২৪ ডিচেম্বৰত বজালী মহকুমাৰ অন্তৰ্গত সৰুপেটাত হৈ যোৱা C(A)A বিৰোধী প্ৰতিবাদী মঞ্চত শিল্পী জুবিন গাৰ্গে কলিতা জনগোষ্ঠীক লৈ কৰা মন্তব্য সন্দৰ্ভত যি ভুল বুজাবুজি হৈছিল সেই ক্ষেত্ৰত কলিতা জনগোষ্ঠী ছাত্ৰ সন্থাই এক ইতিবাচক চিন্তাত আগবাঢ়িছে বুলি প্ৰেছ বিজ্ঞপ্তি যোগে প্ৰকাশ কৰিছে।
‘‘যিহেতু জুবিন গাৰ্গ অসম সম্পদ তেনেস্থলত কলিতা জনগোষ্ঠীক লৈ অনিচ্ছাকৃতভাৱে কৰা মন্তব্যৰ ভুল বুজাবুজিৰ অৱসান ইতিমধ্যে হৈছে কিন্তু ইয়াক লৈ এচাম ষড়যন্ত্ৰকাৰী লোকে যি পৰিবেশ সূচনা কৰিবলৈ ওলাইছে তাক আমি কলিতা জনগোষ্ঠী ছাত্ৰ সন্থাই ধিক্কাৰ দিছো,’’ প্ৰেছ বিজ্ঞপ্তিটোত ছাত্ৰ সংগঠনটোৱে উল্লেখ কৰে।
কিছুমান বিভেদকামী শক্তিয়ে ইলেক্ট্ৰনিক মাধ্যমত নানা ধৰণৰ আপত্তিজনক মন্তব্য আৰু অপপ্ৰচাৰ চলাই থকা প্ৰসংগত মত ব্যক্ত কৰি কলিতা জনগোষ্ঠীয় ছাত্ৰ সন্থাই এই কাৰ্য্যক গৰিহণা দিয়াৰ লগতে কলিতা জনগোষ্ঠীৰ ৰাইজৰ মৰম আৰু আশীৰ্বাদ জুবিন গাৰ্গৰ প্ৰতি সদায় থাকিব বুলি কয়।
‘জুবিন গাৰ্গ অসম সম্পদ আৰু তেওঁক অসমৰ সম্পদ হৈ থাকিব দিয়ক তেওঁক আমি জাতি জনগোষ্ঠীৰ মাজত আৱদ্ধ কৰি ৰাখিব বিচৰা নাই। জুবিন গাৰ্গ ডাঙৰীয়াই ভুল অনুভৱ কৰাত আমি কলিতা জনগোষ্ঠী ছাত্ৰ সন্থাই সমগ্ৰ জনগোষ্ঠীৰ হৈ তেওঁৰ লগত হোৱা ভুল বুজাবুজিত সহমত পোষণ কৰিছো,’’ ছাত্ৰ সংগঠনটোৰ প্ৰেছ বিজ্ঞপ্তিত প্ৰকাশ।
আনহাতে, কলিতা জনগোষ্ঠীয় ছাত্ৰ সন্থাই C(A)A ৰ বিৰোধিতাৰে জুবিনৰ লগতে একেলগে সংগ্ৰাম কৰি যাব বুলিও প্ৰতিশ্ৰুতি দিয়ে।