যোৱা ১১ মাৰ্চৰ নিশা কাৰ্বি আংলঙৰ ডকমকা অঞ্চলৰ মাজেৰে পাৰ হৈ যোৱা এক বিধ্বংসী ধুমুহাই অঞ্চলটোত এক বৃহৎ বিপৰ্যয়ৰ সৃষ্টি কৰে। ২৯ নং ৰাষ্ট্ৰীয় ঘাইপথৰ ওপৰত থকা নামফলক খহি পৰাৰ ফলত কেইবাঘণ্টা ধৰি সেই পথেৰে যাতায়াত সম্পূৰ্ণৰূপে ব্যাহত হৈ পৰে। এই আকস্মিক ঘটনাত সমগ্ৰ অঞ্চলটোত এক বিশৃংখল পৰিৱেশৰ লগতে তীব্ৰ যান-জঁটৰ সৃষ্টি হয়।
জানিব পৰা মতে, বুধবাৰে দিনৰ ভাগত ডিফুত ৰাজ্যৰ মুখ্যমন্ত্ৰী হিমন্ত বিশ্ব শৰ্মাই সম্বোধন কৰা এখন ৰাজহুৱা সভাৰ পৰা বহুসংখ্যক লোকে বাহনৰে উভতি আহি থকাৰ সময়তে এই ঘটনা সংঘটিত হয়। যাৰ ফলত ২৯ নং ৰাষ্ট্ৰীয় ঘাইপথেৰে উভতি অহা বহুতো বাহন এই যান-জঁটত আৱদ্ধ হ‘বলগীয়া হয় আৰু যাত্ৰীসকলে চৰম দুৰ্ভোগ ভোগে। ঘাইপথটোৰে আৱদ্ধ বাহনৰ এক দীঘলীয়া শাৰী দেখিবলৈ পোৱা যায় আৰু ডকমকা অঞ্চলত কিছু সময়ৰ বাবে যান-বাহনৰ চলাচল প্ৰায় স্তব্ধ হৈ পৰে।
ঘটনাৰ খবৰ পোৱা মাত্ৰকে স্থানীয় আৰক্ষী আৰু প্ৰশাসনৰ লোক ততাতৈয়াকৈ ঘটনাস্থলীত উপস্থিত হৈ পৰিস্থিতি নিয়ন্ত্ৰণলৈ আনে। যান-জঁট নিয়ন্ত্ৰণ কৰাৰ লগতে পথৰ ওপৰত বাগৰি পৰা বিশাল ফলকখন আঁতৰাই ঘাইপথটোৰে যাতায়াত পুনৰ স্বাভাৱিক কৰিবলৈ কৰ্তৃপক্ষই ক্ষিপ্ৰতাৰে ব্যৱস্থা গ্ৰহণ কৰে। অৱশ্যে এক বৃহৎ দুৰ্ঘটনাৰ পৰা ৰক্ষা পৰা এই সমগ্ৰ ঘটনাত কোনো লোক হতাহত হোৱা নাই বা কোনেও আঘাতপ্ৰাপ্ত হোৱা নাই বুলি জানিব পৰা গৈছে।
সৌভাগ্যক্ৰমে কোনো জীৱনহানি নহ‘লেও, এই ঘটনাই পথৰ দাঁতিত নিৰ্মাণ কৰা বৃহৎ গাঁথনি আৰু ফলকসমূহৰ নিৰাপত্তাক লৈ পুনৰবাৰ প্ৰশ্ন উত্থাপন কৰিছে। বিশেষকৈ প্ৰতিকূল বতৰ আৰু ধুমুহাৰ সময়ত এনে গাঁথনিসমূহে যাত্ৰী আৰু পথচাৰীৰ বাবে কেনেধৰণৰ ভাবুকি কঢ়িয়াই আনিব পাৰে, সেয়া এই ঘটনাই উদঙাই দিছে।
