আজি অৰ্থাৎ ২৫ ডিচেম্বৰৰ পুৱতি নিশা কৰ্ণাটকৰ চিত্ৰদুৰ্গা জিলাৰ ৪৮ নং ৰাষ্ট্ৰীয় ঘাইপথত এক ভয়ংকৰ পথ দুৰ্ঘটনা সংঘটিত হয়। বেংগালুৰুৰ পৰা গোকৰ্ণালৈ গৈ থকা এখন ব্যক্তিগত যাত্ৰীবাহী বাছ আৰু এখন ট্ৰাকৰ মাজত মুখামুখি সংঘৰ্ষ হোৱাৰ ফলত বাছখনত এক ভয়াবহ অগ্নিকাণ্ডৰ সৃষ্টি হয়।
প্ৰাথমিক তথ্য অনুসৰি, পুৱা প্ৰায় ২ বজাত বিপৰীত দিশৰ পৰা অহা ট্ৰাকখনে নিয়ন্ত্ৰণ হেৰুৱাই ডিভাইডাৰ পাৰ হৈ বাছখনত তীব্ৰবেগে খুন্দা মাৰে। সংঘৰ্ষৰ ফলত বাছখনৰ ইন্ধনৰ টেংকিত বিস্ফোৰণ ঘটি মুহূৰ্ততে জুই জ্বলি উঠে। গোৰ্লাথু গাঁৱৰ সমীপত সংঘটিত এই দুৰ্ঘটনাৰ খবৰ পোৱাৰ লগে লগে উদ্ধাৰকাৰী দল ঘটনাস্থলীত উপস্থিত হয় আৰু জ্বলি যোৱা বাছখনৰ ভিতৰৰ পৰা মৃতদেহসমূহ উদ্ধাৰ কৰিবলৈ সক্ষম হয়।
জানিব পৰা মতে মুঠ ৩২ জন যাত্ৰী আছিল। দুৰ্ঘটনাৰ মুহূৰ্ততে ৯ জন যাত্ৰীয়ে খিৰিকীৰে জপিয়াই কোনোমতে প্ৰাণ ৰক্ষা কৰে। আনহাতে, ২১ জন আহত যাত্ৰীক চিত্ৰদুৰ্গা, হিৰিয়ুৰ আৰু টুমাকুৰুৰ বিভিন্ন চিকিৎসালয়ত ভৰ্তি কৰোৱা হৈছে। জানিব পৰা মতে, দুৰ্ঘটনাগ্ৰস্ত ট্ৰাকখনৰ চালকৰ থিতাতে মৃত্যু হৈছে। আনহাতে, বাছখনৰ চালক আৰু চাফাই কৰ্মীয়ে কোনো গুৰুতৰ আঘাত নোপোৱাকৈ পলাই যাবলৈ সক্ষম হয়।
বৰ্তমান ঘটনাস্থলীত আৰক্ষী উপস্থিত হৈ তদন্ত অব্যাহত ৰাখিছে। মৃতদেহসমূহ মৰণোত্তৰ পৰীক্ষাৰ বাবে প্ৰেৰণ কৰা হৈছে।
