‘কাজিৰঙা লাইভ’ নামৰ সংবাদ গোষ্ঠীটোৱে মঙ্গলবাৰে বোকাখাত নাট্য মন্দিৰত মহীৰূহ-কথাশিল্পী হোমেন বৰগোহাঞিলৈ গভীৰ শ্ৰদ্ধাঞ্জলি জনাই এক অনুষ্ঠানৰ আয়োজন কৰে ।
সংবাদ গোষ্ঠীটোৰ পৰামৰ্শদাতা সম্পাদক ধ্ৰুৱজ্যোতি সাহাই আঁত ধৰা এই অনুষ্ঠানটিৰ বন্তি প্ৰজ্বলন কৰে অসম ৰাজ্যিক সাংবাদিক সংস্থাৰ সভাপতি জিতু শৰ্মা ৰাজখোৱাই ৷
প্ৰয়াত কথাশিল্পী গৰাকীৰ প্ৰতিচ্ছবিত সমূহীয়া পুষ্পাঞ্জলি অৰ্পণ কৰে উপস্থিতগণ্যমান্য ব্যক্তিসকলৰ লগতে ‘কাজিৰঙা লাইভ’ পৰিয়ালে। ‘কাজিৰঙা লাইভ’ৰ মুখ্য সম্পাদক ভৱানন্দ কলিতাৰ পৌৰহিত্যত অনুষ্ঠিত এই অনুষ্ঠানৰ উদ্দেশ্য ব্যাখ্যা কৰে ‘কাজিৰঙা লাইভ’ৰ কাৰ্যবাহী সম্পাদক পলিমা বি চেতিয়াই।
অনুষ্ঠানত হোমেন বৰগোহাঞিদেৱৰ ব্যক্তিত্ব, সাহিত্য তথা সমাজ জীৱনলৈ তেওঁৰ অৱদানকে ধৰি সামগ্ৰিক সকলো বিষয় সামৰি সাংবাদিক তথা সাহিত্যিক পলিমা বি চেতিয়াই সম্পাদনা কৰা ‘অক্ষয় বন্তি হৈ জ্বলি থাকিব যুগান্তৰলৈ, মহীৰূহ’ নামৰ গ্ৰন্থখন উন্মোচন কৰা হয়।
উন্মোচন কৰে বোকাখাত মহকুমাৰ মহকুমাধিপতি বিপুল দাস আৰু কাজিৰঙা ৰাষ্ট্ৰীয় উদ্যান সঞ্চালক পি শিৱ কুমাৰে।
গ্ৰন্থ উন্মোচক দুগৰাকীয়ে হোমেন বৰগোহাঞিৰ বিস্তৃত কৰ্মৰাজিৰ বিশদ আলোচনাৰে অসমৰ জনজীৱনলৈ তেওঁৰ অৱদানক শ্ৰদ্ধাৰে সোঁৱৰণ কৰাৰ সমান্তৰালভাৱে ‘কাজিৰঙা লাইভ’ পৰিয়ালক এনে যোগাত্মক পদক্ষেপ লোৱাৰ বাবে ধন্যবাদ জনায়।
অনুষ্ঠানত সন্মানীয় অতিথি হিচাপে উপস্থিত থাকি ভাষণ প্ৰদান কৰে অসম ৰাজ্যিক সাংবাদিক সংস্থাৰ সভাপতি জিতু শৰ্মা ৰাজখোৱা, অৱসৰপ্ৰাপ্ত প্ৰবক্তা তথা সাংবাদিক বাবুলাল মোৰ, অচ্যুত হাজৰিকা, বোকাখাত মহকুমা সাংবাদিক সন্থাৰ সভাপতি বুবুল দত্ত, বোকাখাত প্ৰেছ ক্লাৱৰ সম্পাদক উত্তম শইকীয়া, প্ৰাঞ্জল হাজৰিকা আৰু ‘কাজিৰঙা লাইভ’ৰ মুখ্য উপদেষ্টা ৰঞ্জিত ৰজকে।
সম্পূৰ্ণ ক’ভিড প্ৰট’কল মানি অনুষ্টুপীয়াকৈ অনুষ্ঠিত কৰা গাম্ভীৰ্যপূৰ্ণ এই অনুষ্ঠানটিৰ শেষত শলাগৰ শৰাই আগবঢ়ায় সাংবাদিক ধ্ৰুৱজ্যোতি সাহাই।
