নিজকে ধুনীয়াৰ পৰা আৰু অতি ধুনীয়া কৰিবলৈ গৈ কৰুণ মৃত্যুক সাৱটি ল’বলগীয়া হ’ল এগৰাকী ভাৰতীয় অভিনেত্ৰীয়ে। প্লাষ্টিক চাৰ্জাৰী কৰি মৃত্যুক সাৱটি লোৱা অভিনেত্ৰীগৰাকী হৈছে কানাড়া অভিনেত্ৰী চেতনা ৰাজ।
অভিনেত্ৰীগৰাকীয়ে সোমবাৰে দৈহিক সৌন্দৰ্য বৃদ্ধিৰ বাবে ‘চৰ্বি-মুক্ত’ প্লাষ্টিক চাৰ্জাৰী কৰিবলৈ বাংগালুৰুৰ চেট্টী প্ৰসাধন কেন্দ্ৰলৈ গৈছিল । ঘৰত কাকো নজনোৱাকৈ ২১ বছৰীয়া অভিনেত্ৰীগৰাকীয়ে চেট্টী প্ৰসাধন কেন্দ্ৰত প্লাষ্টিক চাৰ্জাৰী কৰোৱাইছিল।
কিন্তু চাৰ্জাৰী কৰাৰ কিছুসময় পিছতে অভিনেত্ৰীগৰাকী গুৰুতৰ ভাবে অসুস্থ হৈ পৰে। দৰৱৰ পাৰ্শ্বক্ৰিয়াৰ ফলতে অভিনেত্ৰী চেতনা ৰাজৰ হাওঁফাওঁত তৰল পদাৰ্থ জমা হ’বলৈ ধৰে আৰু তেওঁ এক প্ৰকাৰ সংজ্ঞাহীন হৈ পৰে।
অভিনেত্ৰীগৰাকীৰ অৱস্থাৰ ক্ৰমাৎ অধিক অৱনতি ঘটাত প্লাষ্টিক চাৰ্জাৰী কৰা চিকিৎসকেই তেওঁক কাদে হস্পিতাললৈ লৈ যায়। চিকিৎসালয় পোৱাৰ পিছত প্লাষ্টিক চাৰ্জাৰী কৰা চিকিৎসক জনে চেতনা হৃদৰোগত আক্ৰান্ত হৈছে বুলি ভুল তথ্য দিয়ে। অভিনেত্ৰীগৰাকীক বহু সময় ধৰি আইচিইউত ৰাখি চিপিআৰ দিয়া যদিও তেওঁক জীয়াই তুলিব পৰা নগ’ল।
অভিনেত্ৰী গৰাকীৰ পৰিয়ালে চেতনাৰ মৃত্যুৰ বাবে প্লাষ্টিক চাৰ্জাৰী কৰা চিকিৎসককেই দোষাৰোপ কৰিছে। এই সন্দৰ্ভত স্থানীয় আৰক্ষী থানাত চিকিৎসক জনৰ বিৰুদ্ধে এজাহাৰ দাখিল কৰা হৈছে।
চেতনা দক্ষিণ ভাৰতৰ সৰু পৰ্দাৰ এগৰাকী জনপ্ৰিয় অভিনেত্ৰী আছিল।
‘গীতা’, ‘ডোৰাচনী’ৰ দৰে জনপ্ৰিয় ধাৰাবাহিকত অভিনয় কৰি তেওঁ প্ৰশংসিত হৈছিল। মাত্ৰ ২১ বছৰ বয়সতে মৃত্যুক সাৱটি লোৱা চেতনাৰ মৃত্যুৰ বাতৰি পোৱাৰ পিছতে শোকত ম্ৰিয়মান হৈ পৰিছে তেওঁৰ অনুৰাগীসকল।
ইমান কম বয়সতে প্লাষ্টিক অস্ত্ৰোপচাৰ কৰাৰ কি প্ৰয়োজন আছিল বুলিও বহুতে প্ৰশ্ন উত্থাপন কৰিছে।
