Justice U U Lalit sworn in ন্যায়াধীশ উদয় উমেশ ললিতে শনিবাৰে ভাৰতৰ ৪৯ তম মুখ্য ন্যায়াধীশ হিচাপে শপত গ্ৰহণ কৰে। ৰাষ্ট্ৰপতি দ্ৰৌপদী মুৰ্মুৱে ন্যায়াধীশ ইউ ইউ ললিতক শপত গ্ৰহণ কৰায়। ৬৪ বছৰীয়া ন্যায়াধীশ ইউ ইউ ললিতে তেওঁৰ কৰ্মজীৱনত ন্যায়িক ব্যৱস্থাৰ বিভিন্ন ক্ষেত্ৰত উজ্জ্বল পদক্ষেপৰ এক উদাহৰণ স্থাপন কৰিছে।
অৱশ্যে,মুখ্য ন্যায়াধীশ হিচাপে তেওঁৰ কাৰ্যকাল অতি চমু। তেওঁ অহা ৮ নৱেম্বৰত অৱসৰ গ্ৰহণ কৰিব।
ইউ ইউ ললিতে মুম্বাইৰ আইন মহাবিদ্যালয়ত অধ্যয়ন কৰিছিল। তেওঁ ১৯৮৫ চনলৈকে বোম্বাই উচ্চ ন্যায়ালয়ত ওকালতি কৰিছিল। তেওঁ ১৯৮৬ চনত দিল্লীলৈ গুচি গৈছিল। ১৯৮৬ চনৰ পৰা ১৯৯২ চনলৈ তেওঁ প্ৰাক্তন এটৰ্নি জেনেৰেল ছলি জে ছোৰাবজীৰ সৈতে কাম কৰিছিল।
ন্যায়াধীশ ইউইউ ললিতে পূৰ্বে ২জি গোচৰত চিবিআইৰ চৰকাৰী অধিবক্তাৰ ভূমিকা পালন কৰিছিল। আজি তেওঁ দেশৰ মুখ্য ন্যায়াধীশ হিচাপে শপত গ্ৰহণ কৰে।
তেওঁ দেশৰ দ্বিতীয়গৰাকী মুখ্য ন্যায়াধীশ যিয়ে বাৰৰ পৰা পোনপটীয়াকৈ শীৰ্ষ ন্যায়ালয়ৰ বিচাৰপীঠত বহিছে। ইয়াৰ পূৰ্বে দেশৰ ১৩তম মুখ্য ন্যায়াধীশ এছ এম চিক্ৰীয়ে বাৰৰ পৰা দেশৰ ন্যায়িক ব্যৱস্থাৰ শীৰ্ষস্থানত বহিছিল।
দায়িত্ব লোৱাৰ পূৰ্বে ন্যায়াধীশ ললিতে কয় যে তেওঁ যিমান সম্ভৱ সৰলতা আৰু স্বচ্ছতাৰ বিষয়টোক অগ্ৰাধিকাৰ দিব। তেওঁ সংশ্লিষ্ট আদালতত মুক্তভাৱে উত্থাপন কৰিব পৰা যিকোনো জৰুৰী বিষয়ৰ ওপৰত নজৰ ৰাখিব বুলিও আশ্বাস দিছে।
দেশৰ মুখ্য ন্যায়াধীশ ইউ ইউ ললিতে লগতে কয় যে এখন সাংবিধানিক বিচাৰপীঠ গোটেই বছৰটো কাৰ্যকৰী হৈ থকাটো নিশ্চিত কৰিবলৈ তেওঁ পদক্ষেপ ল’ব।
