অন্ধবিশ্বাসে আজিও সমাজৰ একাংশক জুৰুলা কৰি থকাৰ এক ভয়ংকৰ ঘটনা পোহৰলৈ আহিছে। বছৰটোৰ শেষৰ দিনটোতে কাৰ্বি আংলং জিলাত সংঘটিত হৈছে এক নৃশংস হত্যাকাণ্ড। ডাইনীৰ সন্দেহত গাঁৱৰ একাংশ লোকে এহাল দম্পতিক জীৱন্তে অগ্নিদগ্ধ কৰি হত্যা কৰাৰ গুৰুতৰ অভিযোগ উত্থাপন হৈছে। এই মৰ্মান্তিক ঘটনাটো ৩০ ডিচেম্বৰৰ নিশা জিলাখনৰ হাওৰাঘাট আৰক্ষী থানাৰ অন্তৰ্গত ১ নম্বৰ বেলগুৰি মুণ্ডা গাঁৱত সংঘটিত হয়।
আৰক্ষীৰ সূত্ৰ অনুসৰি, দুৰ্বৃত্তৰ এটা দলে প্ৰথমে দম্পতিটোক তেওঁলোকৰ ঘৰৰ ভিতৰতে চোকা অস্ত্ৰৰে আক্ৰমণ কৰে। ইয়াৰ পিছত ঘৰটোত জুই লগাই দিয়াত দুয়োগৰাকীৰে ঘটনাস্থলীতে মৃত্যু হয়। জানিব পৰা মতে, গাঁৱৰ একাংশ লোকে মৃত দম্পতিহালে ‘ডাইনী‘ চৰ্চা কৰি অঞ্চলটোলৈ অমঙ্গল নমাই আনিছে বুলি দীৰ্ঘদিন ধৰি অভিযোগ উত্থাপন কৰি আহিছিল।
এই নৃশংস কাণ্ডত প্ৰাণ হেৰুওৱা দম্পতিহাল হ’ল গাৰ্ডি বিৰোৱা (৪৩) আৰু মীৰা বিৰোৱা (৩৩)। ঘটনাৰ খবৰ পোৱাৰ লগে লগে আৰক্ষী আৰু প্ৰশাসনৰ জ্যেষ্ঠ বিষয়াসকলে ঘটনাস্থলী পৰিদৰ্শন কৰে। অপৰাধৰ সৈতে জড়িত অভিযুক্তসকলক চিনাক্ত কৰি গ্ৰেপ্তাৰ কৰাৰ বাবে ইতিমধ্যে তীব্ৰ তদন্ত আৰম্ভ কৰা হৈছে আৰু অঞ্চলটোত নিৰাপত্তা ব্যৱস্থা কটকটীয়া কৰা হৈছে।
এগৰাকী আৰক্ষী বিষয়াই সংবাদ মাধ্যমক জানিবলৈ দিয়া মতে, অঞ্চলটোত গভীৰভাৱে শিপাই থকা অন্ধবিশ্বাসৰ বাবেই এনে হিংসাত্মক ঘটনা সংঘটিত হৈছে। কেৱল উৰাবাতৰি আৰু ভ্ৰান্ত ধাৰণাৰ বশৱৰ্তী হৈ নিৰীহ লোকে অকালতে প্ৰাণ হেৰুৱাব লগা হোৱাটো অত্যন্ত দুৰ্ভাগ্যজনক।
আৰক্ষীয়ে জনোৱা মতে, ভাৰতীয় ন্যায় সংহিতাৰ (BNS) বিভিন্ন ধাৰাৰ লগতে ‘অসম ডাইনী হত্যা (নিষেধ, প্ৰতিৰোধ আৰু সুৰক্ষা) আইন, ২০১৮’ৰ অধীনত গোচৰ ৰুজু কৰি জড়িত সকলোৰে বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব।
