জম্মু-কাশ্মীৰৰ বিশেষ মৰ্যাদা প্ৰদান কৰা ৩৭০ নং অনুচ্ছেদ বাতিল, বিহাৰৰ নিৰ্বাচনী তালিকা পুনৰীক্ষণ আৰু পেগাছাছ স্পাইৱেৰ গোচৰৰ তদন্তৰ নিৰ্দেশৰ দৰে কেইবাটাও গুৰুত্বপূৰ্ণ ৰায়দানৰ অংশীদাৰ ন্যায়াধীশ সূৰ্য কান্তই কাইলৈ (সোমবাৰ, ২৪ নৱেম্বৰ ২০২৫) ভাৰতৰ ৫৩ সংখ্যক মুখ্য ন্যায়াধীশ হিচাপে শপত গ্ৰহণ কৰিব।
তেওঁ আজি সন্ধিয়া অৱসৰ গ্ৰহণ কৰিবলগীয়া মুখ্য ন্যায়াধীশ বি. আৰ. গাভাইৰ স্থলাভিষিক্ত হ’ব।
যোৱা ৩০ অক্টোবৰত পৰৱৰ্তী মুখ্য ন্যায়াধীশ হিচাপে নিযুক্তি পোৱা ন্যায়াধীশ কান্ত প্ৰায় ১৪ মাহ এই পদত অধিষ্ঠিত থাকিব। ৬৫ বছৰ বয়সত উপনীত হোৱাৰ পিছত ২০২৭ চনৰ ৯ ফেব্ৰুৱাৰীত তেওঁ অৱসৰ গ্ৰহণ কৰিব।
১৯৬২ চনৰ ১০ ফেব্ৰুৱাৰীত হাৰিয়ানাৰ হিছাৰ জিলাৰ এক মধ্যবিত্ত পৰিয়ালত জন্মগ্ৰহণ কৰা ন্যায়াধীশ কান্তই এখন সৰু চহৰৰ অধিবক্তাৰ পৰা দেশৰ সৰ্বোচ্চ ন্যায়ালয়ৰ শীৰ্ষ পদলৈ যাত্ৰা কৰিছে। তেওঁ ইতিমধ্যে ৰাষ্ট্ৰীয় গুৰুত্বপূৰ্ণ আৰু সাংবিধানিক বিষয়ৰ কেইবাটাও ৰায়দান আৰু আদেশৰ অংশ হৈ পৰিছে। উল্লেখ্য যে, তেওঁ ২০১১ চনত কুৰুক্ষেত্ৰ বিশ্ববিদ্যালয়ৰ পৰা আইন বিষয়ত স্নাতকোত্তৰ ডিগ্ৰী লাভ কৰাৰ লগতে ‘প্ৰথম শ্ৰেণীৰ প্ৰথম’ স্থান অধিকাৰ কৰিছিল।
পঞ্জাৱ আৰু হাৰিয়ানা উচ্চ ন্যায়ালয়ত কেইবাটাও উল্লেখযোগ্য ৰায়দান কৰা ন্যায়াধীশ কান্তক ২০১৮ চনৰ ৫ অক্টোবৰত হিমাচল প্ৰদেশ উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়া হৈছিল।
উচ্চতম ন্যায়ালয়ৰ ন্যায়াধীশ হিচাপে তেওঁৰ কাৰ্যকালত ৩৭০ অনুচ্ছেদ বাতিল, বাক স্বাধীনতা আৰু নাগৰিকত্বৰ অধিকাৰ সম্পৰ্কীয় গুৰুত্বপূৰ্ণ ৰায়দান প্ৰদান কৰা হৈছে।
শেহতীয়াকৈ ৰাজ্যিক বিধানসভাই গৃহীত কৰা বিধেয়কসমূহৰ ক্ষেত্ৰত ৰাজ্যপাল আৰু ৰাষ্ট্ৰপতিৰ ক্ষমতাৰ পৰিসৰ সম্পৰ্কে বিচাৰ কৰা বিচাৰপীঠৰো তেওঁ অংশ আছিল। এই ৰায়দানৰ প্ৰভাৱ সুদূৰপ্ৰসাৰী হ’ব বুলি ধাৰণা কৰা হৈছে।
ঔপনিৱেশিক যুগৰ দেশদ্ৰোহ আইন স্থগিত ৰখা বিচাৰপীঠৰো তেওঁ সদস্য আছিল, যিয়ে চৰকাৰী পৰ্যালোচনা নোহোৱালৈকে এই আইনৰ অধীনত কোনো নতুন এফআইআৰ (FIR) পঞ্জীয়ন নকৰিবলৈ নিৰ্দেশ দিছিল।
বিহাৰত ভোটাৰ তালিকাৰ বিশেষ নিবিড় পুনৰীক্ষণ (SIR) গ্ৰহণৰ সিদ্ধান্তক প্ৰত্যাহ্বান জনোৱা আবেদনৰ শুনানিৰ সময়ত ন্যায়াধীশ কান্তই খচৰা নিৰ্বাচনী তালিকাৰ পৰা বাদ পৰা ৬৫ লাখ ভোটাৰৰ সবিশেষ প্ৰকাশ কৰিবলৈও নিৰ্বাচন আয়োগক নিৰ্দেশ দিছিল।
তৃণমূল পৰ্যায়ৰ গণতন্ত্ৰ আৰু লিংগ ন্যায়ৰ ওপৰত গুৰুত্ব আৰোপ কৰি তেওঁ এগৰাকী মহিলা সৰ্পঞ্চক পুনৰ নিযুক্তি দিয়া বিচাৰপীঠৰ নেতৃত্ব দিছিল, যাক অবৈধভাৱে পদৰ পৰা অপসাৰণ কৰা হৈছিল। এই ৰায়ত তেওঁ বিষয়টোত থকা লিংগ বৈষম্যৰ বিৰুদ্ধে কঠোৰ স্থিতি গ্ৰহণ কৰিছিল।
উচ্চতম ন্যায়ালয়ৰ বাৰ এছ’চিয়েশ্যনকে ধৰি আন বাৰ এছ’চিয়েশ্যনসমূহত এক তৃতীয়াংশ আসন মহিলাৰ বাবে সংৰক্ষিত কৰিবলৈ নিৰ্দেশ দিয়াৰ কৃতিত্বও তেওঁৰ প্ৰাপ্য।
২০২২ চনত প্ৰধানমন্ত্ৰী নৰেন্দ্ৰ মোদীৰ পঞ্জাৱ ভ্ৰমণৰ সময়ত হোৱা নিৰাপত্তা ভংগৰ তদন্তৰ বাবে শীৰ্ষ আদালতৰ প্ৰাক্তন ন্যায়াধীশ ইন্দু মালহোত্ৰাৰ নেতৃত্বত পাঁচজনীয়া কমিটী গঠন কৰা বিচাৰপীঠৰ তেওঁ অংশ আছিল। তেওঁ মন্তব্য কৰিছিল যে এনে বিষয়ৰ বাবে “এটা ন্যায়িকভাৱে প্ৰশিক্ষিত মন”ৰ প্ৰয়োজন।
তেওঁ প্ৰতিৰক্ষা বাহিনীৰ বাবে ‘ৱান ৰেংক-ৱান পেঞ্চন’ (OROP) আঁচনিখনকো সাংবিধানিকভাৱে বৈধ বুলি ৰায় দিছিল আৰু সশস্ত্ৰ বাহিনীৰ মহিলা বিষয়াসকলৰ স্থায়ী কমিচনত সমতা বিচৰা আবেদনৰ শুনানি গ্ৰহণ কৰি আহিছে।
১৯৬৭ চনৰ আলিগড় মুছলিম বিশ্ববিদ্যালয়ৰ ৰায়কলৈ গঠিত সাতজনীয়া বিচাৰপীঠত ন্যায়াধীশ কান্ত আছিল, যাৰ ফলত শেহতীয়াকৈ প্ৰতিষ্ঠানটোৰ সংখ্যালঘুৰ মৰ্যাদাৰ পুনৰ বিবেচনাৰ পথ মুকলি হৈছে।
পেগাছাছ স্পাইৱেৰ গোচৰৰ শুনানি গ্ৰহণ কৰা আৰু অবৈধ চোৱাচিতাৰ অভিযোগৰ তদন্তৰ বাবে চাইবাৰ বিশেষজ্ঞৰ এটা পেনেল নিযুক্তি দিয়া বিচাৰপীঠৰো তেওঁ অংশ আছিল। তেওঁ স্পষ্টকৈ কৈছিল যে চৰকাৰে কেৱল “ৰাষ্ট্ৰীয় নিৰাপত্তাৰ দোহাই দি সাৰি যাব নোৱাৰে” (National security cannot be a free pass)।
