বিধিৰ বিধান খণ্ডাৱ নোৱাৰি! একেৰাহে ২৫ বছৰ ধৰি নিৰুদ্দেশ হৈ থকা এগৰাকী মহিলাৰ পৰিয়ালে তেওঁক মৃত বুলি ধৰি লৈ শ্ৰাদ্ধকৰ্ম শেষ কৰি থৈছিল। নকৰিবই বা কিয়? ২৫ বছৰ মানে আঢ়ৈ দশক অপেক্ষা কৰাৰ পিছতো মহিলাগৰাকীক বিচাৰি নোপোৱাত ঘৰৰ মানুহে তেওঁক মৃত বুলি ধৰি লৈছিল।
সেয়ে, মহিলাগৰাকীৰ পৰিয়ালৰ সদস্য আৰু আত্মীয়সকলে হিন্দু ধৰ্মৰ ৰীতি অনুসৰি তেওঁৰ পাৰলৌকিক কাজকাম সম্পূৰ্ণ কৰিবলৈ বাধ্য হ’ল। কিন্তু শেষত ভাগ্যই সহায় হ’ল। কানাড়া ভাষাই ঘৰলৈ ওভতাই আনিলে ৫০ বছৰীয়া সাকাম্মাক।
২৫ বছৰ ধৰি নিৰুদ্দেশ হৈ থকা কৰ্ণাটকৰ বাসিন্দা সাকাম্মাক শেহতীয়াকৈ হিমাচল প্ৰদেশৰ এখন বৃদ্ধাশ্ৰমত উদ্ধাৰ কৰা হৈছে। হিমাচলৰ মাণ্ডীৰ বৃদ্ধাশ্ৰমত উদ্ধাৰ হৈছে সাকাম্মা। বুধবাৰে বৰদিনৰ দিনা (২৫ ডিচেম্বৰ) কৰ্ণাটকৰ মহিলাগৰাকী ঘৰলৈ উভতি আহে। ২৫ বছৰ ধৰি তেওঁৰ পৰিয়ালৰ সৈতে কোনো ধৰণৰ যোগাযোগ নাছিল।
সূত্ৰ অনুসৰি, সাকাম্মাৰ ঘৰ কৰ্ণাটকৰ বল্লাৰী জিলাৰ দানানায়াকাংকাকেৰে গাঁৱত। ২৫ বছৰ আগতে কৰ্ণাটকৰ হোছাপেটত এগৰাকী আত্মীয়ৰ বিয়াত সন্তানৰ সৈতে গৈছিল। উভতি অহাৰ পথত তেওঁ ভুলতে চণ্ডীগড় অভিমুখী ৰেলত উঠিল। তাৰপিছতে দুৰ্ভাগ্যই তেওঁৰ অহৰহ সংগী হৈ পৰিল। সাকাম্মাই উত্তৰ ভাৰতৰ বিভিন্ন ৰাজ্যত ইটোৰ পিছত সিটো স্থানত অঘৰীৰ দৰে জীয়াই থাকিবলৈ আৰম্ভ কৰিলে।
লগতে পঢ়কঃ নদীৰ সৈতে নদীৰ সংযোগ! পৰিৱেশবিদৰ সতৰ্কবাণীক আওকাণ কৰি মোদীৰ পদক্ষেপ
মহিলাগৰাকীক বিচাৰি নাপাই তেওঁৰ পৰিয়ালে প্ৰথমে স্থানীয় থানাত নিৰুদ্দেশ হোৱা ব্যক্তিৰ ডায়েৰী দাখিল কৰে। সাকাম্মাক বিচাৰি উলিয়াবলৈ বল্লাৰ জিলা আৰক্ষীৰ সৈতেও নিয়মীয়াকৈ যোগাযোগ ৰাখিবলৈ আৰম্ভ কৰে। সমগ্ৰ দক্ষিণ ভাৰতত আনকি কৰ্ণাটকৰ লগতে দেশৰ বিভিন্ন ৰাজ্যতো তেওঁক বিচাৰিবলৈ আৰক্ষীয়ে ছবিসহ পত্ৰ প্ৰেৰণ কৰে।
অসংখ্য স্থানত বিজ্ঞাপন দি মহিলাগৰাকীৰ পৰিয়ালৰ লোকৰ লগতে তেওঁৰ আত্মীয়ই তেওঁক বিচাৰিবলৈ আৰম্ভ কৰে। কিন্তু মহিলাগৰাকীক ক’তো পোৱা নাছিল। সাকাম্মা কেতিয়াও ঘূৰি নাহে বুলি ধৰি লৈ পৰিয়ালৰ লোকেও কেইবছৰমান আগতে তেওঁৰ পাৰলৌকিক কামকাজ সম্পূৰ্ণ কৰে।
সাকাম্মা কেনেকৈ ঘৰলৈ উভতি আহিলে? সূত্ৰৰ পৰা জানিব পৰা মতে, শেহতীয়াকৈ হিমাচলৰ মাণ্ডীৰ এখন বৃদ্ধাশ্ৰমলৈ গৈছিল এজন যুৱ আই পি এছ বিষয়া। তালৈ গৈ বৃদ্ধাশ্ৰমৰ মানুহবোৰৰ লগত কথা পাতিলে। আই পি এছ বিষয়াজনে কানাড়া ভাষাত কথা কোৱা পঞ্চাশৰ দশকৰ এগৰাকী মহিলাক লক্ষ্য কৰিলে। অফিচাৰজন বৰ কৌতুহলী হৈ পৰিল। সেই মহিলাগৰাকীৰ লগত কথা পাতি তেওঁ গম পালে যে তেওঁৰ নাম সাকাম্মা। মহিলাগৰাকীয়ে তেওঁক জনালে কেনেকৈ তেওঁ হেৰাই গ’ল। কেনেকৈ তেওঁ বহু ঠাই ঘুৰি শেষত মাণ্ডী বৃদ্ধাশ্ৰমত থিতাপি লৈছিল।
লগতে পঢ়কঃ নিৰ্বাচনী প্ৰতিবাদৰ মাজতে মোজাম্বিকৰ কাৰাগাৰৰ পৰা পলায়ন ডেৰ হাজাৰৰো অধিক কয়দীৰ
আৰক্ষী বিষয়াজনে পলম কৰা নাছিল। তেওঁ খৰধৰকৈ কৰ্ণাটক চৰকাৰৰ সমাজ কল্যাণ বিভাগৰ লগত যোগাযোগ কৰে। সেই কাৰ্যালয়ৰ বিষয়াসকলে সাকাম্মাৰ পৰিয়ালৰ সৈতে যোগাযোগ কৰিছিল। তেওঁ পৰিয়ালটোক হিমাচলৰ মাণ্ডিৰ বৃদ্ধাশ্ৰমলৈ গৈ সাকাম্মাক আনিবলৈ ক’লে। বৰদিনৰ দিনাই ঘৰলৈ উভতি আহিছে সাকাম্মা।
