মোদীৰ অসম ভ্ৰমণৰ বিৰোধিতা কৰি সমগ্ৰ অসমত প্ৰতিবাদী কাৰ্য্যসূচী ৰূপায়ণ কৰা আছুৱে আজি কামৰূপৰ আমিনগাৱঁত প্ৰধান মন্ত্ৰীজনক ক’লা পতাকা আৰু ক’লা বেলুন প্ৰদৰ্শন কৰে।
কামৰূপৰ চাংসাৰিত ভূমি পূজনেৰে এইমছৰ নিৰ্মাণ কাৰ্য্যৰ আনুষ্ঠানিক শুভাৰম্ভ কৰিবলৈ গৈছিল প্ৰধান মন্ত্ৰী মোদী। তেতিয়াই আৰক্ষীৰ প্ৰবল বাধাকো নেওচি কামৰূপ আছুৱে এই প্ৰতিবাদ সাব্যস্ত কৰে। ক’লা পতাকা প্ৰদৰ্শন কৰাৰ লগতে ছাত্ৰ সংগঠনটোৰ কৰ্মীসকলে কেইবা হাজাৰ ক’লা বেলুন আকাশত এৰি দিয়ে।
আছুৰ এই প্ৰবল প্ৰতিবাদৰ সময়ত উক্ত অঞ্চলটোত উত্তপ্ত পৰিস্থিতিৰো সৃষ্টি হয়। প্ৰতিবাদ নিয়ন্ত্ৰণৰ বাবে আপ্ৰাণ চেষ্টা চলোৱা আৰক্ষীৰ সৈতে আছুৰ হতাহতিও হয়। অৱশেষত আৰক্ষীয়ে লাঠী চালনা কৰিব লগীয়া হয়।
উল্লেখযোগ্য যে মোদীৰ অসম তথা উত্তৰ-পূব ভ্ৰমণৰ বিৰোধিতা কৰি আজি আছুৱে সমগ্ৰ ৰাজ্যখনতে প্ৰতিবাদী কাৰ্য্যসূচী ৰূপায়ণ কৰিছে। মোদীয়ে চাংসাৰিৰ এখন জনসভাত ভাষণ দি থকা সময়খিনিছ ছাত্ৰ সংগঠনটোৱে সমগ্ৰ ৰাজ্যত একে সময়তে ক’লা পতাকা প্ৰদৰ্শন আৰু ক’লা বেলুন উৰুৱায়।