কাৰ্বি আংলঙত শেহতীয়াকৈ সৃষ্টি হোৱা উত্তপ্ত পৰিস্থিতি আৰু খিলঞ্জীয়া ভূমিপুত্ৰৰ বিৰুদ্ধে চলা অপমানজনক মন্তব্যক কেন্দ্ৰ কৰি ৰাজ্যজুৰি প্ৰতিক্ৰিয়াৰ সৃষ্টি হৈছে। ইয়াৰ মাজতে বিজেপি চৰকাৰ আৰু ইয়াৰ ভাতৃ সংগঠন বজৰং দলৰ ভূমিকাৰ ওপৰত তীব্ৰ প্ৰশ্ন উত্থাপন কৰি সামাজিক মাধ্যমত সৰৱ হৈ পৰিছে নগাঁৱৰ বিৰিঞ্চি বৰা নামৰ এজন যুৱক।
বাংলাদেশৰ হিন্দুৰ বাবে মাত মাতে, কিন্তু কাৰ্বি ভাই-ভনীৰ বাবে কিয় নাই সময়? বিৰিঞ্চি বৰাই তেওঁৰ লেখাত উল্লেখ কৰিছে যে বিজেপি আৰু বজৰং দলে বাংলাদেশত সংখ্যালঘু হিন্দুৰ ওপৰত হোৱা অত্যাচাৰৰ বিৰুদ্ধে নগাঁও চহৰৰ মাজমজিয়াৰে সমদল উলিয়াব পাৰে, কিন্তু নিজৰ ৰাজ্যৰ খিলঞ্জীয়া কাৰ্বি সকলৰ পক্ষত থিয় দিবলৈ তেওঁলোকৰ সাহস নাই। কাৰ্বি আংলঙত অবৈধ বেদখলকাৰীৰ বিৰুদ্ধে চলাই থকা আন্দোলনক সমৰ্থন নকৰাক লৈ তেওঁ দলটোক তীব্ৰ সমালোচনা কৰে।
নিজৰ মাটিত নিজৰ অধিকাৰ বিচাৰি আৰক্ষীৰ গুলীত প্ৰাণ হেৰুওৱা কাৰ্বি যুৱক আফিক টিমুঙৰ প্ৰসংগ উত্থাপন কৰি বৰাই প্ৰশ্ন কৰে যে “তোমালোক ইমানেই মেৰুদণ্ডহীন নে? নিজৰ স্বজাতিৰ এজন যুৱকৰ বলিদান তোমালোকৰ বাবে অচিনাকি নেকি?” দলীয় স্বাৰ্থৰ বাবে নিজৰ খিলঞ্জীয়া লোকক ত্যাগ কৰা কাৰ্য্যক তেওঁ ‘পদলেহনকাৰী’ আখ্যা দিয়ে।
কাৰ্বিভূমিত একাংশ অনা-অসমীয়াই ভূমিপুত্ৰ সকলক “চাইনীজ কাৰ্বি গো বেক” বুলি দিয়া শ্লোগানৰ বিৰুদ্ধে চৰকাৰী পক্ষই কোনো সবল পদক্ষেপ নোলোৱাত বিৰিঞ্চি বৰা মৰ্মাহত হৈছে। তেওঁ কয় যে যদি কাৰ্বিসকলক চাইনীজ বুলি উপহাস কৰা হয়, তেন্তে আমি সকলোৱে চাইনীজ। খিলঞ্জীয়াৰ আৱেগক উপহাস কৰা এনে শক্তিক প্ৰত্যাহ্বান জনাই তেওঁ কয় যে খিলঞ্জীয়াৰ স্বাৰ্থ ৰক্ষা কৰিব নোৱাৰা সকলৰ লগত অসমৰ জনসাধাৰণৰ কোনো সম্পৰ্ক নাই।
বিৰিঞ্চি বৰাই তেওঁৰ পোষ্টটোত কোনো ধৰণৰ হিংসাক সমৰ্থন নকৰিবলৈ আহ্বান জনাইছে (#SayNoToViolence)। কিন্তু একেসময়তে তেওঁ কাৰ্বি সকলৰ বিৰুদ্ধে চলি থকা কুৎসা ৰটনাৰ বিৰুদ্ধে একত্ৰিত হ’বলৈ সকলোকে আহ্বান জনাইছে।
বৰ্তমান সামাজিক মাধ্যমত বিৰিঞ্চি বৰাৰ এই মন্তব্যই ব্যাপক চৰ্চা লাভ কৰিছে আৰু খিলঞ্জীয়াৰ স্বাৰ্থক লৈ চৰকাৰী স্থিতিক পুনৰবাৰ কাঠগড়াত থিয় কৰাইছে। বৰ্তমান সামাজিক মাধ্যমত বিৰিঞ্চি বৰাৰ এই মন্তব্যই ব্যাপক চৰ্চা লাভ কৰিছে আৰু খিলঞ্জীয়াৰ স্বাৰ্থক লৈ চৰকাৰী স্থিতিক পুনৰবাৰ কাঠগড়াত থিয় কৰাইছে।
