কলিয়াবৰৰ আৰক্ষীৰ জালত পৰিছে পাঁচজন জুৱাৰী। জুৱা চক্ৰৰ সৈতে জড়িত এই লোককেইজনক নিশাই আটক কৰে আৰক্ষীৰ এটা যৌথ অভিযানকাৰী দলে।
কলিয়াবৰ থানা, উলুৱনী থানা, চুলুং টহলদাৰী আৰক্ষী চকী আৰু কলিয়াবৰ মহকুমা আৰক্ষী বিষয়াৰ যুটীয়া অভিযানত দেওবাৰে নিশা কলিয়াবৰৰ লগতে চামগুৰিৰ বিভিন্ন স্থানৰ পৰা পাঁচ জুৱাৰীক আটক কৰিবলৈ সক্ষম হয়।
আটকাধীন জুৱাৰী কেইটাৰ এজনৰ ঘৰ উলুৱনীত হোৱাৰ বিপৰীতে চাৰিজনৰ ঘৰ চামগুৰি থানাৰ অন্তৰ্গত এলেকাত।
আটকাধীন জুৱাৰী কেইজন হ’ল উলুৱনীৰ দিলীপ চাহু, চামগুৰিৰ নিৰঞ্জন বৰা, আদিত্য নাৰায়ন দাস, আইনুল হক আৰু খাটোৱালৰ নুৰুল নবি।
ইতিমধ্যে আৰক্ষীয়ে সোধপোছৰ অন্তত উলুৱনী থানাত ৬৯/২০২১ নম্বৰত ১৪ নম্বৰ ধাৰাত গোচৰ ৰুজু কৰি আটাইকেইজনকে জেল হাজোতলৈ প্ৰেৰণ কৰিছে।