ডেটিং এপৰ জৰিয়তে লগ পোৱা এগৰাকী মহিলাক ধৰ্ষণ কৰাৰ অভিযোগত ২৩ বছৰীয়া যুৱকৰ বিৰুদ্ধে দাখিল কৰা গোচৰ খাৰিজ কৰিছে কৰ্ণাটক উচ্চ ন্যায়ালয়ে। আদালতে স্পষ্টভাৱে উল্লেখ কৰিছে যে সহমতৰ সম্পৰ্কত অতি স্পষ্ট গোচৰৰ বাহিৰে অন্য অপৰাধলৈ ৰূপান্তৰিত কৰিব নোৱাৰি।
ন্যায়াধীশ এম নাগপ্ৰসন্নৰ বিচাৰপীঠে যুৱকজনৰ আবেদনৰ অনুমতি দি কয় যে, “পাৰস্পৰিক ইচ্ছাৰ পৰা জন্ম হোৱা সম্পৰ্কটো হতাশাৰ বাবে বিচ্ছিন্ন হ’লেও, অতি স্পষ্ট গোচৰৰ বাহিৰে অপৰাধমূলক আইনৰ অধীনত অপৰাধলৈ ৰূপান্তৰিত কৰিব নোৱাৰি।”
প্ৰকাশিত তথ্য অনুসৰি, অভিযুক্ত আৰু অভিযোগকাৰীয়ে ডেটিং এপৰ জৰিয়তে লগ পাইছিল আৰু তাৰ পিছত এবছৰতকৈও অধিক সময় ধৰি ইনষ্টাগ্ৰামত নিয়মীয়া যোগাযোগ বজাই ৰাখিছিল। ২০২৪ চনৰ ১১ আগষ্টত দুয়োজনে লগ হৈছিল, একেলগে ৰাতিৰ আহাৰ গ্ৰহণ কৰিছিল আৰু পিছত এখন হোটেললৈ গৈছিল য’ত তেওঁলোকৰ শাৰীৰিক সম্পৰ্ক স্থাপন কৰাৰ অভিযোগ উত্থাপন হৈছিল। পিছদিনা যুৱকজনে মহিলাগৰাকীক ঘৰত থবলৈও গৈছিল।
অভিযোগ অনুসৰি পিছদিনা মহিলাগৰাকীয়ে এখন চিকিৎসালয়ত স্বাস্থ্য পৰীক্ষা কৰাইছিল। স্বাস্থ্য পৰীক্ষাত তেওঁৰ ওপৰত যৌন নিৰ্যাতন চলোৱা হৈছিল বুলি উল্লেখ কৰিছে। ইয়াৰ পিছতে তেওঁ আৰক্ষী চকীত অভিযোগ দাখিল কৰে, তাৰ পিছত ভাৰতীয় দণ্ডবিধিৰ (আইপিচি) ধাৰা ৩৭৬ ৰ অধীনত গোচৰ ৰুজু কৰা হয় আৰু পৰৱৰ্তী সময়ত অভিযুক্তক গ্ৰেপ্তাৰ কৰা হয়।
অনহাতে গোচৰটো খাৰিজ কৰিবৰ বাবে আবেদনকাৰীয়ে আদালতত যুক্তি দাঙি ধৰে যে দুয়োৰে মাজত ফটো, বাৰ্তালাপ, ভিডিঅ’কে ধৰি তথ্যই স্পষ্টভাৱে প্ৰমাণ কৰে যে তেওঁলোকৰ সম্পৰ্ক সহমতৰ সৈতে গঢ়ি উঠিছিল। লগতে অভিযোগ কৰে যে তদন্তকাৰী বিষয়াই ইচ্ছাকৃতভাৱে এই সবিশেষ অভিযোগ পত্ৰৰ পৰা বাদ দিছে।
কিন্তু ৰাজ্যই এই আবেদনৰ বিৰোধিতা কৰি যুক্তি দিছিল যে সন্মতিৰ বিষয়টো বিচাৰৰ সময়তহে সিদ্ধান্ত ল’ব পৰা যাব।
আদালতত দাখিল কৰা অভিযোগ, অভিযোগনামা আৰু তেওঁলোকৰ বাৰ্তালাপৰ তথ্য পৰীক্ষা কৰাৰ পিছত বিচাৰপীঠে দুয়োৰে মাজত আদান-প্ৰদান কৰা বাৰ্তাসমূহ “ভাল নহয়” বুলি উল্লেখ কৰে যদিও এই কাৰ্য্যসমূহ সন্মতিসূচক বুলি স্পষ্ট কৰি দিছে বিচাৰপীঠে।
ন্যায়াধীশগৰাকীয়ে মন্তব্য কৰে যে, যদি বৰ্তমান গোচৰটোৰ বিচাৰ চলালেও, ই কেৱল আনুষ্ঠানিকতাৰ বাহিৰে আন একো নহ’ব। প্ৰকৃততে ন্যায়িক প্ৰক্ৰিয়াৰ অপব্যৱহাৰ হ’ব। সেয়ে উচ্চ ন্যায়ালয়ে আবেদনকাৰীৰ বিৰুদ্ধে এফআইআৰ বাতিল কৰা হৈছে বুলি উল্লেখ কৰে।
