আনৰ সহায় নোহোৱাকৈ খোজ কাঢ়িবলৈকো অসমৰ্থ। আদালতে তেওঁক ভাৰতীয় দণ্ডবিধিৰ ধাৰা ১৪৭, ১৪৮, ৩০৭ (প্ৰাণঘাতী আক্ৰমণ) আৰু ২৭ অস্ত্ৰ আইনৰ অধীনত গুৰুতৰ অপৰাধত দোষী সাব্যস্ত কৰিছে।
বৈশালী আদালতৰ অতিৰিক্ত জিলা আৰু সত্ৰ ন্যায়াধীশ মনোজ কুমাৰ তিৱাৰীৰ আদালতে এই ঐতিহাসিক ৰায়দান কৰি ৮৫ বছৰীয়া বৃদ্ধ অভিযুক্তজনক ১৯৯২ চনৰ সেই আক্ৰমণৰ মূল দোষী বুলি সাব্যস্ত কৰে। আদালতে অভিযুক্তজনৰ বয়স আৰু স্বাস্থ্যৰ প্ৰতি লক্ষ্য ৰাখি, আইনৰ গণ্ডীৰ ভিতৰত থাকি তেওঁক ৩ বছৰৰ সশ্ৰম কাৰাদণ্ড আৰু আৰ্থিক জৰিমনা বিহে।
