অসমত বাস কৰা প্ৰায় ৪০ লাখ অনুসূচিত জাতি লোকৰ সৰ্বাংগীণ বিকাশ আৰু কল্যাণৰ বাবে ৰাজ্যখনৰ অন্যান্য জাতি-জনগোষ্ঠীসমূহক স্বায়ত্ত শাসন ব্যৱস্থাৰ আওতালৈ অনাৰ দাবীৰে আজি সমগ্ৰ ৰাজ্যজুৰি প্ৰতিবাদ সাব্যস্ত কৰে অনুসূচিত জাতি যুৱ ছাত্ৰ পৰিষদে।
তাৰ সমান্তৰালভাৱে বৃহস্পতিবাৰে সংগঠনটোৰ কামৰূপ জিলা সমিতিয়ে চচলত দুই ঘণ্টা জোৰা অৱস্থান ধৰ্মঘট কাৰ্যসূচী ৰূপায়ন কৰে।
অৱস্থান ধৰ্মঘটস্থলীত উপস্থিত থকা পৰিষদৰ সাধাৰণ সম্পাদক কমলাকান্ত দাসে কয় ‘‘আজি সমগ্ৰ ৰাজ্যখনত অনুসূচিত জাতিক স্বায়ত্ত শাসন প্ৰদান কৰা আৰু জাতিটোৰ দীৰ্ঘদিনীয়া সমস্যা সমূহ সমাধানৰ দাবীত জিলা সমিতি সমূহে একেলগে আন্দোলন কৰিছে। ইমানৰ পিছতো যদি চৰকাৰে আমাক গুৰুত্ব নিদিয়ে তেন্তে আগন্তুক সময়ত পৰিষদে জংগী আন্দোলন গঢ়ি তুলিব’’।
তদুপৰি, অহা ২৫ অক্টোবৰৰ ভিতৰত তেওঁলোকৰ এই দাবীসমূহ পুৰণ নকৰিলে ২৬ অক্টোবৰৰ দিনটোত দিল্লীৰ যন্তৰ-মন্তৰত উত্তাল প্ৰতিবাদ সাব্যস্ত কৰাৰো হুংকাৰ দিয়ে পৰিষদৰ কেন্দ্ৰীয় সাধাৰণ সম্পাদকগৰাকীয়ে।
দাসে লগতে চলিত বৰ্ষৰ ৰাজ্যিক বাজেটত বিজেপি চৰকাৰে অনুসূচিত জাতিৰ উন্নয়নৰ বাবে কোনো ধৰণৰ গুৰুত্বপূৰ্ণ আঁচনি আৰু পুঁজিৰ ব্যৱস্থা কৰা নাই বুলিও উল্লেখ কৰে।
প্ৰতিবাদী কাৰ্য্যসূচীত অংশগ্ৰহণ কৰা প্ৰতিবাদকাৰীসকলে ‘অনুসূচিত জাতিক স্বায়ত্ত শাসন লাগিবই , বিজেপি চৰকাৰ হায় হায়, সংৰক্ষণ আইন মানি চলক, ছাত্ৰ ছাত্ৰীৰ জলপানি আদায় দিয়ক আদি শ্ল’গানেৰে প্ৰতিবাদস্থলী উত্তাল কৰি তোলে।