উচ্চতম ন্যায়ালয়ে কাৰুৰত সংঘটিত পদপিষ্ট ঘটনাৰ তদন্ত চিবিআইক অৰ্পণ কৰাৰ নিৰ্দেশ দিছে। এই ঘটনাত অভিনেতা তথা ৰাজনীতিবিদ বিজয়ৰ ৰাজনৈতিক সমাৱেশত অতি কমেও ৪১ জন লোকে প্ৰাণ হেৰুৱাইছিল। আৰু তদন্ত নিৰীক্ষণৰ বাবে উচ্চতম ন্যায়ালয়ৰ এগৰাকী প্ৰাক্তন ন্যায়াধীশৰ নেতৃত্বত এখন সমিতি গঠন কৰা হ’ব বুলি সদৰী কৰিছে।
উল্লেখ্য যে চলিত বৰ্ষৰ ২৮ ছেপ্টেম্বৰত কাৰুৰত বিজয়ৰ ৰাজনৈতিক দল তামিলাগা ভেট্ৰি কাঝাগাম (টিভিকে)ৰ সমাৱেশত এই ভয়ংকৰ পদপিষ্ট ঘটনা সংঘটিত হৈছিল। ঘটনাত ৪১ জনৰ মৃত্যুৰ লগতে বহু লোক আহত হৈছিল।
উচ্চতম ন্যায়ালয়ৰ ন্যায়াধীশ জে কে মহেশ্বৰী আৰু এন ভি অঞ্জৰিয়াৰ বিচাৰপীঠে ঘটনাৰ তদন্ত চিবিআইক অৰ্পণ কৰাৰ নিৰ্দেশ দিছে। মাদ্ৰাজ উচ্চ ন্যায়ালয়ৰ বিশেষ তদন্তকাৰী দল (এছআইটি) গঠনৰ আদেশক প্ৰত্যাহ্বান জনোৱা আবেদনৰ ওপৰত শুনানিৰ পিছত এই নিৰ্দেশ দিছে। আবেদনকাৰীৰ ভিতৰত আছে টিভিকে দল, পনীৰসেলবম পিটচাইমুথু, এছ প্ৰভাকৰন, চেলভাৰজ পি আৰু জি এছ মণি।
ন্যায়াধীশ মহেশ্বৰীয়ে আদেশত কয় যে এই ঘটনাই আবেদনকাৰীৰ মৌলিক অধিকাৰ খৰ্ব কৰিছে আৰু সমগ্ৰ জাতিক স্তম্ভিত কৰিছে। “এটা ন্যায্য তদন্ত নাগৰিকৰ অধিকাৰ, তাত কোনো সন্দেহ নাই। সকলো পক্ষৰ উদ্বেগ দূৰ কৰিবলৈ আমি উচ্চতম ন্যায়ালয়ৰ প্ৰাক্তন ন্যায়াধীশৰ নেতৃত্বত তিনিজনীয়া তত্ত্বাৱধায়ক সমিতি গঠনৰ প্ৰস্তাৱ দিছো,” সমিতিখনে চিবিআইৰ তদন্ত নিৰীক্ষণ কৰিব আৰু সঠিক দিশ নিৰ্ধাৰণ কৰাত সহায় কৰিব।
যোৱা সপ্তাহত আদেশ সংৰক্ষিত কৰি বিচাৰপীঠে মাদ্ৰাজ উচ্চ ন্যায়ালয়ৰ দুটা বিৰোধী আদেশক লক্ষ্য কৰিছিল য’ত এটা আদেশত মাদুৰাই বিচাৰপীঠে চিবিআই তদন্তৰ আবেদন নাকচ কৰিছিল, আনহাতে প্ৰধান বিচাৰপীঠে এছআইটি গঠনৰ নিৰ্দেশ দিছিল।
বিচাৰপীঠে ৰোড শ্ব’ আৰু ৰাজনৈতিক সমাৱেশৰ বাবে ষ্টেণ্ডাৰ্ড অপাৰেটিং প্ৰচিডিউৰ (এছঅ’পি) প্ৰণয়নৰ দাবীত দাখিল কৰা ৰিট আবেদনত টিভিকে দলক লক্ষ্য কৰি দিয়া পৰ্যবেক্ষণত আচৰিত হৈ বিচাৰপীঠে কয় “এই আদেশ কেনেকৈ গৃহীত হ’ল সেয়া আমি বুজিব পৰা নাই,” ।
শুনানিৰ সময়ত এজন অধিবক্তাই দাবী কৰে যে ৰাজ্য আৰক্ষীয়ে বিৰোধী দলক কাৰুৰত সমাৱেশৰ অনুমতি প্ৰদানত অস্বীকাৰ কৰিছিল, কাৰণ ঠাইখন সংকীৰ্ণ। তেন্তে টিভিকেক কেনেকৈ অনুমতি দিয়া হ’ল বুলি তেওঁ প্ৰশ্ন উত্থাপন কৰিছে। তেওঁ আৰু কয় যে চৰকাৰে মাজনিশা মৃতদেহৰ মৰণোত্তৰ পৰীক্ষা কৰি পুৱাই দাহ কৰিছিল।
তামিলনাডু চৰকাৰৰ পক্ষৰ পৰা জ্যেষ্ঠ অধিবক্তা পি উইলছনে কয়, “এই অভিযোগৰ সন্মুখীন হৈছে আমি প্ৰথমবাৰৰ বাবে। মই বিস্তৃত কাউণ্টাৰ শপতনামা দাখিল কৰিম। এইটো তীব্ৰ অভিযোগ, আৰু মই ক’ব নিবিচাৰো যে ইয়াৰ আঁৰত কোন আছে। ওচৰৰ জিলাসমূহৰ চিকিৎসকক মাতি অনা হৈছিল।”
মাদ্ৰাজ উচ্চ ন্যায়ালয়ে আইপিএছ বিষয়া আছৰা গাৰ্গৰ নেতৃত্বত এছআইটি গঠনৰ নিৰ্দেশ দিয়াৰ বিৰুদ্ধে টিভিকে দলে উচ্চতম ন্যায়ালয়ত আবেদন দাখিল কৰিছিল। আবেদনত কোৱা হৈছে যে উচ্চ ন্যায়ালয়ে ৰাজ্য আৰক্ষীৰ স্বাধীনতাক লৈ প্ৰশ্ন উত্থাপন কৰাৰ পিছতো কেৱল ৰাজ্যিক আৰক্ষীৰ বিষয়াৰে গঠিত এছআইটি নিযুক্ত কৰাটো পক্ষপাতিত্বপূৰ্ণ। উচ্চতম ন্যায়ালয়ৰ এই আদেশে ঘটনাৰ স্বচ্ছ তদন্ত নিশ্চিত কৰিব বুলি আশা কৰা হৈছে।
