কাৰ্বি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে শেহতীয়াকৈ কাৰ্বি আংলঙত সৃষ্টি হোৱা অশান্তিৰ বাবে অসম চৰকাৰ আৰু কেন্দ্ৰীয় চৰকাৰক পোনপটীয়াকৈ দোষাৰোপ কৰিছে। তেওঁৰ মতে, আদালতৰ নিৰ্দেশ উলংঘন, ৰাজনৈতিক দুৰ্বল ব্যৱস্থাপনা আৰু ষষ্ঠ অনুসূচীভুক্ত অঞ্চলৰ সাংবিধানিক সুৰক্ষাক আওকাণ কৰাৰ বাবেই এই পৰিস্থিতিৰ সৃষ্টি হৈছে।
মুখ্যমন্ত্ৰী হিমন্ত বিশ্ব শৰ্মাই পিজিআৰ (PGR) আৰু ভিজিআৰ (VGR) ভূমিৰ উচ্ছেদৰ ক্ষেত্ৰত আদালতৰ নিৰ্দেশ মানি চলা বুলি কৰা দাবীক ৰংহাঙে প্ৰত্যাহ্বান জনাইছে। তেওঁ কয় যে উচ্ছেদ সম্পৰ্কীয় কাৰ্যকলাপৰ বাবে ইতিমধ্যে গুৱাহাটী উচ্চ ন্যায়ালয় আৰু উচ্চতম ন্যায়ালয়ত ৰাজ্য চৰকাৰৰ বিৰুদ্ধে আদালত অবমাননাৰ গোচৰ চলি আছে।
কচুতলীৰ উচ্ছেদৰ প্ৰসংগ টানি আনি তেওঁ কয় যে ন্যায়িক বাধা থকা স্বত্বেও প্ৰশাসনে উচ্ছেদ চলাই আছে, যিটোৱে আদালতৰ নিৰ্দেশৰ প্ৰতি চৰকাৰৰ অৱমাননাক স্পষ্ট কৰে।
ষষ্ঠ অনুসূচীভুক্ত অঞ্চলত আদানী আৰু আম্বানীৰ দৰে বৃহৎ কৰ্পোৰেট গোষ্ঠীক ভূমি আবণ্টন দি চৰকাৰে সাংবিধানিক ব্যৱস্থা উলংঘন কৰা বুলিও তেওঁ অভিযোগ উত্থাপন কৰে। ইয়াৰ দ্বাৰা জনজাতীয় অঞ্চলসমূহৰ বিশেষ সুৰক্ষা কৱচ দুৰ্বল কৰা হৈছে বুলি তেওঁ মত প্ৰকাশ কৰে।
কাৰ্বি আংলঙত সংঘটিত হিংসাত্মক ঘটনাত দুজন লোকে প্ৰাণ হেৰুওৱাৰ বাবে ৰংহাঙে চৰকাৰৰ ৰাজনৈতিক সিদ্ধান্ত আৰু প্ৰশাসনিক গাফিলতিকে দোষাৰোপ কৰিছে। সঠিক সময়ত লোৱা সংবেদনশীল পদক্ষেপে এই প্ৰাণহানি ৰোধ কৰিব পাৰিলেহেঁতেন বুলি তেওঁ দাবী কৰে।
তুলিৰাম ৰংহাঙৰ মতে, কেন্দ্ৰীয় আৰু ৰাজ্য চৰকাৰৰ ধাৰাবাহিক অৱহেলা আৰু ষষ্ঠ অনুসূচীৰ নীতি-নিয়মৰ প্ৰতি থকা অৱজ্ঞাই অঞ্চলটোক অস্থিৰতাৰ ফালে ঠেলি দিছে।
